Stap prea from Alejandro

Gerardo i ron long sket bod i go long ol step long fored blong haos blong hem. Trak blong mama i stap long rod blong trak long haos. Hemia i minim se, hem mo Alejandro tufala i kambak long dokta. Gerardo i leftemap sket bod blong hem mo resis i go insaed.

“?Gerardo?” Mama i singaot. “!Mitufala i stap long ples ia!”

Gerardo i wokbaot i go insaed long famli rum. Alejandro i stap ledaon long long amjea. Mama i sidaon narasaed long hem. Hem i luk olsem se i wari.

Gerardo i wari tu. Las wik oli faenemaot se Alejandro i bin kasem kansa. Hem i sik tumas.

Be Alejandro i sidaon mo smael taem Gerardo i kam insaed. “!Halo! ?Yu bin gat wan gudfala dei?”

“Yes, ?be olsem wanem long ol dokta?” Gerardo i askem.

“Hem i se bae mi mas go long operesen,” Alejandro i talem.

Mama i saksakem hed blong hem se yes. “Be ol nambawan dokta blong helpem hem oli stap long hospital blong ol pikinini. From se Alejandro i gat 14 yia, hem i bigwan tumas blong oli lukaot long hem long ples ia. Bae yumi traem blong faenem wan narafala ples.”

Bel blong Gerardo i taet gud. Sapos oli no save kasem help blong Alejandro, ?wanem bae i save hapen? ?Bae kansa blong Alejandro i save go wos?

Gerardo i go long rum blong hem. Hem i nid blong tingting.

Long Praemeri, Gerardo i lanem se oltaem Papa long Heven bae i harem hem. Gerardo i bin save se oltaem hem i save askem help long Hem.

So, hem i nildaon long saed blong bed blong hem mo foldem tufala han blong hem mo prea. “Dia Papa long Heven, plis helpem Alejandro”. “Plis helpem mifala blong faenem ol dokta we oli save mekem operesen ia.”

I no longtaem mama i singaotem hem blong kakae. Hem i mekem pupusas, we i fevret kaekae blong Gerardo. Hem i kakae bigwan long saed blong wan tik roti we oli fulumap insaed wetem jis mo ol bin. Be hem i wari yet abaot brata blong hem.

Alejandro i kakae smol nomo long pupusa blong hem. Hem i luk olsem se i stap wari mo i stap muv slo we slo.

Mama tu i mas luksave ia. “?I oraet sapos yumi wajem wan vidio blong Jos?” mama i askem. Oli laekem blong stap wajem ol vidio abaot Jisas Kraes taem oli harem nogud.

“Okei.” Gerardo i wasem ol plet taem mama i go blong mekem vidio i rere. Afta, olgeta evriwan oli sidaon blong waj.

Long vidio, Jisas Kraes i prea long garen long saed blong wan tri. Gerardo i bin save abaot stori ia. Hemia i taem we Jisas i safa bifo Hem i ded long kros.

Taem we vidio i en, Gerardo i filim kwaet mo pis. Be hem i gat wan kwestin. “From wanem Jisas i mas harem nogud tumas?” hem i askem.

Mama i holem hem mo Alejandro i kam kolosap. “Jisas i bin jusum blong filim harem nogud ia from se Hem i lavem yumi. Hem i filim evri soa blong bodi we yumi gotru long hem.”

Gerardo i lukluk i go long Alejandro. “Jisas i save olsem wanem man i filim taem i gat kansa?”

“Yes, Hem i filim,” Mama i talem. “Hem i save hamas i had. Mo from se Hem i save wanem yumi filim, Hem i save olsem wanem blong helpem yumi.”

Gerardo i filim hat blong hem i wom insaed, olsem se oli kavremap hem long wan bigfala blangket. Papa long Heven mo Jisas Kraes Tufala i save mo lavem famli blong hem. Tufala i save olsem wanem blong helpem Alejandro.

Taem we Gerardo i kasem hom afta long skul long nekis dei, i faenemaot se mama i stap fulumap wan basket wetem klos.

“!Gud nius!” hem i talem. “Mi toktok long dokta long hospital blong ol pikinini. Bae oli helpem Alejandro. Bae hem i gotru long operesen tumoro.”

Gerardo i haggem mama strong. “!Papa long Heven i stap helpem yumi! ?Bae yumi save prea mo talem tangkyu long Hem?”

“Gud tingting,” Mama i talem. “Bae yumi singaotem Alejandro.”

Taem oli stap prea tugeta, Gerardo i filim pis. !Papa long Heven i bin harem prea blong hem! Naoia Alejandro bae i kasem operesen we hem i nidim. Gerardo i save Jisas Kraes i andastanem wanem oli stap gotru long hem. Mo oltaem bae Hem i helpem olgeta blong go tru ol hadtaem.

Ol pikja droing i kam long Ricardo Guerrero