Gikan sa YA Matag Semana

Nagkinahanglan og Mas Maayong Espirituhanon nga Kahimtang sa Pagdawat? Sulayi ang Pagmugna og Kahilom sa Imong Kinabuhi

Ni Shauna Jones Norton

Ang hilom nga mga gutlo makatabang nato sa paghawan sa atong mga hunahuna ug sa pagdapit sa Espiritu.

usa ka babaye nga nagkupot pataas sa iyang selpon ug naningkamot nga makakuha og mas maayong signal

Nakasulay ka na ba nga mibati nga murag nagsige ka og ampo ug walay nadawat nga tubag? Nangayo ka og mga tubag, kahupayan, o giya, apan murag ang Ginoo nagpakahilom lang?

Nakasulay na ko niana. Apan usahay maghunahuna ko—atol niadto nga mga higayon nga gibati nako nga ang Dios wala motubag nako, basin nagpadala Siya og mga tubag.

Basin wala lang ko sa saktong lugar sa pagdawat niini.

Ang Gahom sa Hilom nga Panahon

Bag-ohay lang, naminaw ko sa usa ka pakigpulong diin si Presidente M. Russell Ballard (1928–2023) namulong ngadto sa mga young adult. Misulti siya og usa ka butang nga nakapatandog nako:

“Kamo ba adunay personal nga panahon sa kahilom? Naghunahuna ko kon kadtong kinsa nabuhi sa nangagi adunay mas daghang oportunidad kay sa kanato karon nga makakita, makabati, ug makasinati sa presensya sa Espiritu sa ilang kinabuhi.

“Ingon og, samtang ang atong kalibotan mas nagkahayag, mas nagkalangas, ug mas nagkapuliki, kita adunay mas dakong hagit sa pagpamati sa Espiritu sa atong mga kinabuhi. Kon ang inyong kinabuhi walay panahon sa kahilom, buhaton ba ni ninyo … [sa pagtinguha niini]?”

Kadali lang, unsa?

Sa tanan nga gihangyo kanato nga buhaton, ang kahilom ingon niana ba ka importante? Nakuryoso ko, mao nga gusto ko nga mahibalo kon unsay gisulti usab ni Presidente Russell M. Nelson mahitungod sa hilom nga panahon. Mitudlo siya:

“Kita makagamit sa atong panahon sa pagpaminaw sa Ginoo nga naghunghong sa Iyang paggiya, paghupay, ug kalinaw. Ang hilom nga panahon usa ka sagradong panahon—panahon nga mopahiluna og personal nga pagpadayag ug motisok og kalinaw.

“Disiplinaha ang inyong kaugalingon nga makabaton og panahon sa pag-inusara ug uban sa inyong mga minahal. Ablihi ang inyong kasingkasing ngadto sa Dios diha sa pag-ampo. Paggahin og panahon nga inyong isubsob ang inyong kaugalingon diha sa mga kasulatan ug mosimba diha sa templo.”

Mao nga ang hilom nga panahon mahinungdanon. Apan unsaon man nga mahimo kana?

Pagpalambo sa Imong Kahimtang sa Pagdawat

Adunay higayon sa akong kinabuhi nga mibati ko nga walay koneksiyon sa Langitnong Amahan. Bisan kon nag-adto ko sa templo, nag-ampo, ug nagbasa sa mga kasulatan, mibati gihapon ko og kabug-at. Akong naamgohan nga naghimo ko sa importante nga espirituwal nga mga butang, apan wala magtugot og hilom nga panahon sa akong kinabuhi aron tinuoray nga mamalandong sa akong koneksiyon ngadto sa Langitnong Amahan. Nakadesisyon ko nga mosulay sa lawom nga pagpamalandong [meditation]—nga mohunong og kadali gikan sa kalibotan ug palamboon ang akong pagpamati sa Espiritu.

Human nga ako misugod sa paggahin og hilom nga panahon sa lawom nga pagpamalandong ug misulay sa pagkonektar ngadto sa Langitnong Amahan ug ni Jesukristo, mibati ko og dakong kausaban sa akong abilidad sa pag-ila sa Ilang giya sa akong kinabuhi. Ako usab mibati nga mas malinawon ug malipayon sa akong mga kahimtang.

Si Bishop L. Todd Budge, Ikaduhang Magtatambag sa Presiding Bishopric, mipamatuod, “Ang pagkamalinawon … nagkinahanglan og labaw pa kay sa paggahin og panahon sa Ginoo—nagkinahanglan kini sa pagwagtang sa atong madudahon ug mahadlokong mga hunahuna ug itutok ang atong kasingkasing ug hunahuna ngadto Kaniya.”

Kon gusto ka pa og dugang nga kahilom sa imong kinabuhi ug mokonektar ngadto sa Langitnong Amahan ug ni Jesukristo, ang pagpamalandong sa imong mga kasulatan, paggahin og panahon sa templo, ug inadlaw nga pag-ampo mao ang maanindot nga mga paagi sa pagpaminaw Kanila. Mahimo usab ka nga mogahin og laing mga gutlo sa kahilom pinaagi sa mga buluhaton sama niini:

Magsugod sa ginagmay: Pangita og hilom nga lugar nga dili ka madisturbo, ug molingkod sulod sa pipila ka minuto, magtutok sa pagginhawa og hinay.
Mopili og paborito nga kasulatan: Himoa ang kasulatan ngadto sa yano nga hugpong sa mga pulong nga balikbalikon sa imong hunahuna samtang maghimo ka og lawom nga mga pagginhawa.
Magpatukar og hinay nga musika: Paggamit og makapakalma nga musika aron matabangan ka nga marelaks ang imong lawas ug makalma ang imong hunahuna.
Mogahin og panahon nga walay koneksiyon sa kalibotan: Maglakaw o molingkod sa kinaiyahan nga dili maminaw sa bisan unsa nga musika, mga podcast, o mga audiobook. Magtutok lang sa pagtan-aw sa matahom nga mga nilalang sa Dios, mamalandong, ug mag-ampo.

Pagpaminaw sa Iyang Tingog

Kon mibati ka nga naglisod sa pagpaminaw sa tingog sa Ginoo, hinumdomi—usahay wala kita sa lugar sa kahilom, sa mental o sa pisikal nga paagi, aron sa pagpaminaw Kaniya sa klaro nga paagi. Ug may mga higayon, bisan gidugangan pa ang kahilom, usahay ang Langitnong Amahan nagkinahanglan lamang nato nga kita mapailobon nga maghulat sa Iyang kabubut-on. Bisan pa man niana, ang panahon sa kahilom makapalambo sa atong kahimtang sa pagdawat Kaniya ug makatabang kanato nga motubo nga masaligon sa atong balaanong pagkatawo, sa atong katuyoan, ug sa atong hugot nga pagtuo.

Nagkinahanglan kita kanunay og gamayng panahon sa kahilom sa pag-ila sa giya sa Ginoo. Paggahin og panahon sa pagdala og kahilom nganha sa imong kasingkasing ug hunahuna aron makapaminaw ka Kaniya.