Te Kaembing n Bongin te Kakarau

“Au kaboo ningabong, eti?” E titiraki Lucy nakon Tinana ngke e toka n ana kainiwene.

E katoutoua atuuna Tinana. “Eng! Tairikin ningabong n te aoa 6:00.”

E aki kona n tataninga Lucy. E a kaman kaingainga boon ana tiim i nanon wiiki aika bati. Ao n te ririki aio ao e bingke aia kabooraoi! E a rangi n inganga e aki kona n matu.

Ma ngke ea ingabong, e taara tinanikun ana wintoo Lucy ao e matanokunoku. Nang ni karaua a beti i karawa, ao a neinei taabo ni bane. E karau ngke e tairiki.

E katorobubua ao n karaoa ana tataro n te moaningabong. “Tamau are i Karawa, taiaoka karaoiroa kanoan te bong aio bwa ena nakoraoi ibukin au kaboo nakon tairiki.”

Inanon te bong anne n ana reirei, Lucy e tabe n iangoa ana kaboo. E katamneia ngkana e a bwaina ana kaboraoi ae bingke, ao moannaia ngkana e rawea te boro are a moanna iai. Ma tinaniku, e teimatoa n karau ao n mwaimwai.

E katawe n tataro n ana iango. Tamau are i Karawa, taiaoka kauka karawa bwa ti aonga n kona n takakaro n tairiki.

Ngke e tang te beero, e kuriaa ana baeki ao e biri n otinako. E noria bwa e a kaninganinga taai mai akuun taian nang!

Ma ngke e kaoti Tinana n anaia, ao e uota te rongorongo ae kananokawaki. “E a taonaki te kaboo n tairiki,” e taku. “I rangi ni karautaeka ngkai e riki aio.”

E tara karawa Lucy. “E nang oti taai, ngkai. Tao e nang toki te karau.”

“I ataia,” e taku Tinana. “Ma te marae n takakaro e a iabuti n te ran. Ngaia are e ngae ngkana e toki te karau, e a rangi n neinei ao n bokaboka ibukin te takakaro. Ana manga barongaa te tai n boo nakon te tai teuana.”

A ranran matan Lucy. E bon rangi n aki kukurei! E rangi, ni kan takakaro n tairiki. Bukin tera Tamana are i Karawa e aki kaeka ana tataro?

N mwengana, e namakinna Lucy bwa e rawawata man un n aiaron taian nang ni karau. E aki rin kan warekan ana boki are mamaten nanona. Ao e ngae ngke Tinana e karaoa kanana are mamaten nanona bwa te katairiki, e aki kangkang kanakina.

I mwiin te katairiki, tarin Lucy ae uarereke, Ellie, e a kawarake n toka i rangana. “Takakaro ma ngai?” e titiraki.

E katiia te ang Lucy. “Ngaia,” e taku. Ngkanne e a reke ana iango. “Ti riai n karaoa te bwai ae kaunga.”

E anaa te buruum ao e kabaea te kunikai i tabona bwa e na riki bwa te buraeki. Ao ngkanne e a bootia tarina ni kabane. E tabekarake ana buraeki ao e taku, “Kaaraki nakon te Kaembing n Bongin te Kakarau! Te tabo are ko na nako iai n kaungako ngkana ko aki kona n takakaro i tinaniku.”

A kaungaunga tarina.

“Te moan,” e taku Lucy, “ti na anenea kunan ara kaembing.”

A ngarengare ngke a karioa kunaia n takakaro ma taekana. Ngkanne a mwaati i nanon te ruu ma aia buraeki, ao n anene n tatakarua.

“Ngkai ti nang riai n katea umwara!” E buokiia tarina Lucy n rikoi burangketi ao unimga bwa ana katea umwaia. E mwaiti te tai ae bwaka aia auti. Ma a manga kateia, ao n bootaki i nanon umwaia n takakaro.

E a ooia e a boo aia tai n matu. “Au kaantaninga bwa e na manga karau naba ningabong,” e taku tarin Lucy ae Liza. “I tangiria n manga takakaro riki n te Kaembing n Bongn te Kakarau”

“Ko rabwa ngkai ko katakakaroia tarim,” e taku Tinana ngke e inga ma Lucy imwain matuuna. “Ko karekea ootan taai man te bong ae uanangnang. I kakatonga iroum.”

Lucy e namakinna te kukurei ngke ea toka iaon ana kainiwene. E aki kaekaaki ana tataro n te anga are tangiria. Ma Tamana are i Karawa e buokia n kakaea te anga ae e na karaoa te bwai ae kaunga ma ana utu—ao anne kanga ai bon kaunga naba are ngke ena bwai bingke n ana moan kaboo.

Kauka te PDF

Kamataataan te tamnei iroun Apryl Stott