Nakomai, Iriirai Waaki ni Kakukurei

Kaokan te bwai teuana e nanonaki iai kaokan arona. “Kaokan Bwaninin ana Euangkerio Iesu Kristo: Te Katanoata n te Kauabubua n Ririki nakon te Aonaaba,” i nanon te Gospel Library n reiakina riki taekana bwa e kanga ni kaokaki te Ekaretia. I mwiina takakarona te takakaro i aon kaokan bwaai! Kakaea ke korea te tamnei ao korokoreia i nanon mwakorokoro bwa a na riki bwa tamnei ni katomatomaki. Kaibibitii taian katomatoma ma kain te utu ao kaokaaia tamnei i marenaia. Bukin tera e kakawaki bwa Iotebwa Timiti e kaoka ana euangkerio Iesu Kristo?

E taetae Tamara are i Karawa nakoira rinanon Ana burabeti (taraa Reirei ao Berita aika Tabu 1:38). Ti bon kainanoia bwa ti na ongo! Kataneiai ongoraekinna man takakarona te takakaro. Temanna e na katanga te katangitang, ao ni kabane a na maie ngkana e tang te katangitang. Ngkana e toki te katangitang, ni kabane te koraki ana tiaoki. Ane e kabanea n tiaoki e na tibwaua teuana bukina ngkai a tangira te burabeti. Katanga te katangitang ni karokoa a bane n reke aia tai n tibwatibwa ataei!

Tamara are i Karawa ao Iesu Kristo a kaotiia nakon Iotebwa Timiti (taraa Iotebwa Timiti—Rongorongo 1:15–20). Ti arana te tai aei bwa te Moan Kaotioti. Rairia nakon iteraniba 13 ni karaoa oin am Moan Kaotioti n te tamnei, ao ngkanne kabongana n tuanga temanna riki te karaki.

Ngkana ti reiakina riki rongorongoia ara bakatibu, ti namakina te kaan nakoia ao nakon Tamara are i Karawa (taraa Reirei ao Berita aika Tabu 2). Tuanga kain te utu ni karakina te karaki man maiuia ke man maiuin temanna aia bakatibu. Ngkanne manga karioa te karaki ngkai ko takakaro ke korotamnei!