Ang mga Tuldok Magsumpay

Minahal kong kaigsoonan, minahal nga mga higala, gidala nako diha kaninyo ang gugma ug mga panalangin sa Unang Kapangulohan ug sa Korum sa Napulog Duha ka Apostoles.

Nalipay kaayo ko nga makig-uban ninyo ug malipayon kaayo nga aduna kitay kahigayonan sa pagpaminaw sa akong asawa.

Si Harriet mao ang kahayag sa akong kinabuhi. Ang tanang nakaila kaniya, nagmahal kaniya. Himoon niyang mas maayo ug mas malipayon kadtong anaa sa iyang palibot. Tinud-anay nga ingon niana ang iyang impluwensiya ngari kanako.

Sa inyong nadunggan gikan ni Sister Uchtdorf, naminyo mi nga batan-on pa kaayo. Karon, human sa daghang tuig mapasalamaton ko sa matag gutlo kauban si Harriet.

Paglabay sa panahon, nakat-onan nako nga kami nga anaa sa mas daang henerasyon adunay daghan sa samang mga pangutana ninyo mahitungod sa kinabuhi—lamang dugay na kaming nangutana niini. Mga pangutana sama sa:

Anaa ba ako sa saktong dalan?

Nakamatikod ba gayod ang Dios kanako? Nagpakabana ba Siya?

Nganong mobati man ko usahay nga haw-ang, nabug-atan, napasagdan, o nag-inusara?

Ngano nga ang Dios wala mohatag sa milagro nga gikinahanglan nako pag-ayo?

Nganong gitugotan man Niya nga makasinati ko niini nga kaguol, sakit, o trahedya?

Lisod kini nga mga pangutana sa bisan unsa nga panahon.

Ang mga pangutana nga sama niini makasagmuyo kaayo kon dili dayon kita makakuha og mga tubag. Sa atong panahon makapangutana kita sa Google og hapit sa bisan unsa ug makakuha og mga tubag sa mga segundo.

Apan ang mga tubag sa atong labing personal, importante, ug sa lapad og impluwensya nga mga pangutana dili kanunay moabot dayon. Kasagaran, atong bayawon ang atong mga kasingkasing ngadto sa langit, ug ang tanan natong makuha mao ang paghulat.

Dili kita gusto nga maghulat, sakto ba?

Kon maghulat kita og labaw sa pipila ka segundo sa pagresponde sa search engine, magtuo kita nga tingali naguba o naputol ang koneksyon. Sa atong kasagmuyo, basin hunungon pa gani nato ang pag-search. Apan kon kabahin na sa mahangtoron nga mga pangutana, kabahin sa kalag, kinahanglan kita nga mas magmapailobon.

Dili tanang tubag managsama og bili. Ang mga tubag nga gikan sa kalibotanong kaalam o sikat nga mga opinyon dali rang moabot, apan mawad-an ra dayon kini sa bili kon dunay motumaw nga bag-ong mga teyoriya ug mga uso. Ang langitnong mga tubag—mahangtorong mga tubag—bililhon kaayo. Ang pagdawat niini nga mga tubag kasagaran magkinahanglan og sakripisyo, buhat, ug pagbalikbalik.

Apan ipaneguro nako ninyo, nga kining mga tubaga angay gayod nga hulaton.

Kon aduna kamoy wala matubag nga mga pangutana, mopamatuod ko sa akong piho nga pagsaksi nga ang inyong Amahan sa Langit naminaw kaninyo, nakaila Siya kaninyo, ug dili gayod Siya motalikod kaninyo. Mao nga ayaw ninyo Siya talikdi. Padayon sa pagpaningkamot sa pagsunod sa Iyang pamaagi ug Siya “[mo]giya kaninyo” sa pagpangita og mga tubag nga adunay igo lang nga giya sa pagpadayon sa sakto nga direksyon—nga dili malimitahan ang inyong pagtubo o mga oportunidad nga makagamit og pagtuo o paggamit sa inyong moral nga kabubut-on.

