15. Yelikaus

Daim duab no yog cov nroj tsuag nyob hauv Yelikaus niaj hnub no. Puag thaum ub ntawm no yog ib lub nroog uas muaj ntsa loog ib puag ncig nyob hauv lub hav ntawm tus Dej Yauladees, 252 mev qes dua li hiav txwv. Yog ib qho chaw zoo ua liaj ua teb uas muaj txiv ntoo qab zib thiab ntoo txiv kab ntxwv tawg paj txi txiv. Nyob nram qab yog qhov chaw uas txwm xav tias yog lub Roob ntawm Kev Ntxias (Mat. 4:1–11).

Tej Yam Tseem Ceeb uas Muaj Dhau Los: Nyob ze qhov chaw no, Yausuas thiab cov neeg Ixayees tau hla tus Dej Yauladees, nkag los mus rau hauv thaj av uas cog lus cia (Yas. 2:1–3; 3:14–16). Tus Tswv siv txuj ci tseem ceeb ua rau phab ntsa loog vau rau pawg tub rog Ixayees nkag tau mus hauv (Yas. 6; kuj saib Hen. 11:30). Yausuas foom phem rau lub nroog no (Yas. 6:26), es twb muaj li ntawd (1 Vnt. 16:34). Elisas kho cov dej Yelikaus (2 Vnt. 2:18–22). Tus Cawm Seej hla lub nroog no thaum Nws mus xyuas Yeluxalees zaum kawg, es Nws kho tus neeg dig muag Npatimes thiab nyob nrog Xakhais, tus neeg sau se (Mak. 10:46–52; Luk. 18:35–43; 19:1–10). Txoj kev ntawm Yeluxalees mus rau Yelikaus twb muab hais nyob hauv zaj lus piv txwv txog tus neeg Xamalis zoo (Luk. 10:30–37). (Saib QV Yelikaus.)