Gikan sa YA Matag Semana

Himoong Makahuloganon ang Ginagmay nga mga Buluhaton: Unsaon Pagpangita og Kalipay sa Inadlaw nga Kinabuhi

Ni Madelyn Maxfield

Ang paghinayhinay ug pagkamahunahunaon sa katuyoan, bisan sa gagmay nga mga buluhaton sa kinabuhi, makatabang nimo nga mobati og dugang nga kalipay.

babaye nga nagpahiyom ug nagluto sa kusina

Dili gyod ko ganahan nga manghugas sa plato.

Kalas ni og oras, luod ang basa nga pagkaon, ug murag bag-ohay pa ganing nalimpyo ang banggera napuno na sad sa hugasan. Sa ubang adlaw, ang paghunahuna sa hugasan makaluya kaayo nga gusto nako nga dili nalang pud magluto.

Nakaseguro ko nga susama usab ang inyong gibati bahin sa usa sa inyong mga buluhaton, magpilo man sa linabhan, manglimpyo, og mag-vaccum sa balay. Walay paghusga dinhi.

Kon magsapawsapaw ang inadlaw nga buluhaton, o kon mawad-an ta sa panglantaw sa katuyoan sa espirituwal nga mga gimbuhaton, posibling mahimo kining balik-balik o dili makalipay. Tingali magsugod ka og pangutana sa imong kaugalingon kon aduna bay tumong niini. Si Presidente Nelson nagsulti, ‘Kon ang mga pagpamugos sa kinabuhi nag-abot diha kaninyo, paghunahuna og celestial!”

Apan may celestial ba gyod nga katuyoan sa matag ginagmay nga buluhaton?

Palayo ug Tan-awa ang Dakong Hulagway

Kon nakakita na mo og oil painting nga padul-an og maayo, sama sa mga buhat ni Claude o Vincent van Gogh, mabantayan ninyo nga ang tagsatagsa nga agi sa brush mohanap sa magsapaway sa magkabulingit nga mga tulbok ug mga badlis. Diha lamang kon mopalayo mo nga makita ninyo ang painting kon unsa gayod kini—usa ka matahom, hiniusa nga obramaestra.

Sa akong hunahuna mao kana ang kabahin sa gipasabot ni Presidente Nelson sa dihang mi-awhag siya nato sa paghunahuna og celestial. Kon mopalayo kita ug motan-aw sa dakong hulagway, masabtan nato og gamay kon sa unsang paagi nga ang ginagmay nga “mga agi sa brush” mohaom sa atong mahangtoron nga pag-uswag.

Si Elder Dieter F. Uchtdorf sa Korum sa Napulog Duha ka Apostoles mipaseguro kanato nga: “Sa umaabot inyong makita ang nahuman nga produkto, ug inyong masayran nga ang Hanas nga Artist may plano nang daan alang niadtong sulagma nga mga tuldok. Inyong makita nga nag-andam Siya ninyo alang sa mga oportunidad ug mga posibilidad nga labing mahimayaon kay sa inyong mahunahuna”

Ania ang akong pagsabot sa pagbaton og mas lapad nga panglantaw:

Kon dunay usa ka butang nga maghinam-hinam kaayo ko nga lutoon, apan ang mga gamit sa kusina nga akong gikinahanglan sa paghimo niini mga hugaw, dili nako igsapayan ang paghugas niini. Ang akong kahinam sa maayong pagkaon mopatigbabaw sa akong pagdumot sa paglimpyo sa mga kaldero ug kaha.

Apan labaw pa niana, nahibalo ko nga ang limpyo nga kusina makapaayo sa akong buot ug makapasayon sa akong pagbati sa Espiritu. Ang pagkat-on unsaon nga magpabiling hapsay karon makatabang usab nako nga mas maayong moatiman sa akong umaabot nga pamilya. Dugang pa, ang kanunay nga pag-atiman sa akong inadlaw nga mga buluhaton makatabang nako sa pag-ugmad og Kristohanong kalidad sa pagkakugihan.