Si Steve Jobs, kauban sa nagtukod sa Apple, sa makausa miingon: “Imposible ang pagsumpay sa mga tuldok nga magtan-aw sa unahan. Masumpay lamang ninyo kini pinaagi sa pagtan-aw sa luyo, mao nga kinahanglan nga mosalig kamo nga ang mga tuldok masumpay ra sa inyong umaabot.”

Unsay iyang buot ipasabot niana? Tingali nakakita kamo og mga painting nga gihimo pinaagi sa pagbutang og mga tuldok nga ginagmay nga mga pat-ak sa kolor diha sa luna. Kon padul-an og tan-aw, kini nga mga tuldok makita nga daw wala magsumpay ug pinasulagma. Apan kon inyong tan-awon ang tibuok painting, inyong makita kon sa unsang paagi ang mga tuldok mamahimong mga kolor ug kon sa unsang paagi ang mga kolor sa kataposan makahimo og mga porma nga mopakita og matahom nga desinyo. Ang daw kanhi pinataka ug gani makalibog mag-anam ra og kaklaro.

Usahay ang atong kinabuhi susama niini nga mga painting. Ang mga tuldok nga naglangkob sa atong mga kasinatian sa kinabuhi makita nga wala magkasumpay ug makalibog usahay. Dili nato makita ang bisan unsa nga kahan-ay niini. Dili nato mahunahuna nga kini adunay katuyoan.

Hinuon, kon motan-aw kamo sa inyong kinabuhi gikan sa mahangtorong panglataw sa ebanghelyo ni Jesukristo, magsugod kamo sa pagsabot sa unsang paagi nga ang mga tuldok nagsumpay sa talagsaong disenyo nga gihunahuna sa Dios alang kaninyo.

Ug samtang maningkamot kamo nga mosalig sa Dios ug mosunod sa Iyang Anak, si Jesukristo, sa umaabot inyong makita ang nahuman nga produkto, ug inyong masayran nga ang Hanas nga Artist may plano nang daan alang niadtong sulagma nga mga tuldok. Inyong makita nga nag-andam Siya ninyo alang sa mga oportunidad ug mga posibilidad nga labing mahimayaon kay sa inyong mahunahuna o makab-ot sa inyong kaugalingon. Nakita ko gayod kini sa akong kaugalingong kinabuhi.

Pipila kaninyo tingali nasayod nga sa gamay pa kaayo ko, ang among pamilya kaduha nahimong mga bakwit. Sa duha ka okasyon, naklaro kaayo nga ang mga tawo sa among bag-ong mga lokasyon mikonsiderar namo nga “ubos” kay kanila.” Sa mga bata nga akong kaedad, ang tonada sa akong sinultihan nagpaila nga ako dili taga-diha, ug dako kining tinubdan sa pagbiay-biay ug katawa alang kanila.

Lisod alang sa akong mga ginikanan ang pagsangkap alang sa among pamilya. Maong ang akong inahan nagsugod og pagpanglabada nga negosyo, mitabang ang tanan, ug ako, gamit ang bisikleta ug karomata, maoy nagsilbing “espesyalista sa paghatod ngadto sa panimalay” alang niana nga negosyo human sa eskwela.

Ang truma ug kahasol sa among pagbalhin-balhin nakahimo nako nga naulahi sa akong pag-eskwela, ug nalangan ko og usa gyod ka tuig.

Sa East Germany, gitun-an nako ang Russian isip ikaduhang pinulongan. Lisod kadto, apan nahimo ra nako. Karon, sa West Germany, gikinahanglan nako nga makat-on og Iningles.

Daw imposible kini alang kanako! Nagtuo ko nga dili gayod pwede ang akong ba-ba sa pinulongang Iningles.

