“!No Folem Dog Ia!” Fren, Mei 2025, 8–9.

!No Folem Dog Ia!

I kam long Cynthia Herron Glad

?Filing ia i kam long Tabu Spirit?

Wan tru stori we i kam long YSA.

Gel i stap ron long baskel wetem wan dog i stap ron long fored

!Yumi go!” Lauren i singaot taem hem i ron pasem haos blong Marcie.

Marcie i putum helmet blong hem. “Mi stap kam!”

Marcie i ron long baskel blong hem long ples blong wokbaot i go long ol fren blong hem. Hem i laekem blong pleplei long ol defren kaen gem wetem Lauren mo Cassidy. Be long evri samting, hem i laekem blong ron long baskel wetem tufala.

Taem ol gel ia oli stap ron i go daon long ples blong wokbaot, dog blong neba blong olgeta, Rocket i stat blong folem olgeta.

“O no,”Cassidy i talem. “!Yumi nidim blong karem hem i gobak hom!”

Be dog ia i no wantem gobak. Oli singaotem hem blong i stop, be Rocket i gohed blong ron. Nomata wanem oli mekem, hem i stap ronron raon mo muvum tel blong hem. !Hem i stap gat wan gud taem!

Taem ol gel oli stap ron folem Rocket, Marcie i no luksave ol haos ia. Hem i stap ron i go moa longwe long rod we hem i kamaot long hem. !Marcie i no save eniwan we i stap long ol haos ia!

?Yumi stap go wea? Marcie i tingting. ?Bae mi save faenem rod blong gobak?

Marcie i traem blong no wari mo gohed blong ron long baskel. Be filing ia i kam bak. Be wan samting i stap talem long hem se hem i mas gobak hom.

Marcie i stopem baskel blong hem long saed blong rod. Hem i talem long wan laod voes, “Ating bae yumi mas gobak nao!”

“!Yumi mas karem Rocket i gobak long haos!” Cassidy talem. Hem mo Lauren tufala i gohed blong ron folem dog ia.

Marcie i filim i no stret. ?From wanem hem i stap wari? ?Ol fren blong hem, oli gat sem filing ia tu?

Ating filing ia hem i blong mi nomo, Marcie i tingting. ?Filing ia i kam long Tabu Spirit? Hem i bin kasem baptaes mo konfemesen sam manis i pas, mo mama mo papa i bin tijim hem abaot, stap lisin long Tabu Spirit. Oli talem se Hem bae i toktok long Marcie wetem ol filing long hat mo tingting long maen blong hem. Hem i save se bae Tabu Spirit i lidim hem sapos hem i lisin.

Hem i gat filing ia bakegen. Be naoia filing ia i kam moa strong. No folem dog ia.

“Bae mi stap gobak,” Marcie i singaot i go long ol fren blong hem.

“OK!” Lauren i talem.

Gel i stap ron long oposit daereksen long ol gel we oli stap ron folem dog.

Marcie i tanem raon mo i ron kambak long rod we hem i bin kam long hem. Taem hem i kasem haos, hem i putum baskel blong hem long gras mo go insaed long haos. Mama i stap bisi long kijin.

“Halo mama,” Marcie i talem. “Mi kambak long haos. Mi filim se mi wari insaed.”

Mama i stop. “?Wanem i hapen?”

“Mi gat wan filing blong woning taem mi stap ron long baskel blong mi wetem ol fren blong mi. Mekem se mi kambak long haos,” Marcie i talem. “Mi ting se hem i Tabu Spirit.”

Mama i haggem hem. “Mi glad yu bin lisin long filing ia.”

Marcie i filim gud insaed. “Mi tu.”