24. Kapena-us

Kapena-us, uas nyob sab qaum teb ntawm ntug Hiav Txwv Kalilais, yog lub plawv ntawm Yexus txoj kev qhuab qhia hauv Kalilais (Mat. 9:1–2; Mak. 2:1–5). Yog ib qho chaw tseem ceeb rau kev nuv ntses thiab kev ua lag luam uas vam meej heev, puav leej yog qhov chaw nyob rau Lwm Haiv Neeg thiab cov Neeg Yudais huv tib si. Thawj ib puas xyoo tom qab Yexus yug los, tej zaum twb tsis muaj ntau tshaj 1,000 tug neeg nyob ntawm no. Kapena-us yog nyob ntawm qhov chaw uas tej kev ua lag luam tuaj sib tshuam, thiab muaj tej av uas zoo ua qoob loo nyob ib puag ncig. Cov tub rog Loos ua tau tej tsev da dej thiab tej tsev rau khoom nyob ntawm no. Txawm tias Yexus tau ua ntau yam txuj ci tseem ceeb nyob ntawm no, los cov neeg feem coob tseem xyeej tus Cawm Seej txoj kev qhuab qhia. Yog li ntawd Yexus foom tsis zoo rau lub nroog no (Mat. 11:20, 23–24). Tom qab no, Kapena-us raug puas tsuaj thiab tsis muaj neeg mus nyob.

Tej Yam Tseem Ceeb uas Muaj Dhau Los: Tib neeg hais tias Kapena-us yog tus Cawm Seej lub nroog (Mat. 9:1–2; Mak. 2:1–5). Nws tau ua ntau yam txuj ci tseem ceeb nyob hauv lub nroog no. Xws li, Nws kho neeg coob coob (Mak. 1:32–34), xws li ib tug thawj tub rog tus tub qhe (Luk. 7:1–10), Petus niam tais (Mak. 1:21, 29–31), tus neeg tuag tes tuag taw uas lawv muab nws lub txaj dauv mus rau hauv tsev (Mak. 2:1–12), thiab tus txiv neej uas qhuav tes (Mat. 12:9–13). Nyob rau ntawm no Yexus kuj ntiab tau coob tus dab phem tawm (Mak. 1:21–28, 32–34), tsa tau Yailus tus ntxhais sawv rov los (Mat. 9:18–19, 23–26; Mak. 5:22–24, 35–43), thiab hais zaj lus qhia txog cov mov uas cawm txoj sia nyob hauv lub tsev teev ntuj ntawm Kapena-us (Yhs. 6:24–59). Tus Cawm Seej qhia Petus mus nuv tau ib tug ntses nyob hauv Hiav Txwv Kalilais, muab tus ntses lub qhov ncauj rua, thiab muab tau ib lub nyiaj los them se (Mat. 17:24–27).