“Skripja Sansaen blong Maja,” Fren, Novemba 2024, 14–15.

Skripja Sansaen blong Maja

I kam long Maja Kralj mo Noelle Lambert Barrus

(I kamaot long wan tru stori)

“Mi no save sapos mi gat wan fevret skripja o nogat,” Maja i talem.

Stori ia i tekples long Slovenia.

Maja i sidaon long ol step blong haos blong hem mo putum fes blong hem i spel antap long han blong hem. San i stap saen we i gud tumas, ol saen blong laet i kamtru long ol tri. Ea i smel olsem ol fres nidel lif blong ok tri.

Mama i kamaot mo sidaon narasaed long Maja. “?Yu stap tingting long wanem?”

“Bae mi mas serem fevret skripja blong mi long Praemeri,” Maja i talem. “Mi no gat wan fevret wan. Mo mi no save wijwan blong jusum.”

Mama i saksakem hed blong agri. “Blong stap jusum wan fevret skripja i had.” Hem i lukluk i go long ol tri afta, i stanap. “Mi gat wan aedia.”

Mama i gobak insaed. Taem hem i kambak, i stap holem skripja blong hem. “Bae yumitu stat wetem wan stori. ?Wanem fevret skripja stori blong yu?”

Mama mo pikinini gel blong hem tufala i stap ridim Buk blong Momon

Maja i tingting abaot hemia. “Mi laekem hemia we Jisas i bin visitim Ol Man blong Nifae.”

Mama i tantanem ol pej blong Buk blong Momon. “Stori ia i stat long 3 Nifae.” Hem i poen i go long pej. “Bae yumitu wanwan i gat janis blong stap rid mo jusumaot ol ves we yumitu laekem.”

Maja i saksakem hed blong agri mo lisin taem Mama i rid. Hem i rid abaot Jisas Kraes we i stap singaotem ol disaepol blong Hem. Hem i rid abaot ol man blong putum pis mo prea.

Afta, taem blong Maja nao. Taem hem i finisim wan long ol ves, hem i stop smol. Hem i filim olsem se san i stap saen gud tumas we i inaf blong fulumap hat blong hem.

Hem i lukluk i antap long mama. “Mi laekem hemia ia.”

“Mi tu.” ?Wanem nao yu laekem abaot hemia?” Mama i askem.

Maja i leftemap tufala solda blong hem blong soem se hem i no sua mo semmak taem i stat blong smael. “Hem i abaot Jisas. Mo i mekem mi filim glad nomo.”

Mama i smael. “Hemia i wan gudfala wei blong save se yu bin faenem wan fevret skripja. ?Yu wantem blong serem hemia ia long Praemeri?”

Maja i saksakem hed blong hem blong agri wetem bigfala glad. “?Bae yu helpem mi blong lanem abaot hemia?”

“!O Yes!” Mama i talem.

Mama mo Maja tufala i praktisim wan toktok wanwan taem. Long taem we tufala i stap mekem, ol pijin oli stap toktok long ol tri, olsem se oli stap lanem tu.

Ful wik, Maja i i gohed blong stap praktisim niufala fevret skripja blong hem. Long Sandei moning, hem i stap blong wari smol. Hem i praktis blong stap talem skripja blong hem long longfala rod blong go long jos.

I gat sam pikinini nomo long Praemeri blong Maja. Be taem hem i wokbaot i go insaed long klasrum, Maja i filim ol miks filing insaed long bel blong hem.

Taem we i taem blong hem blong serem, Maja i stanap mo pulum wan longfala win. “Luk, mi mi loa, mo laet,” hem i talem. “Lukluk long mi, mo stap strong kasem en, mo bae yufala i laef, from long hem we i stap strong kasem en, bae mi givim laef we i no save finis.”

Taem Maja i finis, hem i sidaon mo smael. !Hem i bin mekem! Ol miks filing ia blong wari oli lus, mo wom mo filing blong sansaen i kambak. Hem i bin save se fevret ia bae i karem i kam filing ia long enitaem we bae i nidim.