Ang Tema niining Bulana: Kahimsog sa Pangisip

Kumusta, mga maayong magbabasa.

Una sa tanan, gihigugma mo namo, ang Manunubos naghigugma ninyo, ug hinaot nga inyong bation kana nga gugma samtang magbasa mo niini nga isyu.

Kon nagbasa mo niini, lagmit tawo gyod mo, buot ipasabot nga tingali nakaagi mo og kalisod kausa o sa ubang higayon.

Kon mao kana, nan seguradong adunay butang sa isyu niining bulana nga masabtan ninyo—kay ang tanan sa kalibotan nakasinati og kagul-anan, mga tintasyon, mga kahadlok, ug daghan pa. Ang dili maayo nga kahimsog sa pangisip sa kasagaran mopasamot sa kasamtangang mga hagit, ug ang Manluluwas nasayod kaayo sa mga epekto niini ngadto sa mga tawo.

Usa ko sa daghang tawo nga nanglimbasog sa mental nga sakit, ug samtang lisod kini, ang akong mga kasinatian nagtudlo nako nga ang pagdangop ngadto sa Manluluwas mao kanunay ang labing importanteng bahin sa bisan unsang proseso sa pagkaayo. Makatabang Siya nato, ilabi na kon atong gamiton ang espirituwal ug temporal nga mga himan nga atong magamit.

Bisan unsa pa ang inyong mga pakigbisog, ang pagdangop ngadto Kaniya ug tinud-anay nga pagkonsiderar kon unsa ang Iyang ipabuhat nimo mohatag og paglaom ug kalig-on sa pagpadayon. Nakakita ko, sa daghang higayon, sa gahom nga Iyang itanyag nato.

Ania ang pipila ka artikulo nga gilakip sa isyu niining bulana:

• Usa ka koleksiyon sa mga pangutana ug mga tubag mahitungod sa kahimsog sa pangisip

• Pipila ka tambag mahitungod sa kahilom ug pagpamalandong

• Istorya gikan sa usa ka young adult sa Canada nga nakigbisog sa pagbati og kabalaka nga ulahi na siya sa kinabuhi

• Pamaagi sa usa ka magtatambag sa pagtabang sa mga misyonaryo nga maandam ug makapatunhay sa ilang kahimsog sa pangisip samtang nagserbisyo

Kita usab adunay mga sugilanon nga kabahin sa atong padayon nga mga serye:

• Nagatuo Ako: Sa unsang paagi ang usa ka young adult nga nangita og komunidad nakakaplag sa ebanghelyo ni Jesukristo pinaagi sa usa ka Facebook group alang sa mga indibiduwal nga bungol

• Alang sa mga Inahan sa Gagmayng mga Bata: Mga panabot gikan sa usa ka inahan kon sa unsang paagi ang Ginoo kanunay nga nag-uban kanato, bisan sa tunga-tunga sa gabii

• Gikan sa Nataran sa Misyon: Tambag gikan sa kasamtangang mga misyonaryo bahin sa mga paagi nga ang umaabot nga mga misyonaryo makaandam sa pagserbisyo

• Paggamit sa Doktrina ug mga Pakigsaad sa Inyong Kinabuhi: Suporta alang sa inyong Dali, Sunod Kanako nga pagbasa mahitungod sa unsang paagi nga ang mga pagsulay makaayo kanato kon tinguhaon nato ang kahayag sa Ginoo

Ang Langitnong Amahan ug si Jesukristo naghigugma kaninyo, ug bisan pa sa mga pakigbisog nga atong giatubang, kita sa tinuoray gilalang aron makaangkon og kalipay.

Paglingaw sa inyong pagbasa!

Trent Hortin, Liahona Intern sa Digital nga Sulod