?Hem I Bigwan Tumas blong Stap long Praemeri?

“!Welkam long Praemeri!” Sista Agbor, Praemeri lida blong Gift, i stanap long fored blong rum. “Tedei bae yumi lanem singsing ia ‘Love One Another.’”

Miusik i stat, mo ol smosmol pikinini oli rere blong singsing. Be Gift hem i save singsing ia finis. !Hem i bin singsing long hem handred taem finis! Hem i no filim nomo blong singsing long hem tedei.

Gift i taet long Praemeri. Hem i mo bigwan, i longfala mo i bigwan bitim evri narafala pikinini. Ol fren blong hem long jos evriwan oli stap long Yang Woman naoia. Hem i gat kolosap wan ful yia yet blong stap long Praemeri bifo hem i save go wetem olgeta long ol klas blong Yang Woman mo ol aktiviti.

Taem we evriwan i stap singsing, Gift i stap kwaet. Hem i stap talem wanwan toktok blong singsing ia sloslo nomo, be hem i bisi blong stap tingting.

Afta, hem i gat wan aedia. Maet sapos hem i toktok long bisop, bae hem i save letem hem i go eli long Yang Woman mekem se hem i save stap wetem ol fren blong hem.

Gift o faenem Bisop Achombi afta long jos. “Halo, Bishop,” hem i talem. “Mi no filim i stret tumas olsem se mi mi pat blong Praemeri. Mi bigwan mo olfala long bitim evri narafala pikinini. Be, ?I oraet sapos mi stat blong go long Yang Woman?”

Bisop Achombi i smael. “Mi save se blong muv i go long Yang Woman i gud tumas,” hem i talem. “Be yu save stat blong go nomo taem yu kasem 12 yia. Mi sore.”

Gift i lukluk daon long tufala sus blong hem. “Okei.”

“Praemeri i laki blong gat yu,” bisop i talem. “mi ting se ol smol pikinini oli laekem yu tumas. Yu save mekem wan bigfala jenis long olgeta.”

Blong ful dei ia, Gift i filim nogud. Wan yia i wan longfala taem blong filim se mi stap miwan long Praemeri.

Be afta, Gift i tingting moa abaot wanem we Bisop Achombi i bin talem. ?I tru se o narafala pikinini ia oli laekem hem? Hem i neva bin luksave hemia bifo.

Long nekis wik, Gift i saksakem han blong talem tata long ol fren blong hem taem oli wokbaot i go long Yang Woman rum. Fes blong hem i nogud mo wokbaot i go long klasrum blong Praemeri.

“Gift,” Sister Agbor i talem, “bae yu glad blong helpem mi blong tijim singsing blong wik ia?”

“Am, Okei,” Gift i talem. “?Wanem singsing ia bae yumi lanem?”

“‘Mi Pikinini blong God.,’” Sista Agbor i talem. “!Tangkyu long help blong yu! Mi ting se ol pikinini bae oli gat wan gudtaem blong lanem tru long yu.”

Taem we taem blong singsing i stat, Gift i stanap long fored blong rum. “Tedei bae mi tijim yufala wan long ol fevret singsing blong mi,” hem i talem. Hem i helpem ol pikinini blong lanem ol toktok. Afta, hem i singsing long singsing ia wetem olgeta. Taem oli stap singsing, Gift i filim wan wom filing mo glad insaed. Hem i save se hem i stap filim Tabu Spirit.

!I no longtaem, Praemeri klas bae i finis nao! Afta long las prea, Gift i stat blong wokbaot long ol spes bitwin ol rum. Hem i wantem blong faenem ol fren blong hem afta long klas blong Yang Woman mo talem halo.

Be wan long ol smol gel i stopem hem. “!Tangkyu blong singsing wetem mifala!” Hem i haggem Gift. “Mi wantem blong kam olsem yu taem mi bigwan.”

Gift i smael. Hem i no save wet yet blong go long Yang Woman mo hem i hop se nekis yia bae i go hariap. Be hem i save se hem i save lanem mo mekem ol samting yet long Praemeri.

Maet Bisop Achombi i talem tru. Hem i save mekem wan bigfala jenis.

Ol pikja droing oli kam long Simini Blocker