Atol sa akong pagkatin-edyer, naibog ko sa labing talagsaong babaye nga dunay nindot nga dagkong brown nga mga mata. Subo lang, walay bisan gamay nga interes si Harriet kanako. Bisan unsang paningkamot, daw wala gyoy maayong oportunidad nga miabot. Aw, nakadungog na mo sa iyang bahin sa istorya.

Busa, ako, nga medyo walay hinungdan ug nanlimbasog nga batan-ong lalaki nga nagpuyo sa Germany human sa gubat nga daw wala kaayoy kahigayonan nga magmalamposon sa kinabuhi.

Hinuon, duna koy duha ka maayong mga butang nga pabor kanako.

Nasayod ko nga gihigugma ko sa akong pamilya. Sa eskwelahan ug sa simbahan adunay mga titser nga nagdasig nako nga kanunay nga himoong tag-as ang akong mga tumong ug dili mohunong. Makahinumdom gihapon ko sa dihang ang usa ka batan-ong Amerikano nga misyonaryo mitudlo, “Kon ang Dios dapig [kanimo], kinsay makigbatok [kanimo]?” Ug “mahimo sa Dios ang tanang butang.”

Adunay butang mahitungod niini nga mga kasulatan nga makahuloganon ug importante kaayo kanako. Ug kon tinuod kana, naghunahuna ko, nan nganong mahadlok man ko?

Busa mituo ko. Ug misalig ko sa Dios.

Sulod sa usa ka panahon, nag-aprentis ko. Usa sa akong mga magtutudlo mihagit nako nga moeskwela sa gabii aron magtuon og mechanical engineering. Migiya kini nako sa pagdiskobre sa akong pasyon sa pagpalupad og eroplano!

Nakurat kaayo ko sa dihang akong nasayran nga aron mahimong piloto kinahanglan kong makamao og Iningles. Gusto kaayo ko nga mahimong piloto, ug sa milagrosong paagi, ang akong ba-ba daw nausab, ug ang Iningles daw dili na imposible nga pinulongan.

Siyempre, wala kana magpasabot nga walay mga problema nga mahitabo.

Pagka-19 anyos nako, mibiyahe ko ngadto sa San Antonio, Texas, aron sugdan ang akong pagbansay sa pagka-piloto sa Air Force. Sa eroplano, nakatupad ko og tawo nga ang sinultihan bagâ nga tonada nga taga-Texas. Nakaamgo ko sa akong kakuyaw nga ang Iningles nga gihagoan nako pag-ayo nga makat-onan dili ang samang Iningles nga gipamulong nila sa Texas!

Lisod usab didto sa training school sa pagka-piloto. Programa kadto nga grabe ang kompetisyon, diin ang tanan nakigtigi alang sa pinakataas nga posisyon sa gradwasyon. Diha-diha dayon nasayod ko nga maalkanse ko kay kadaghanan sa akong mga klasmeyt lumad nga mamumulong sa Iningles.

Gipahimangnoan ko sa akong mga flight instructor mahitungod sa laing potensyal nga alkanse—migahin ko og daghang panahon sa simbahan. Ang lokal nga mga miyembro miabi-abi kanako sa ilang branch ug sa ilang mga panimalay, ug nagtukod pa gani kami og chapel sa Big Spring, Texas. Nabalaka ang akong mga magtutudlo nga ang maong mga kalihokan makadaot sa akong kahigayonan sa taas nga ranking. Wala ko motuo niini. Busa misalig ko sa Dios ug mihimo sa akong labing maayo.

Sa kataposan, nakat-on ko og Iningles (hinuon naningkamot gihapon ko niini). Nakompleto nako ang akong pagbansay sa pagkapiloto nga malamposon kaayo. Nahimo ko nga fighter pilot ug sa wala madugay usa ka airline captain. Ug kadtong matahom, brown og mata nga babaye nga akong gipangandoy? Aw, ania siya uban nako.

