Paggamit sa Doktrina ug mga Pakigsaad nganha sa Inyong Kinabuhi

Sa mga Panahon sa Kangitngit ug Kalisod, Pangitaa ang Kahayag

Ni Alison Wood

Mga Magasin sa Simbahan

Ang ngitngit nga mga bahin sa kinabuhi maghatag nato og oportunidad nga “mangita” ug mopasalamat sa kahayag sa Ginoo.

usa ka young adult nga babaye nga naggunit og teleskopyo nga nagtan-aw sa kalangitan

Kon ako modibuho og hulagway sa usa sa labing lisod nga mga panahon sa akong kinabuhi, tingali daw sama kini tan-awon sa ngitngit nga kalangitan—kadaghanan ngitngit, apan adunay nagkatag nga gagmay kaayo, nagkidlap nga mga pat-ak sa kahayag.

Kon moingon ko nga kadto usa ka ngitngit nga panahon, nagpasabot ko niana sa literal nga paagi. Kanunay nga naglabad ang akong ulo ug adunay mga migraine nga mograbe kon mabantang sa hayag, busa akong gigahin ang daghang panahon sa sulod nga walay suga. Magluto ko og pagkaon pinaagi sa gamayng hayag nga milapos gikan sa kurtina sa bintana sa akong kusina. Akong pahinayan ang kahayag sa screen sa akong kompyuter nga hapit wala na kon maghimo ko sa akong homework.

Ang kalibotan—ug ang akong espiritu—ingon og ngitngit ug dulom.

Sa pagtandi, niadtong mga adlaw nga mibati ko nga himsog daw dili katuohan ang kahayag. Nahinumdom ko nga miadto sa gawas, nga hayag kaayo ang adlaw, ug hapit dili makatuo kon unsa kanindot ug kamaya ang kalibotan.

usa ka gabii nga puno sa bituon ang kalangitan

Ang Kangitngit nga Moabot sa Dili Pa ang Kahayag

Dili lang ako ang nakasinati og mga panahon sa literal ug sa masambingayon nga kangitngit. Atol sa iyang panan-awon sa kahoy sa kinabuhi, si Lehi nakakita og “hilabihan ka baga nga gabon sa kangitngit” (1 Nephi 8:23). Si Joseph Smith mihulagway sa “baga nga kangitngit” nga mialirong kaniya sa dihang nagtinguha siya og tubag sa iyang pag-ampo (Joseph Smith Kasaysayan—1:15). Human sa kamatayon sa Manluluwas diha sa krus, “dihay kangitngit sa ibabaw sa yuta” (3 Nephi 8:19).

Sa matag usa niini nga mga panghitabo, usa ka lisod nga panahon sa kangitngit ang nahitabo sa wala pa ang mahinungdanon ug makapausab sa kinabuhi nga gutlo sa kahayag ug pagpadayag. Alang kang Lehi, ang kangitngit nga mialirong niadtong kinsa hapit na gayod moabot ngadto sa mahimayaong kahoy sa kinabuhi. Si Joseph Smith nakalingkawas gikan sa kaaway sa dihang ang “usa ka dako nga gilis sa kahayag … labaw sa kahayag sa adlaw” mipakita ibabaw kaniya (Joseph Smith Kasaysayan—1:16). Ug ang labing importante, ang Kahayag sa Kalibotan nabanhaw ug mibalik sa yuta human sa tulo ka adlaw nga kangitngit.

Niadtong 1833 ang nahauna nga mga Santos nag-atubang og usa sa labing ngitngit nga mga panahon sa kasaysayan sa moderno nga Simbahan. Ang mga manggugubot nga panon mipalayas nila gikan sa ilang mga panimalay, miguba sa ilang mga tanom ug kabtangan, ug gani mihimo og mga pagpanghulga sa pagpatay batok sa kadaghanan nila. Naghisgot bahin sa ilang mga kahimtang, ang Ginoo nagpasabot nila isip “gisakit, ug gilutos, ug gipapahawa” (Doktrina ug mga Pakigsaad 101:1).

Asa man ang kahayag nga ilang gikinahanglan?

Kita ba “Mangita” sa Ginoo?