Ang mga kasulatan nag-awhag kanato: “Busa, ayaw pagluya diha sa maayo nga buhat, kay kamo nagpahimutang sa tukoranan sa usa ka mahinungdanon nga buhat. Ug gikan sa gagmay nga mga butang magagikan ang dagko” (Doktrina ug mga Pakigsaad 64:33).

Ang inyong inadlaw-adlaw nga naandan nga buluhaton, sa temporal ug espirituwal, mao ang ginagmay nga mga butang diin ipabarog ang pundasyon sa imong kinabuhi. Ang pagtinguha sa pagsabot sa mga panalangin nga dad-on niini motabang nimo nga magmadasigon kanunay sa pagtuman niining inadlaw-adlaw nga mga buluhaton—ug magpalambo og bag-ong mga batasan—nga mobayaw nimo ngadto sa kahangtoran.

Paghinay-hinay ug Pagmanggihunahunaon sa Katuyoan

Usahay, ang pagpalayo lamang dili pa igo. Usahay, kinahang lang usab kita nga maghinay-hinay.

Gidesinyo kita aron molihok sa atong kaugalingon ug dili kay kontrolon sa uban (tan-awa sa 2 Nephi 2:26). Kon modangop ka sa Ginoo ug modumala sa imong kinabuhi imbis nga pagbut-an niini, mas dili kaayo ka mabug-atan sa imong inadlaw-adlaw nga lista, nga mohatag ninyo og mas dakong luna sa pangisip ug maghunahuna sa celestial nga paagi ug mobati og kalipay.

Ang paghunahuna sa katuyoan makatabang nimo nga molihok sa imong kaugalingon. Sulayi kini nga mga sugyot sa paghinay-hinay, pagpunting og balik sa tumong, ug pagdala og mahangtorong panglantaw sa imong matag adlaw nga kinabuhi:

Dimdima ang katam-is sa mga butang nga magdala nimo og kalipay.
Paghimo daan og mga desisyon. Ang simpli nga naandan nga mga buluhaton sama sa pag-impake sa imong backpack sa gabii pa lang makatabang sa imong buntag aron mabati nga dili kaayo magdali-dali.
Pangita og mga panahon sa kahilom aron makapamalandong, makapagaan sa gibati, ug makakonekta og balik ngadto sa Ginoo.
Pagpraktis og madasigon nga pagpasalamat pinaagi sa pagpasidungog ug pagpadayag og pasalamat sa mga maayong butang samtang manghitabo kini.
Pagmugna og mga dapit nga mabati nga nindot adtoan. Ang kahan-ay ug kalimpyo motugot nga maanaa ang Espiritu.

Mahimo Ikaw nga Magmalipayon

Bisan pa sa imong labing maayong mga paningkamot, may mga adlaw gihapon nga lisod makakaplag og kahulogan sa balik-balik nga mga buluhaton. OK ra Kana! Ang pagpaningkamot nga makatutok ngadto sa Manluluwas makatabang nimo nga madasig na usab.

Si Elder Patrick Kearon sa Korum sa Napulog Duha ka Apostoles nagtudlo, “Kita makaugmad og usa ka nagtubo ug nagapadayon nga pagbati sa hingpit nga kalipay ug kalinaw sa kahiladman tungod sa atong paglaom kang Kristo ug sa atong pagsabot sa atong kaugalingong dapit diha sa matahom nga plano sa kalipay.” Ang pagbaton kanunay og mahangtorong panglantaw ug ang pagtutok niana nga plano motabang nimo sa pagmintinar niana nga kalinaw, bisan kon ang kinabuhi dili maayo og mabati nga ngitngit.

Oo, may mga adlaw gihapon ko nga ang paghugas sa mga hugasan dili usa ka butang nga kahinaman (kon mabuhat man kini). Apan nahibalo ko nga ang akong paningkamot adunay kahulogan nga mas labaw pa kay sa pag-ihap lamang sa akong nabuhat. Nakatabang kana sa pagpalahutay nako sa labing bisi—o labing laay—nga mga adlaw.