?Mi Mi Mas Kam Stret Gud Evriwan?

Henry i wokbaot sloslo i go insaed long Praemeri rum. Hem i filim leg blong hem i hevi taem hem i kasem jea blong hem.

Tija blong hem brata Rass i smael long hem. “?Yu yu rere blong tokbaot ol tempol?” hem askem.

“Yes,” Henry i ansa.

?From wanem mi talem olsem? Henry i tingting taem hem i stap sidaon. Hem i no filim se hem i rere. Nating.

Praemeri blong Henry i blong stap lanem singsing ia “I Love to See the Temple [Mi Laekem Tumas blong Luk Tempol].” Oli bin askem klas blong hem blong tokbaot stap go long tempol.

Be Henry i filim nogud. Hem i wantem blong go long tempol taem hem i bigwan inaf, be hem i filim se hem i bin mekem tumas mistek.

Wan afta wan, ol fren blong Henry oli stanap. Oli bin hapi mo glad tumas taem oli tokbaot stap go long tempol wan dei. Henry i filim moa nogud.

Afta, naoia i taem nao blong singsing. Henry i singsing folem evriwan long Praemeri: “Bae mi rere long miwan taem mi yang; hemia i tabu wok blong mi.”

?Olsem wanem nao bae mi rere blong go long tempol taem mi mekem tumas mistek? Henry i tingting. Hem i skwisim hemwan i godaon long jea blong hem.

Singsing ia i en, brata Rass i muv i kam kolosap. “?Yu yu Oraet?” hem i askem Henry.

Henry i lukluk daon long tufala han blong hem. Henry i talem sloslo, “Mi wantem blong go long tempol be mi fraet se mi no klin inaf.” Hem i pulum longfala win. “Oltaem mi no stap no stap mekem gud samting insaed long famli blong mi. Mi foget blong mekem ol wok blong mi blong haos we oli talem long mi. Mi mekem tumas mistek. Be, ?Mi mi mas kam stret gud evriwan?”

Brata Rass i smael gud long hem. “Blong stap klin inaf blong go long tempol i no minim se yu mas kam stret gud evriwan. Yumi save stap klin inaf taem yumi stap trastem Jisas Kraes mo wetem tru hat, traem blong stap obei ol komanmen. Bae yumi mekem ol mistek, be yumi save sakem sin mo kam klin bakegen.”

Henry i sidaon stret smol bakegen.

“Mi mi save se Papa long Heven i glad tumas long yu blong stap traem blong stap gud,” brata Rass i talem.

Henry tingting abaot sam long ol gud samting we hem i bin mekem long wik ia. Hem kukum kaekae blong naet wetem mama, helpem sista blong hem wetem hom wok blong hem mo talem halo long wan niufala boe long skul.

Hevi blong ol wari blong Henry i stat blong kamaot. Hem i save se Tabu Spirit i stap helpem hem blong filim pis.

Taem we i taem blong Henry blong toktok, hem i smael mo stanap. “Mi wantem blong gohed blong stap sakem sin mo stap kam moa olsem Jisas Kraes mekem se wan dei mi save go insaed long tempol,” hem i talem.

Henry i filim glad tumas taem hem i sidaon. Wan dei bae hem i save mekem ol tabu kavenan wetem God insaed long tempol. !Hem i wantem blong mekem bes blong hem blong rere!

Pikja droing i kam long Gail Armstrong