“Wan Spesel Konfrens,” Fren, Novemba 2024, 8–9.

Wan Spesel Konfrens

I kam long Alelie Coronel-Camitan

(I kamaot long wan tru stori)

Maet blong stap help i save mekem hem i glad, olsem Presiden Nelson i talem.

Stori ia i tekples long Indonesia.

“!Aminah, blong mi ia!” Indira i singaot strong. Hem i pulumaot doli long smol sista blong hem.

“Tufala gel, mi stap aot,” mama i singaot. “Plis stap gud gel blong papa.”

Indira i lukluk i go antap. “?Yu stap go wea?”

“Long maket. Mi stap go blong pem kaekae blong kukum wan spesel kaekae blong tumoro.” Mama i saksakem han blong talem tata.

?Wan spesel kaekae? ?Be from wanem? Indira i go faenem papa. “?From wanem tumoro i spesel?” hem i askem.

Papa i smael. “!Tumoro bae yumi save wajem jeneral konfrens! Hem i spesel from se yumi save gat janis blong harem profet mo ol narafala lida blong Jos oli toktok. Bae oli talem long yumi wanem Papa long Heven i wantem yumi blong harem.”

Taem mama i kasem haos, hem i putumaot kaekae. Papa i brum long floa.

“Indira, ?yu save helpem Aminah blong faenem ol klos blong hem blong tumoro?” Mama i askem.

Indira i mekem fes i nogud. “?From wanem mi mas helpem hem?”

“Plis, mekem wanem we mi askem,” Mama i talem.

Indira i komplen. Hem i pulpulum leg blong hem long graon.

Long nekis moning, Indira i wekap mo smelem wan naes kaekae. Hem i jiamaot long bed mo ron i go long kijin. !Mama i kukum mit buluk long melek blong kokonat wetem ol spaes mo stik mit blong kaekae long lanj taem! Bae i tes gud tumas ia.

I no longtaem afta, jeneral konfrens i stat. Indira i sidaon wetem famli blong hem blong wajem long TV. Hem i lisin long kwaea i singsing. Hem i harem ol pipol oli tokbaot ol tempol mo ol skripja mo Jisas Kraes.

Las spika hem i profet, Presiden Russell M. Nelson. Hem i tokbaot olsem wanem Jos i stap helpem ol pipol raon long wol.

“Bigfala glad blong yumi i kam taem yumi helpem ol brata mo sista blong yumi,” hem i talem.

Indira i tingting long hemia. ?Blong stap help i mekem hem i glad? Hem i gohed blong lisin. Presiden Nelson i talem se blong stap laef folem nambatu bigfala komanmen, i save helpem yumi blong kam olsem Jisas Kraes.

Taem oli waj finis, oli kakae lanj we mama i bin mekem. Indira i gohed blong stap tingting long toktok blong profet.

“Wanem hem i nambatu bigfala komanmen?” hem i askem.

“Yu mas lavem ol man we oli stap raonabaot long yu,” papa i talem.

Indira i tingting abaot ol pipol we Jos i bin helpem raon long wol. “?Olsem nao bae mi help sapos ol neba blong mi oli stap longwe tumas?”

“Ol neba blong yu oli evriwan we oli stap raon long yu,” Mama i talem. “Olsem ol memba blong famli blong yu.”

Indira i lukluk daon. Samtaem hem i no stap mekem i gud tumas long famli blong hem.

Be maet blong stap helpem olgeta, i save mekem hem i glad, olsem we Presiden Nelson i bin talem. Hem i wan wei we hem i save folem Jisas. !Hem i wantem blong traem!

Blong ful wik, Indira i traem blong stap ekstra naes long famli blong hem. Hem i pleiplei wetem Amirah. Hem i serem ol pleiplei blong hem. Hem i mekem wanem we papa mo mama i askem be i no komplen. Taem Indira i helpem famli blong hem, oli stap glad. Mo hemia i mekem hem i glad tu.

Profet i talem tru. !Blong stap helpem ol narawan i givim glad long hem!