31. Efexus

Tej khoom puas tsuaj ntawm cov neeg Kilis lub tshav ua yeeb yam nyob hauv Efexus, uas yog qhov chaw tus Thwj Tim Povlauj qhia txoj moo zoo. Thauj cov vaj lug kub Phau Tshiab lub caij nyoog, Efexus muaj npe nto moo thoob plaws lub ntiaj teb vim muaj lub tuam tsev zoo nkauj heev uas yog ua los muab sam xeeb rau cov Neeg Loos tus poj niam tswv ntuj hu ua Alatemis. Tam sim no Efexus twb puas tsuaj tas, tiam sis thaum ub yog lub tuam nroog ntawm cov neeg Loos lub xeev uas hu ua Axias thiab yog ib qho chaw ua lag ua luam loj heev. Cov neeg ntaus nyiaj nyob hauv lub nroog tej kev ua lag luam vam meej heev vim lawv muag tus mlom Alatemis.

Tej Yam Tseem Ceeb uas Muaj Dhau Los: Tus Thwj Tim Povlauj mus xyuas Efexus thaum nws mus ua tub txib zaum ob yuav luag kawg (Teh. 18:18–19). Thaum nws mus zaum peb nws nyob hauv lub nroog tau ob xyoos. Nws raug yuam tawm hauv lub nroog mus vim cov ntaus nyiaj tsim kev kub ntxov ntau vim lawv poob lag luam thaum Povlauj qhuab qhia tawm tsam kev teev tiam tus poj niam tswv ntuj cuav Alatemis (Teh. 19:1, 10, 23–41; 20:1). Lub tshav ua yeeb yam nyob hauv Efexus yog lub loj tshaj plaws uas cov Neeg Kilis ua tau thiab yog qhov chaw uas Povlauj cov khub ntsib ib pawg neeg phem (Teh. 19:29–31). Povlauj sau ib tsab ntawv mus rau cov mej zeej ntawm lub Koom Txoos nyob hauv Efexus thaum nws raug kaw nyob hauv Loos. Ib ceg ntawm xya ceg ntseeg ntawm lub Koom Txoos nyob hauv Axias uas sau txog nyob hauv phau Tshwm Sim yog nyob hauv Efexus (Tsm. 1:10–11; 2:1).