Sa mga panahon sa kangitngit, adunay usa ka importante nga panahon sa dili pa moabot kana nga kahayag aron mohatag nato og kahupayan—usa ka panahon diin kita makakat-on sa pagsalig sa Ginoo ug sa pagsalig sa Iyang gahom. Lisod kini apan usa ka kini ka panahon sa paghimo og desisyon, diin kita mopili kon kita aduna bay hugot nga pagtuo aron maghulat “aron ang mga bukton sa [Dios] ipadayag” (Doktrina ug mga Pakigsaad 123:17).

Sa kasagaran, dili kita makapili kon unsa ang mga pagsulay nga atong atubangon, apan kita makapili kon unsaon nato kini pagtubag. Ug “ang kalamposan ug kalipay sa matag tawo, sa karon ug sa kahangtoran, nag-agad pag-ayo sa iyang mga tubag sa mga kalisdanan sa kinabuhi.”

Giunsa man niadtong nahaunang mga Santos sa pagtubag sa ilang mga pagsulay? Bisan kon ilang “gibaliwala” ang tambag sa Ginoo, nga miresulta niini nga kalisdanan, “sa adlaw sa ilang kasamok, sa panginahanglan nangita sila [Kaniya]” (Doktrina ug mga Pakigsaad 101:8).

Kon kita mag-atubang og mga panahon sa kangitngit ug kalisod, kita ba “mangita” sa Ginoo? Kita ba modangop paingon sa Iyang kahayag, o kita ba mopalayo Kaniya?

Sa Doktrina ug mga Pakigsaad 98, ang Ginoo naghatag nato sa unsay akong gikonsiderar nga tulo ka lakang sa pagdangop paingon Kaniya ug paglahutay sa mga panahon sa kangitngit:

Magpasalamat sa tanang butang (tan-awa sa bersikulo 1).
Mapailobon nga maghulat sa Ginoo (tan-awa sa bersikulo 2).
Magbaton og hugot nga pagtuo nga ang tanang butang makatabang sa imong kaayohan (tan-awa sa bersikulo 3).

Ug sa Doktrina ug mga Pakigsaad 101, ang Ginoo naghatag niini nga mga saad niadtong molahutay:

“Ug sila nga nagkatibulaag pagapundokon” (bersikulo 13).
“Ug silang tanan nga nagbangotan pagahupayon” (bersikulo 14).
“Ug silang tanan nga mitugyan sa ilang kinabuhi alang sa akong ngalan pagakoronahan” (bersikulo 15).

Mao kini ang saad sa Ginoo—nga ang atong mga pagsulay mamahimong kalipay. “Kay ang tanan niadtong dili molahutay sa pagpanton, apan molimod kanako, dili mabalaan” (Doktrina ug mga Pakigsaad 101:5). Ang kangitngit sa kalisdanan makapalambo sa atong kapasidad sa pagtinguha ug pagtagamtam sa kahayag.

usa ka hayag, matahom nga konstelasyon luyo sa teleskopyo

Pagpangita sa Katuyoan sa mga Pagsulay

Sa paghisgot og balik sa istorya bahin sa mga paglabad sa akong ulo tungod sa hayag, nahinumdoman nako ang adlaw nga nakadawat ko og panalangin atol sa unsay pinakagrabe nga migraine sa akong kinabuhi. Ug samtang kana nga panalangin nakahatag nako og paglaom nga ang akong kondisyon molambo, napanalanginan usab ko og kalig-on, pagtubo, mas dakong kaluoy alang sa uban, ug nadugangan nga kahibalo kon unsaon sa pagdumala sa akong mga paglabad sa ulo.

Nahimo kana nga kahayag nga akong gikinahanglan nianang higayona—usa ka saad nga ang akong lisod nga mga panahon mapuslanon. Ug bisan kon ang ebanghelyo ni Jesukristo wala magsaad nga kita makalikay sa tanang kalisdanan sa kinabuhi, nagsaad kini nga ang atong mga pagsulay adunay katuyoan. Pinaagi ni Kristo, ang atong mga pagsulay mao ang mga oportunidad alang nato nga mahimong mabalaan.

Busa hatagi og bili kadtong ginagmay nga siga sa kahayag sa imong kinabuhi. Tugoti nga ang handomanan sa matahom, puno sa kahayag nga mga panahon mopatunhay nimo latas sa mga panahon sa kangitngit.

Ug hinumdomi nga bisan kon ang ngitngit nga mga panahon sa mortal nga kinabuhi motabon kanato, ang Kahayag ni Kristo magamit nato kanunay.