“I nako n taromauri ma Ghuka,” Te Rao, Tianuare 2025, 30-31.
Bwaeoniia n Aba Nako
I nako n taromauri ma Ghuka
E tuai man nonora te Ekaretia n aron aei mai mwaina Kelvin.
Te karaki ae koaua mai Kenya.
E bairei raoi bwatoron miriki kiraati aika a ranea Kelvin i aon te tabo ni bwai. E a bon tibwa mwaing ni maeka n te kaawa ma tibuna i tinanikun te kaawa ae bubura. Iai aia titoa ni miriki, ao e tatangira te ibuobuoki Kelvin.
“N te tairiki aei ti na nako n ana bootaki ni kakukurei ara ekaretia,” Ghuka e taku (tibu te unimwaane). “Ko tangiria n nako ma ngaira? E na nang kakukurei.“
E tangira te kakukurei Kevin. “Eng!” e taku. “N na mwananga ma ngkami.”
I mwiin kainakin aia titoa, a mwananga Kevin ma tibuna nakon te bootaki ni kakukurei. A rirarikin tabeua titoa ake a kaboiinako kunikai, uanikai, ao aroka ake iai bwaataia. I mwiin te tai ae aki maan, a roko n te umwantabu.
E tei Kelvin ma matana ae ure-mangaa ngke e taraa tamaroan te kateitei. E tuai man nonoora te umantabu n aron aei mai mwaina. Angiia umantabu iai te kaibangaki ietaia, ma aei bon akea.
I nanona, tibun Kelvin e kaotia nakoia aomata aika a mwaiti aika a raraoi. A kang amwarake aika a kangkang ao a takakaro.
Ma e bon miroaroa Kelvin. Ngaia are e a ririaki i nanon ana oo te umwantabu. E noora tamanein Iesu Kristo ae te korobanna. I mwiina e nakonako i nanon te umanreirei ao noori tabeua rawebanna iaon te oo.
Antai aomata akanne? E warenako ana iango Kelvin.
I mwiin kitanan te ruu, e noriia uoman ataeinimwaane i nanon te oo. A kabarakiniia n te mainaina ao a neketai. “Mauri,” e taetae temanna mai irouiia. “Ngaira mitinare. Antai aram?”
E kabwarabwaraa Kelvin. Ngkanne e titiraki, “Antai te temwaane are n te tamnei?” E rairaki ni kotea teuana te tamnei man taian tamnei n te ruu.
“Anne te burabeti,” e taetae te mitinare are temanna. “Ko ataia bwa tera te burabeti?”
E moangare Kevin ao e ioa atuuna I aki.
“Te burabeti bon ana metintia te Atua,” e taetae te mitinare. ”E reireiniira bwaai are tangiria te Atua bwa ti na ataia.”
Ngke e nakonako n oki Kelvin ma tibuna n te tairiki anne, e bon taua ana Boki Moomon are a tia n anganna mitinare. E bon kukurei n reiakina riki taekan te burabeti ao te ekaretia ae boou aei.
“Ko kona wareware nakoira?” E titiraki Ghuka ngke a okira mweengaia. A kabi ni wareware tibun Kelvin.
“Eng!” E taku Kelvin. E kauka ana Boki Moomon ao e wareware n takaarua. E aki mataata n taekana ni kabane, ma e namakina te bwai ae kaokoro n onoti.
N te Tabati, e nakonako ma tibuna n oki nako n te taromauri. E nakon te kiraati ibukiia ataei ni kabane. E aranaki bwa te Moanrinan. E karekeia raoraona aika a mwaiti! E reiakina riki taekan te burabeti ao Iesu.
A roko riki mitinare n reirei ma Kelvin. N te bong teuana a titirakinna te titiraki. “Ko kona n ira ana banna ni katooto te Tia Kamaiu ao ni bwabetitoaki?”
E bubura moangaren Kelvin. “Eng!”
N te bong are e bwabetitoaki iai, e ruo Kelvin i nanon te ran. E bon kamariri. Ma ngke e taraa rarikina Kelvin, e noriia tibuna, mitinare ao raona ake a boou ni kabane man te taromauri. E namakina ae e tangiraki!
Man rinean iriirakin Iesu Kristo, Kelvin bon te bwaeoniia i nanon ana utu. E aki tataningaa kan Iriirakina—ao ni buokiia tabeman n Iriiria naba!
Korotamneiaki iroun Kristin Sorra