Mao nga hangtod ang tibuok hulagway mapadayag, ayaw papiog sa daghang dagko, lisod nga buluhaton sa kinabuhi. Hinumdomi nga ang dagko nga mga butang hinimo gikan sa gagmay nga mga butang. Kon mopasalig mo sa pagbuhat sa “gagmay ug yanong mga butang,” nga gipabuhat sa Dios kaninyo—ug buhaton ninyo kini sa tumang kakugi kutob sa inyong mahimo, ang dagkong mga butang mosunod.

Ang pipila niining “gagmay ug yanong mga butang” naglakip sa tinuyo nga inadlaw nga pag-ampo, pagtuon sa mga kasulatan, paghimo sa Dali, Sunod Kanako ug sa Alang sa Kalig-on sa mga Kabatan-onan nga kabahin sa inyong naandan, pagsunod sa Pulong sa Kaalam, pagsimba, ug pagbayad sa ikapulo ug mga halad, ug pagseguro nga kamo adunay balido nga rekomend sa templo.

Buhata kining mga butanga bisan og dili kamo gusto, bisan nagkinahanglan kini og sakripisyo. Ang sakripisyo maoy makapahimo niini nga sagrado, ug ang “pag-antos magdalag panalangin.”

Sa usa ka pagsabot, ang inyong “gagmay ug yano” nga mga sakripisyo mao ang mga tuldok sa inadlaw nga pagpakabuhi nga naghimo sa obra maestra nga painting sa inyong kinabuhi. Tingali dili ninyo makita kon sa unsang paagi ang mga tuldok nagsumpay karon, ug wala pa ninyo kinahanglana. Pagbaton lamang og pagtuo nga igo alang sa panahon nga inyong gipuy-an karon. Salig sa Dios, ug “gikan sa gagmay nga mga butang magagikan ang mga dagko.”

Sa nag-edad pa ko og sama kaninyo, wala koy ideya kon unsay mahitabo nako sa umaabot. Wala gayod nako makita ang bisan unsa nga tuldok nga nagsumpay sa akong atubangan.

Apan misalig ako sa Dios. Nagtuo ko nga kon buhaton nako ang akong labing maayo, ang Dios moatiman sa kauswagan sa kinabuhi sa tawo.

Ug gihimo Niya.

Nasayod Siya sa kataposan gikan sa sinugdanan samtang ako wala masayod.

Wala nako makita ang umaabot, apan nakita Niya.

Bisan niadtong mga panahon sa kalisod, nga nagtuo ko nga gipasagdan ko, anaa Siya uban kanako—nakita ko kana karon.

Sa Mga Panultihon, makita nato kini nga saad: “Salig sa Ginoo sa bug-os mong kasingkasing. Ayaw gayod pagsalig sa imong kaalam. Hinumdomi siya sa tanan mong buhaton ug tultolan ka niya sa matarong nga dalan.”

Moawhag ko kaninyo sa pagtuo nga ang inyong kinabuhi mas labi pang maayo kon mosalig kamo sa Dios nga mogiya sa inyong mga lakang. Nahibalo Siya sa mga butang nga wala ninyo mahibaloi, ug aduna Siyay giandam kaninyo nga umaabot nga labaw pa sa inyong posibleng mahunahunaan. Si Apostol Pablo mipamatuod, “Wala makita sa mata, … ni madungog sa dalunggan, … [wala] mosantop sa hunahuna sa tawo [unsay] gitagana sa Dios alang kanila nga nahigugma kaniya.”

Busa, pangutan-a ang inyong kaugalingon, “Makakaplag ba ko og igong pagtuo sa Dios? Andam ba kong mosalig nga nahigugma Siya kanako ug gusto nga mogiya sa akong dalan?”

Kon may pagtuo kamo nga sama kadako sa liso sa mustasa–tungod kay wala man kamoy igong pagtuo—bisan usa lang ka tinguha nga motuo—sugdi dinhi.

Nasayod ang Dios kon unsaon sa paghimo ang gamay nga mga liso ngadto sa dako nga mga kahoy. Buhata ang gagmay ug yano nga mga butang ug ang Dios “mopalambo kaninyo sa makadaghan ug magapanalangin kaninyo sama sa iyang gisaad kaninyo!”

