Salig sa Dios

Minahal nakong kaigsoonan, minahal nakong batan-ong mga higala, gibati nako ang dakong gugma alang ninyo samtang gihanduraw kamo diha sa mga dapit sa tibuok kalibotan. Nindot kaayo mong tan-awon. Matahom kamo. Ganahan kong mogakos sa matag usa ninyo.

Nindot kaayo nga makauban kamo karon. Ganahan usab ko nga maanaa karon kauban ang akong paborito nga Apostol. Nakahibalo ko nga dapat wala kitay mga paborito, apan sa akong bahin, murag OK ra. Naminyo man ko ngadto niya.

Bag-ohay lang, nagsaulog kami sa among ika-62 nga anibersaryo sa kasal. Ug nahigugma gihapon kami sa usag usa!

Maghisgot bahin sa mga bunga sa ebanghelyo! Kon makadawat kami og mga mensahe sa pahalipay ug gugma gikan sa among mga apo ug mga apo sa tuhod, gibati namo unsa ka bililhon ang mga panalangin sa pagkamiyembro sa Simbahan ug sa ebanghelyo ni Jesukristo.

Kamong mga wala pa maminyo, nadiborsyo na, o nagpuyo sa mahagiton nga mga kahimtang sa pamilya, mopamatuod ko nga ang Dios nakaila ug nahigugma kaninyo, ug kon magpuyo mo nga matinuoron sa inyong mga pakigsaad, ang kalipay sa kinabuhi sa pamilya dili ihikaw gikan kaninyo. Wala gyod ko masayod unsaon kini, apan nasayod ko nga ang grasya, kaluoy, ug gugma sa Ginoo igo alang kanatong tanan. Iya kining ipahinabo sumala sa Iyang pamaagi ug sa Iyang panahon.

Kon motan-aw ko ninyo ug bation ang inyong maanindot nga kahayag sa kaayo ug kalig-on, napahinumdoman ko sa usa ka espesyal nga panahon dihang si Dieter ug ako nagdako sa sama nga branch sa Frankfurt, Germany.

Nahibalo ko nga naibog siya nako, apan wala gyod ko nainteresado. Buotan siya apan usa ra gyod sa akong mga higala sa Simbahan. Nakat-on mi og sayaw diha sa among mga kalihokan sa Simbahan. Mao kadto ang panahon sa foxtrot, boogie-woogie, ug rock and roll.

Human siya miapil sa Air Force aron mamahimong usa ka fighter nga piloto, wala na ko makakita niya sa hapit duha ka tuig. Sa pagkatinuod, pagbalik niya sa Frankfurt, ang akong unang impresyon dili kaayo positibo. Parehas siya sa hambogero nga mga lalaki sa salida nga Top Gun.

Apan sa dihang nakigsulti siya nako, medyo nakadayeg ko; klaro kaayong nakat-on gyod siya niadtong duha ka tuig. Nasayod siya unsa ang iyang gustong buhaton sa iyang kinabuhi, ug lig-on siya diha sa ebanghelyo. Determinado kaayo siya ug mamugnaon sa iyang mga paningkamot sa pagpangulitawo. Pipila ka bulan ang milabay, naminyo mi.

Minahal nakong batan-ong mga higala, wala gayod ako magmahay sa pagkonsiderar niya pag-usab isip potensyal nga ka-date bisan sa dili segurado nga unang impresyon.

Si Dieter mao ang hinigugma sa akong kinabuhi ug ang maayo kaayo nga amahan sa among mga anak ug lolo sa among mga apo.

Apan medyo nag-una na ko og gamay sa unsay akong ipakigbahin ninyo.

Sa dihang 12 anyos pa lang ko, mipanaw ang akong amahan tungod sa kanser. Human sa iyang kamatayon, ang among panimalay nahimong dapit sa kasubo, pag-antos, ug kawalay paglaom.

Murag wala na gayod, o walay bisan kinsa nga tawo, ang makahupay sa akong inahan o kanamo nga mga anak. Apan, dili kana tinuod! Ang atong Langitnong Amahan, sa Iyang dako nga gugma, wala malimot kanamo.

Walo ka bulan human mipanaw ang akong amahan, duha ka Amerikanong misyonaryo ang nanuktok sa among pultahan sa Frankfurt, Germany. Kadtong duha ka misyonaryo, giniyahan sa Espiritu, nagbilin og bililhon nga Basahon ni Mormon sa akong inahan. Ganahan kaayo ko sa Basahon ni Mormon.

Kining batan-ong mga misyonaryo nagdala kanamo sa mga tubag sa Dios. Ang mensahe sa plano sa kaluwasan, ang plano sa kalipay, nindot kaayo ug puno sa gahom. Kini nagdala pagbalik og paglaom ug kahayag sa among panimalay. Samtang among gihangop ang gipahiuli nga ebanghelyo, ang among mga kasakit sa dughan, kawalay paglaom, ug kasubo naayo.

