“Tips for Your First Temple Trip,” Fren, Novemba 2024, 38–39.
Ol Help blong Yu blong Fas Tempol Trip
Insaed long tempol, yu save kasem baptaes mo konfemesen blong ol pipol we oli bin ded be oli no save abaot gospel. Ol pipol ia bae oli gat janis blong mekem wan kavenan wetem God mo kasem ol blesing blong Hem, semmak nomo olsem yu taem we yu bin kasem baptaes mo konfemesen.
Wanem blong Karem
-
Ol klos blong Jos (werem olgeta i go long tempol)
-
Tempol rekomen
-
Bras blong hea mo rop blong fasem hea (sapos yu nidim)
-
Nem blong ol famli oli printim aot long FamilySearch app o website (oli save jusum)
Wanem blong Mekem
1. Kam insaed long Tempol
Soem rekomen blong yu long olgeta we oli sidaon long tebol long fored. Afta, yu save go long ples blong mekem baptaes. Wan wokman long tempol bae i givim waet smol klos blong wetem insaed, ol stoking mo wan ovarol.
2. Jenisim Ol Klos blong Yu
Insaed long rum blong jenis, werem ol klos we oli givim long yu. Putum ol samting blong yu long wan kabinet we oli save lokem we i emti. Afta, lokem kabinet blong yu mo pinim ki long ovarol we yu werem. Sapos yu gat wan longfala hea, fasem i go biaen. Holemtaet wetem yu ol nem blong famli blong yu we oli printim.
3. Wet Wetem Fasin blong Stap Revren
Taem yu wet blong taem blong yu blong baptaes, yu save ridim ol skripja, prea o tingting hevi. Yu save tingting tu abaot ol pipol we bae yu kasem baptaes long bihaf blong olgeta.
4. Tekempat long Ol Baptaes insaed long Tempol
Taem we i taem blong yu, givim ol nem blong famli blong yu long man we i sidaon long smol tebol. Sapos yu nogat ol nem, bae oli yusum ol nem we i stap long tempol. Go insaed slo long wota blong ples blong baptaes, long ples ia bae wan we i gat prishud bae i baptaesem yu long bihaf blong wanwan nem ia. Tingbaot blong benem ni blong yu mo holem blong blokem nus blong yu taem hem i putum yu i godaon insaed long wota.
5. Jenis I Gobak long Ol Klos blong Yu
Afta we yu finis, bae wan i givim tawel long yu. Taem yu gobak long rum blong jenis, yu save swim long wan bat rum, jenis i gobak long ol drae klos blong yu mo mekem hea blong yu. Mekemsua se yu putum ol wetwet klos blong yu long bin mo hangem bak ki i go long kabinet.
6. Tekempat long ol konfemesen
Laswan, bae wan i lidim yu i go long wan rum we long ples ia bae oli mekem konfemesen long yu long bihaf blong olgeta we oli bin mekem baptaes blong olgeta.
Sam long ol tempol bae oli save mekem ol samting i defdefren. Be nomata long hemia, bae i gat ol pipol blong helpem yu long evri step long rod blong yu insaed long tempol. !Tingbaot se tempol i haos blong Lod, mo Hem i glad tumas blong gat yu long ples ia!
Ol pikja droing oli kam long Mark Robison