Dili na kinahanglan nga mopalayo kamo sa kultura karon aron makadungog og nagkasumpaki nga mga tingog nga makapawala sa kadasig o gani mobiay-biay sa pagtuo sa Dios ug sa atong relihiyon.

Ang social media mopakusog sa maong mga tingog.

Dili lamang ang inyong henerasyon kansang pagtuo sa Dios gihagit ug gitamay. Daw kabahin kini sa mortal nga pagsulay alang sa tanang mga anak sa Dios.

“Kon kamo iya pa sa kalibotan,” miingon si Jesus ngadto sa Iyang mga disipulo, “higugmaon unta kamo sa kalibotan ingon nga iya sa kalibotan: apan gipili ko kamo gikan niining kalibotana ug kamo dili na iya sa kalibotan, …, busa nasilag kaninyo ang kalibotan.”

Maayo pang dawaton na lang ninyo ang kalagmitan nga sa higayon nga mopasalig kamo nga mosunod sa Manluluwas, kadtong nanagpuyo sa dako ug lapad nga gambalay dili mahiuyon—usahay, kusganon kaayo. Mosulay pa tingali sila sa paghadlok ug pagpakaulaw kaninyo.

Apan hinumdomi nga dili kamo manubag ngadto kanila. Manubag kamo ngadto sa Dios. Moabot ang adlaw, nga mobarog kamo sa Iyang atubangan aron manubag sa inyong kinabuhi.

Mangutana siya kon misunod ba kamo sa Manluluwas, kon gihigugma ba ninyo ang inyong silingan, kon tinud-anay ba kamong naningkamot nga magpabilin sa dalan sa pagkadisipulo ug motuman sa inyong mga pakigsaad.

Minahal kong batan-ong mga higala, karon ang panahon nga mopasalig ngadto kang Kristo ug mosunod sa Iyang dalan.

Moabot ang adlaw nga ang tanang anak sa Dios moluhod ug mokumpisal nga si Jesus mao ang Kristo, ang Manunubos, ang Manluluwas sa kalibotan. Masayod sila nga namatay Siya alang kanila.

Nianang adlawa maklaro nga ang Iyang tingog mao lang ang bugtong tingog nga importante.

Karon, samtang naghisgot kita sa pagtugot sa Dios nga mogiya sa atong kinabuhi, gusto nakong maklaro ang usa ka butang. Dili tingali kamo makagusto sa unsay akong isulti kaninyo. Kon mangutana kamo sa Dios kon unsay buhaton mahitungod sa mga desisyon sa inyong kinabuhi—lakip ang pipila ka importante nga mga desisyon—tingali dili Siya mohatag kaninyo og klaro nga tubag.

Ang tinuod mao nga usahay dili igsapayan sa Ginoo kon unsa ang inyong desisyon basta lang magpabilin kamo diha sa sukaranan nga mga pakigsaad ug mga baroganan sa gipahiuli nga ebanghelyo ni Jesukristo.

Adunay mga higayon nga ang Dios adunay piho nga dalan nga gusto Niyang inyong subayon. Adunay mga panahon usab nga mopasidaan Siya kaninyo batok sa piho nga mga pagpili tungod sa mga kakuyaw nga dili ninyo makita. Apan unya adunay mga panahon nga ang usa ka pangutana adunay daghang “sakto” nga tubag, ug makakaplag kamo og hingpit nga kalipay sa bisan unsa niini basta nagsunod kamo sa mahangtorong kamatuoran sa Dios.

Sa dihang nahitabo kini kang Joseph ug sa iyang mga kauban, ang Ginoo mihatag og makapaikag nga mga tubag samtang nagtinguha sila sa Iyang giya. Miingon Siya, “Dili kini igsapayan [ngari kanako].”

Dayon Siya midugang, “Pagmatinud-anon lamang.”