Tungod sa mensahe sa gipahiuli nga ebanghelyo ni Jesukristo, wala nay kangitngit sa among pamilya, sanglit ang kahayag ug kangitngit dili man mahimong maanaa sa samang dapit sa samang higayon.

Kining duha ka misyonaryo duha ka buotan nga mga young adult. Alang namo, sila duha ka anghel sa himaya nga gipadala sa Dios.

Minahal kong batan-ong mga higala, hinimo kamo sa samang balaang materyal! Mga pinili kamo sa atong kapanahonan, kinsa pinaagi sa pulong ug sa buhat nagtudlo ug nagpuyo sa mensahe sa ebanghelyo bisan asa kamo. Niini nga katuyoan, gipahimutang kamo diha sa inyong siyudad, sa inyong eskwelahan o sa trabahoan, sa inyong pamilya. Ayaw kalimot, kamo adunay potensyal nga mahimong mga anghel sa himaya niadtong anaa sa inyong tupad.

Kamo nagrepresentar sa Simbahan ni Jesukristo, ug kamo kusganong mga lider sa pagsangyaw sa mensahe sa ebanghelyo pinaagi sa inyong maayong kinabuhi ug maisogong pagpamatuod.

Ang usa ka lider mao ang nagtabang sa uban nga makakita, makabati, ug makapangita sa tarong nga agianan. Minahal nakong batan-ong mga higala, tabangi ang usag usa nga makapangita sa tarong nga agianan ug ipadayon ang segurado nga kombiksyon nga tinuod ang Simbahan ug ang ebanghelyo.

Ang matag yano ug tataw nga pulong o buhat sa kaayo, kaligdong, gugmang putli, kabuotan, serbisyo, gugma, ug kapuangod mahimong inyong buhat sa pagka-lider sa gingharian sa Dios. Ayaw ipakaubos ang inyong maayong impluwensya ug gahom alang sa kaayohan.

Tugoti ko nga mopuno dinhi og pipila ka pulong sa atong bililhon nga mga sister. Niining lisod nga mga panahon, kamo gihangyo aron gamiton ang inyong mga talento ug kaisog diha sa panag-away tali sa maayo ug daotan.

Niadtong 1979, si Presidente Spencer W. Kimball nanagna: “Ang dakong pagtubo nga moabot sa Simbahan sa kataposang mga adlaw moabot tungod kay daghang buotang mga babaye sa kalibotan … mapaduol sa Simbahan sa tumang kadaghan. … Kini mahitabo sa kahimtang nga ang mga babaye sa Simbahan mopakita sa pagkamatarong …sa ilang kinabuhi … makita nga talagsaon ug lahi—sa malipayong paagi—gikan sa mga babaye sa kalibotan.”

Si Presidente Russell M. Nelson midugang niadtong 2015, “[Mga sister, kami] nagkinahanglan sa inyong kalig-on, sa inyong pagkakabig, sa inyong lig-on nga pagtuo, sa inyong abilidad sa pagpangulo, sa inyong kaalam, ug sa inyong mga tingog. Ang gingharian sa Dios dili ug dili gayod makompleto kon wala ang kababayen-an nga naghimo og sagradong mga pakigsaad ug mituman niini.”

Minahal kong mga kaigsoonan, ang Simbahan ug ang Ginoo nagtanyag kaninyo og gamhanang mga kapanguhaan aron sa pagpatuman niining inyong katuyoan sa kinabuhi.

Basaha ang mga kasulatan, hangopa ang Dali, Sunod Kanako ug ang mga programa sa institute, pakigsulti og tuyo sa Langitnong Amahan diha sa inyong mga pag-ampo, tambong sa simbahan, ug gamita ang mga kamatuoran sa ebanghelyo ug mga pagtulun-an sa inyong inadlaw-adlaw nga kinabuhi. Himoa ug tumana ang mga pakigsaad. Gamita ang paghinulsol aron makadawat og kapasayloan. Pagsalig sa Langitnong Amahan. Pagsalig ni Jesukristo. Mogiya Sila kaninyo. Nahigugma Sila kaninyo. Ug sila anaa didto.

Minahal kong batan-ong mga higala, palihog hibaloi ang akong gugma ug pasalamat alang sa matag usa kaninyo. Ang akong mga pag-ampo ug mga panalangin maanaa kaninyo. Kamo mahinungdanon nga bahin sa maanindot ug sagrado nga buhat sa Dios niini mismo nga panahon sa kasaysayan sa kalibotan. Niini ako mopamatuod, sa ngalan ni Jesukristo, amen.