Gikan sa YA Matag Semana
3 ka Pangutana nga Ipangutana sa Imong Kaugalingon Atol sa Hinapos sa Semana nga Kinatibuk-ang Komperensiya
Kini nga mga pangutana makatabang nimo sa pagtutok kon unsay gisulti sa Dios kanimo.
Isip mga disipulo ni Jesukristo ug mga miyembro sa Iyang Simbahan, makakaplag kita og mga tubag sa atong labing kinasingkasing nga mga pangutana atol sa kinatibuk-ang komperensiya.
Nahitabo na kini nako sa daghang higayon!
Hinuon, dunay mga higayon usab dihang dili ko segurado kon unsay ipangutana o unsaon nga ang komperensiya mahimong mas personal.
Importante ang pag-andam sa atong mga hunahuna, mga kasingkasing, ug mga panimalay aron maminaw sa atong mga lider niining sagrado nga hinapos sa semana, apan unsaon kon dili ta segurado kon unsay ipangutana?
Kon mao kana, aniay tulo ka sugyot nga tingali makatabang nimo nga makakaplag sa giya nga imong gipangita:
1. Unsay Akong Gibuhat nga Maayo?
Samtang magsingabot ang komperensiya, sayon ra kaayo nga makatutok sa unsay wala nimo mabuhat sa insakto. Apan ang mga mensahe gikan sa mga lider dili angay nga makapaluya nimo—ang Langitnong Amahan ug si Jesukristo ganahan nga modasig sila nimo. Kini nga mga mensahe makatabang nimo nga makakita sa imong mga kalig-on, mopalambo ibabaw niini, ug magpadayon sa pagdala sa kahayag sa Manluluwas sa imong kinabuhi.
Si Elder Patrick Kearon sa Napulog Duha ka Apostoles bag-ohay lang nagtudlo: “Ang tuyo sa mahinungdanong plano sa kalipay sa Amahan mao ang [inyong] kalipay, dinhi, karon, ug sa kahangtoran. Dili kini ang pagpugong sa inyong kalipay ug makapahimo hinoon kaninyo nga mabalaka ug mahadlok.”
Unsay imong gibuhat nga maayo? Unsay nagdala nimo og kalipay? Giunsa nimo pagdala og kalipay sa uban?
Ikonsiderar kon giunsa nimo pagtuman sa imong calling, bisan kon kulang ang imong oras. Tingali may tinguha ka nga mogahin og oras sa mga kasulatan, bisan kon dili permi ang imong pagtuon. Tingali ang inadlaw nga paghinulsol nakatabang nimo nga makasabot sa Pag-ula sa Manluluwas ug kon sa unsang paagi ka gitabangan Niya sa “pag-uswag sa hinay-hinay” (Mosiah 21:16). O tingalig bag-ohay lang nagmapailobon ka sa tawo nga dili maayo og pagtagad nimo.
Mas maayo ang imong kalamboan kay sa imong gihunahuna, higala.
Kanunay nga adunay luna sa pagtubo ug paglambo, apan samtang maminaw ka sa tibuok hinapos sa semana, tutoki ang imong mga kalig-on ug unsaon nimo paggamit ang imong kaayo, sa imong mga talento, ug imong mga kapabilidad sa pagpanalangin sa uban ug sa pagpadayon nga mahimong sama sa Manluluwas.
2. Unsay Akong Madugang ug Unsay Akong Matangtang sa Akong Kinabuhi?
Ang pagpaminaw sa daghang oras nga pagdapit ug pagpangitag paagi sa paggamit niining tanan medyo may pagkabug-at. Hinuon ang atong mga lider wala maghangyo nimo nga buhaton kining tanang kausaban sa diha-diha dayon.
Gani, si Presidente Russell M. Nelson nagtudlo: “Ang ebanghelyo ni Jesukristo mao ang ebanghelyo sa paghinulsol. Tungod sa Pag-ula sa Manluluwas, ang Iyang ebanghelyo naghatag og usa ka pagdapit nga kanunayng mag-usab-usab, maglambo, ug mamahimong mas putli. Kini usa ka ebanghelyo sa paglaom, sa pagkaayo, ug sa pag-uswag. Mao nga, ang ebanghelyo usa ka mensahe sa hingpit nga kalipay! Ang atong mga espiritu magmaya sa ginagmayng kalamboan nga atong mabuhat.”
Kon maminaw sa mga mensahe sa komperensiya, ikonsiderar ang pagtutok sa unsay maayo nga imong ikadugang ug unsay imong masugdan sa pagtangtang gikan sa imong kinabuhi, usa ka lakang sa matag higayon. Tingali ganahan kang mogahin og gamay nga oras sa social media ug daghang panahon sa pagbasa sa mga kasulatan. O tingali ganahan ka nga mogahin og mas daghang oras sa templo ug gamayng oras sa sopa.
Samtang mag-ampo ka sa Langitnong Amahan alang sa giya ug tabang, Iyang ipakita nimo unsaon sa pagsugod niining ginagmay ug yano nga mga lakang nga mogiya ngadto sa dakong kausaban ug, sa kataposan, dugang nga kalipay.
3. Unsa man ang Gusto sa Langitnong Amahan nga Akong Mahibaloan Karon Dayon?
Usahay ganahan ta nga hatagan sa Langitnong Amahan og tagsa-tagsa ka lakang sa matag desisyon nga angay natong buhaton. Ang Langitnong Amahan mas daghan kaayo og nahibaloan kay kanato, ug naglakip kana sa mga tinguha sa atong kasingkasing ug sa mga milagro nga atong gipangita. Niining tapos sa semana nga komperensiya, imbis nga mangayo og detalyado nga plano, tingali makatutok ka sa labing importanteng butang nga ganahan Niya nga imong mahibaloan karon dayon.
Paminaw og maayo sa mga pulong, hugpong sa mga pulong, ug sa mga tema nga motumaw sa matag sesyon. Isulat kini ug pag-ampo aron matabangan sa pagkahibalo unsa ang Iyang ganahan nga isulti nimo.
Si Elder Dieter F. Uchtdorf sa Korum sa Napulog Duha ka Apostoles bag-ohay lang nagpahinumdom sa mga young adult: “Moawhag ko kaninyo sa pagtuo nga ang inyong kinabuhi mas labi pang maayo kon mosalig kamo sa Dios nga mogiya sa inyong mga lakang. Nahibalo Siya sa mga butang nga posibling dili gayod ninyo mahibaloan, ug aduna Siyay giandam kaninyo nga umaabot nga posibling dili ninyo mahunahuna.”
Bisan unsang mga pangutana ang imong dad-on ngadto sa kinatibuk-ang komperensiya, hibaloi nga ang Langitnong Amahan ganahan nga makigsulti nimo. Kon imong ihatag Niya ang imong panahon, imong kasingkasing, ug imong sinsero nga atensiyon, tingali masorpresa ka kon unsa ang Iyang mensahe para nimo!