Tingali makasagmuyo ang pagkakadungog nga ang Dios dili gayod mohatag kaninyo og detalyado nga listahan sa inyong panaw sa kinabuhi. Apan gusto ba gayod kamo nga hatagan og direksyon sa matag detalye?

Gusto ba gayod kamo nga dunay mohatag kaninyo sa mga pangdiskarte [cheat code] sa kinabuhi sa dili pa ninyo kini mahunahuna sa inyong kaugalingon? Unsa man kana nga matang sa panimpalad? Dili ba kana motangtang sa inyong pagbati sa kalamposan? Unsaon man ninyo sa pagtubo ug pagdugang sa inyong pagsalig sa Ginoo ug sa inyong kaugalingon?

Sama sa gisulti sa Ginoo kang Oliver Cowdery, “Kinahanglan gayod nga imo kining tun-an og maayo sa imong hunahuna; dayon ikaw kinahanglan nga mangutana kanako kon husto ba kini.”

Ang Langitnong Amahan mihatag kaninyo sa Iyang plano, sa Iyang Pamaagi. Gihatag Niya kaninyo ang dako nga panglantaw. Ug gihatagan kamo niya og utok ug kasingkasing. Kon mosalig kamo Kaniya, motabang Siya kaninyo sa paggamit niining duha sa tukma nga paagi sa inyong paghimo og desisyon. Misalig Siya kaninyo sa paghimo sa labing maayong posible nga mga desisyon pinaagi sa pagsunod ni Jesukristo.

Sa daghang sitwasyon, ang mga desisyon nga inyong himoon nianang higayona dili tingali sama kaimportante sa unsay inyong buhaton human mahimo ang desisyon.

Pananglitan, ang manag-uyab tingali mopili nga magminyo bisan kon ang pipila sa mga sakop sa pamilya wala mokonsiderar kanila nga perpekto nga pagkaparis. Hinuon, dako ang akong paglaom sa maong magtiayon kon, human nahimo ang desisyon, magpabilin silang hingpit nga mapasaligon sa usag usa ug ngadto sa Ginoo sa tibuok nilang kasingkasing ug hunahuna. Pinaagi sa pagtratar sa usag usa pinaagi sa gugma ug kamabination ug sa pagtutok sa emosyonal, espirituwal ug temporal nga mga panginahanglan—pinaagi sa pagbuhat kanunay sa “gagmay” nga mga butang—kini mamahimo perpekto nga pagkaparis alang sa tanan.

Ang sukwahi, ikonsiderar ang magtiayon diin ang tanan naghunahuna nga napilian nila ang “perpekto” nga tawo ug dayon maghunahuna nga nahuman na ang lisod nga buhat. Kon mohunong sila sa pagpangulitawo, mohunong sa pagpakig-istorya sa usag usa, pasagdan ang ilang sagrado nga mga pakigsaad, ug mobalik ngadto sa garbo ug sa paghunahuna lamang sa kaugalingon, kini nga magtiayon anaa sa dalan padulong sa kasubo ug pagmahay.

Ang sama nga baroganan magamit sa mga pagpili sa panarbaho. Ako adunay dakong paglaom alang niadtong mipili sa dili kaayo inila nga trabaho apan naningkamot og maayo nga makakita og mga paagi sa paggamit sa ilang trabaho sa paghimaya sa Dios ug sa pagpanalangin sa Iyang mga anak.

Minos ang akong paglaom alang niadtong mopili og mga propesyon nga nindot paminawon, apan sa kadugayan, nawad-an nianang kadasig sa ilang balaan nga pagkatawo ug sa kaayohan nga makab-ot unta nila pinaagi sa pagserbisyo sa Dios ug sa Iyang mga anak sa samang higayon.

