23. Hiav Txwv Kalilais thiab lub Roob ntawm cov Lus Foom Koob Hmoov

Ntsia mus rau qab teb sab hnub poob pom lub ceg kaum qaum teb sab hnub poob ntawm Hiav Txwv Kalilais, uas yog ib lub pas dej ntshiab. Lub toj uas nyob nruab nrab pem hauv ntej yog qhov chaw uas tib neeg ib txwm xav tias yog lub Roob ntawm cov Lus Foom Koob Hmoov. Kapena-us yog nyob ntawm sab laug, tsis pom hauv daim duab. Tinpelias nyob deb zog mus rau sab qab teb ntawm tus ntug dej sab hnub poob.

Tej Yam Tseem Ceeb uas Muaj Dhau Los: Thaum tus Cawm Seej qhuab qhia Nws tau siv sij hawm ntau nyob hauv thaj tsam no. Nyob ntawm no Nws tau hu thiab tsa Kaum Ob tug Thwj Tim (Mat. 4:18–22; 10:1–4; Mak. 1:16–20; 2:13–14; 3:7, 13–19; Luk. 5:1–11), qhia Zaj Lus Qhia Hais Pem Roob (Mat. 5–7), thiab qhia tej zaj lus piv txwv (Mat. 13:1–52; Mak. 4:1–34). Tej txuj ci tseem ceeb uas Nws ua muaj li no: Nws kho ib tug neeg mob ruas (Mat. 8:1–4); ua kom cua daj cua dub tu (Mat. 8:23–27); ntiab ib co dab phem tawm ntawm ib tug tub hluas, ces cov dab phem ntawd ho nkag mus rau hauv cov npua uas khiav mus poob tsag tsua rau hauv hiav txwv (Mak. 5:1–15); pub rau 5,000 tug neeg thiab 4,000 tug neeg noj (Mat. 14:14–21; 15:32–38); txib Nws cov thwj tim kom muab lawv lub vas ntaus mus rau hauv dej, los ntawm qhov no lawv mag ntses ntau kawg li (Luk. 5:1–6); kho neeg coob coob (Mat. 15:29–31; Mak. 3:7–12); thiab tshwm sim los qhia Nws cov thwj tim tom qab Nws txoj Kev Sawv Rov Los(Mak. 14:27–28; 16:7; Yhs. 21:1–23). (Saib QV Kalilais.)