Tempol Buk blong Mi blong Dro

!Halo!

Nem blong mi Brayden, mo mi stap laef long Yuta YSA.

Bae mi talem long yu abaot wan gol we mi bin mekem taem mi bin gat 10 yia.

I bin stat long wan trip we mi tekem blong visitim bubuman mo bubuwoman blong mi. Bubuman mo woman, tufala i gat ol buk blong tempol long siting rum blong tufala, mo mi laekem tumas blong stap lukluk long ol pikja. Mi disaed se mi wantem blong mekem wan tempol buk blong miwan. Mi mekem wan gol we bae i nidim longfala taem blong droem evri tempol.

Mi disaed blong droem fas tempol blong mi. Mi karem pensel, lukaotem wan pikja onlaen, mo droem St. George, Yuta, YSA. Afta, mi droem Logan Yuta Tempol mo Manti Yuta Tempol. Mama blong mi i givim tingting se bae mi yusum wan bigfala buk blong dro blong ol tempol blong mi. Naoia, wan yia mo haf yia i pas, mi stap long tempol namba 81, Reno Nevada Tempol. !Mi gat 105 tempol yet i stap blong droem!

I gat ol taem we mi wantem blong givap long ol tempol we mi stap droem. Taem hemia i hapen, mi laekem blong talem wan prea mo askem long Papa long Heven blong helpem mi blong go tru long hat pat.

Samtaem, samting we i naes tumas abaot gol ia i olsem wanem i bin helpem ol tri yangfala brata blong mi blong lavem tempol moa. Smol brata blong mi Kade i droem ol tempol we hem i wantem blong visitim wan dei, mo ol narafala brata blong mi oli dro ol tempol blong ol tija mo ol fren.

Gol blong mi i bin helpem mi tu blong faenem sam long ol narafala samting we mi intres long olgeta. !Mi laekem tumas blong mekem ol disaen! Mi stat blong stap krietem ol 3D tempol model las sama, mo mi hop blong kam wan akitek taem mi groap.

Gol ia i bin helpem mi blong filim moa kolosap long Papa long Heven mo Jisas. Enitaem we mi droem wan tempol, mi filim Spirit. Mi save se ol tempol oli ol haos blong God. I no longtaem i pas, mi bin save go insaed long Payson Yuta Tempol mo ol narawan. Mi filim Spirit i strong tumas taem mi mekem ol baptaes long tempol.

Enitaem we mi luk wan tempol, hem i helpem mi blong kam stap moa strong blong stap jusum raet.

Ol droing i kam long Brayden B.