Ang Dios miandam og mahangtorong mga panalangin lapas sa inyong mahunahuna. Aron sa pagtabang ninyo nga modawat niini, mihatag Siya ninyo og mga sugo, sagrado nga mga pakigsaad, dinasig nga mapanagnaon nga tambag, sa gasa sa Espiritu Santo, ug moral nga kabubut-on. Sobra na kini aron mogiya kaninyo ngadto sa mortal nga kalipay ug mahangtorong kamaya. Labaw pa niana, ayaw pagpakawala sa paglaom kon makahimo kamo og desisyon nga dili kaayo maayo. Sa ingon niana kamo makat-on. Kabahin kana sa panimpalad!

Dili, ang mga panimpalad dili gayod hapsay gikan sa sinugdanan hangtod mahuman. Aduna gayoy mga maayo ug dili maayong mga butang nga mahitabo sa kinabuhi. Apan kon magmatinud-anon kamo kang Jesukristo, moisip sa Iyang maulaong sakripisyo isip usa ka gasa sa gugma ug paghinulsol nga paagi sa pagdawat niini, makaseguro kamo sa malipayong nga kataposan.

Tingali ulahi na ninyo kining makita, apan kon hinumdoman ninyo og balik ug mahibalo nga ang Ginoo wala gayod motalikod kaninyo, bisan mitugot Siya nga mohimo kamo og pipila ka desisyon alang sa inyong kaugalingon. Makita ninyo nga ang mga tuldok nagkasumpay.

Busa, unsa man ang akong gilaoman nga inyong mahinumdoman sa atong gigahin nga panahon karon?

Una, hibaloi nga ang mga tubag sa Dios sa inyong labing dakong mga pangutana tingali malangay ug tingali moabot kini sa mga paagi nga wala ninyo damha. Ang mga tubag sa Dios adunay mahangtorong bili. Angay lang kining paaboton.

Ikaduha, ayaw himoa nga bug-at ang inyong pagsubay sa dalan sa pagkadisipulo. Buhata lang labing maayo gamit ang gagmayng mga butang, ug mahan-ay ra ang dagkong mga butang.

Ikatulo, pagbaton og gamay nga pagtuo. Tuohi nga importante kamo sa Dios, nga nakakita Siya ninyo unsay dili ninyo makita, ug nga mogiya Siya kaninyo sa sakto nga dalan. Siya nahigugma kaninyo. Salig Kaniya.

Ikaupat, ayaw itugot nga ang makawala sa kadasig nga mga tingog makapugong kaninyo sa inyong panaw sa pagtuo. Hinumdomi, dili kamo manubag ngadto sa inyong mga kritiko. Manubag kamo ngadto sa inyong Amahan sa Langit. Ang Iyang mga hiyas importante.

Ikalima, tinguhaa ang giya sa Ginoo, ug kon moingon Siya, “Dili igsapayan ngari kanako,” himoa ang labing maayong mga desisyon nga inyong mahimo base sa mga kamatuoran nga inyong nahibaloan. Dayon “pagmatinud-anon.”

Ibilin nako ang akong panalangin kaninyo sa pagsugod niining bag-ong tuig, nga samtang kamo tinud-anay nga maningkamot nga makaila sa inyong Langitnong Amahan, mosunod ni Jesukristo, ug motahod sa Iyang mga pakigsaad, ang inyong pagtuo modako.

Ang inyong pagsalig motubo samtang magtinguha kamo sa pagsunod sa inyong Manluluwas ug sa Iyang mga pagtulun-an.

Kang Jesukristo, sa Iyang ebanghelyo, ug sa Iyang Simbahan, makakaplag kamo og kalipay, kamaya, ug kalinaw! Ug moabot ang adlaw, gakson kamo Niya pinaagi sa balaan nga gugma.

Uban sa dili matukib nga pasalamat, inyong makita nga ang Dios Mismo, sa Iyang dakong gugma, grasya, ug kaluoy, anaa kanunay nagbantay kaninyo, nagpanalangin kaninyo, ug nag-andam og dapit alang kaninyo.

Niini ako mopamatuod ug mobilin kaninyo sa akong panalangin pinaagi sa ngalan ni Jesukristo, amen.