“Koroboki aika Tabu n Taetae n Swahili,” Te Rao, Tianuare 2025, 36–37.
Koroboki aika Tabu n te Taetae ae Swahili
I tangiria bwa e na iai au anga n ibuobuoki, e iango Jared.
Te karaki ae koaua mai Aotiteria.
E rinnako Jared nakon te Reirei n Tabati ao n tekateka irarikiia raona n reirei. E noria bwa iai te teinimwaane ae e aki kina ae rin n tekateka n raroa teutana mairouia.
Ana tia reirei Jared ae, Te Tari Trudgen, e wiingare nakoia kain te kiraati. “Aio Emmanuel,” e taku. “E a tibwa mwaing ma ana utu nako Aotiteria. Aio aia moan Tabati n ara uoote!”
E iango Jared bwa e bon bae n matoa te roko n te uoote ae boou. E na kataia n riki bwa raoraon Emmanuel.
E buuta ana boki aika tabu te Tari Trudgen. “Tia bane n rairiira nakon 3 Nibwaai,” e taku.
Jared e kauka ana boki ae tabu ao e taraa Emmanuel. Akea ana boki aika tabu.
E wiingare Jared nakoina ao e rara nakoina. “Mauri, Arau Jared,” e taku. “Ko kan ibuobuoka au boki aika tabu ma ngai?”
E wiingare rikaaki nakoina Emmanuel. “Aa, e uarereke ootau n te Ingiriti,” e taku. “Kabwara au bure.”
“Tera am taetae ae ko kabongana?”
“Swahili.”
E kabi n taetae n Swahii Jared. Ngaia ma Emmanuel aki bati n kakaraki n nikiran tain te kiraati.
N te tairiki anne n tain te katairiki, E tuangiia ana utu Jared taekan Emmanuel.
“E rang tara n raoiroi,” e taku Jared. “Ma tiaki kona n oota raoi i marenara.”
E katoutoua atuuna Tinana. “A rinanon ae bati n te tai aio Emmanuel ma ana utu,” e taku. “A kitana abaia ni katawe ibukina bwa iai kangaanga aika riki ikekei. A katukui aia bwai ni kabane.”
E ubu n nanokawaaki Jared. E na tera aron ae ngkana nna kitana mwengau ningabong nakon te aba ae boou? E na rangi n matoatoa!
I tangiria bwa e na iai au anga n buoka Emmanuel, e iangoia. Ma tera?
Jared e aki toki iangoan Emmanuel irouna ngke ea katauroia ni matu. E tekateka n ana taibora ma Ana Boki Moomon ao n warekii kiibu tabeua. Warekan koroboki aika tabu a kakabebete n taainako. N te tairiki aio, a kauringa bwa Emmanuel akea ana boki aika tabu ae kona n warekia. Jared e kaina ana boki ae tabu ao e taara kunin ana boki. E kibarake man ana kaintekateka ao e kabaitiia n biri n kawain aia katangaina.
“Tinau!” e wewete. “I ataia bwa nna kanga n buoka Emmanuel!”
Te Tabati are i mwiina, e ingainga Jared n kan noora Emmanuel. E tekateka irarikiia raona n riikan n moan te umwantabu n tataninga ma Ana Boki Moomon ae boou iaon rangana. A tia n buokia mitinare n karekea ana kaobi ae onoti ibukin Emmanuel.
Ngke e rinnako n te umwantabu Emmanuel ma ana utu, e wiingare Jared nakoina ao n anoanoia. E ubu n miimi Emmanuel ngke e tekateka irarikin Jared. Ma e mata n kubanako ngke e anganna Jared Ana Boki Moomon.
“Ibukiu?” E titiraki Emmanuel.
E katoutou atuuna Jared.
E mata n kukurei Emmanuel. E raibaea ana Boki Moomon ae boou. “Swahili!” e taku. E wiingare nakon Jared ao e koona ana boki nakon bwabwaana. “Ko rabwa!”
E aabue nanon Jared ngke e wiingare nakoina. E ataia bwa e aki kona ni kanakoraoi bwaai ni kabane ibukin Emmanuel, ao a teimatoa n aki kona n reitaki raoi imarenaia. Ma e raoiroi. Aki kainanoia bwa ena titebo aia taetae ngkana ana riki bwa rao!
Kamatata n te korotamnei iroun Keith Negley