“Kanga Aiaron Iotebwa,” Te Rao, Tianuare 2025, 4–5.
Te Boki ni Wareware ae Bebete
Kanga Aiaron Iotebwa
E bon noora raoi Tamara are i Karawa ao Iesu Kristo Iotebwa Timiti?
Te karaki ae koaua mai Biribin.
E bwaka n tekateka Lhensay irarikin ana kaintekateka tinana ngke e buti aia jeepney i nanon te kaawa. Te bong ae te Tabati bon te bong ae mamaten nanon Lhensay n te wiiki! E tatangiria n nakon te Moanrinan ao N reiakina taekan Iesu Kristo.
E tei aia jeepney n aia tabo are ana toki iai. E taua bain Lhensay tinana ngke a nakonako nakon te taromauri.
I mwiin te bootaki n toa, e nakon te Moanrinan Lhensay ma raoraona ae Maria. Iaon te burakibooti iai tamnein te ataeinimwaane ae e tataro n te buakonikai.
“Mauri n te ingabong!” E kotea te tamnei Aia tia reirei, Titita Cruz. “Kam ataia bwa antai anne?”
“Anne bon Iotebwa Timiti!” E taku Lhensay.
E moangare Titita Cruz. “Eng, e bon eti anne. Ao tera ae karaoia Iotebwa Timiti?”
E tanrikaaki n taraa te tamnei Lhensay. E ataia bwa Iotebwa Timiti bon te burabeti, ma e aki mwaiti ana atatai riki.
“Boni ngaia te moan burabeti n ara ekaretia,” e taku Maria.
“Eti anne!” e taku Titita Cruz. “Ngke e kairake Iotebwa, e aki ataia bwa tera te aro ae e na iria. E nakon te buakonikai ao e tataro nakon te Atua ni kakaea bwa e ngaa ae koaua. E bubutii naba ibukin kabwaraan ana bure. Ngke e tataro, e roko te oota ae rang ootanako. Ko ataia bwa antai i nanon te oota anne?”
A tataninga Lhensay ao kaain te kiraati.
E katokaa te tamnei riki teuana iaon te burakibooti Titita Cruz. Ae teuana aei e kaotiia uoman mwaane aika a tei i etan Iotebwa Timiti. A kunikainiia n ae mainaina ao n ootanako raneaneaia.
Tamara are i Karawa ma Iesu Kristo a kaotiia nakon Iotebwa Timiti,” e taku Titita Cruz. “Ao a tuangnga bwa e na kaoka ana Ekaretia Iesu. Ti aranna bwa te Moan Mii ni Burabeti.”
E katea baina Lhensay, a uremanga matana. “Bon te koaua raoi anne?” e titiraki.
E katoutoua atuna Titita Cruz. “Eng, bon te koaua.”
E namakina te abuee n nano Lhensay. E ataia bwa e bon koaua te bwai are e taekinna Titita Cruz.
N te tairiki anne, e teimatoa n iangoa taekan Iotebwa Timiti. “Tinau, N na kanga n noriia Tamara are i Karawa ao Iesu Kristo, n aron are e noriia Iotebwa Timiti?” e taku.
E inga n rabwata Lhensay tinana. “Angiina mai buakora a tuai noora Tamara are i Karawa ao Iesu Kristo n aron ae e a tia n nooria Iotebwa Timiti. Ma A kona n taetae nakoira rinanon te iango ma te namakin mairoun te Tamnei ae Raoiroi. Ngkanne ko konaa n ataia bwa n taainako A mena ma ngkoe.”
E iangoa taekan te namakin are e abuee Lhensay ngke e tuangiia taekan te Moan Mii ni Burabeti Titita Crux. Anne bon te Tamnei ae Raoiroi, n anganna te rongorongo mai iroun Tamara are i Karawa ao Iesu Kristo! E moangare ao e a manga rabwata Tinana. A tia n taetae nakon neiei, kanga ai aron are a tia nakon Iotebwa Timiti!
Kamataata n te tamnei iroun Shawna J. C. Tenney