இயேசு கிறிஸ்துவின் சுவிசேஷத்தின் மறுஸ்தாபித செய்தி

• தேவன் நம்முடைய பரலோக பிதா, நாம் அவருடைய பிள்ளைகள். அவருடைய சாயலில் நம்மைப் படைத்தார்.

• தேவன் நம்மை தனிப்பட்ட முறையில் அறிந்திருக்கிறார், நம்மை நேசிக்கிறார்.

• மாம்சமும் எலும்பும் கொண்ட மகிமையான, பரிபூரண சரீரம் தேவனுக்கிருக்கிறது.

• நித்தியத்திற்கும் நிலைத்திருக்கும் சமாதானத்துடனும், நிறைவான மகிழ்ச்சியுடனும் தேவன் நம்மை ஆசீர்வதிக்க விரும்புகிறார்.

• தேவன் நம்மை நேசிப்பதால், பாவத்திலிருந்தும் மரணத்திலிருந்தும் நம்மை மீட்க தம்முடைய குமாரனாகிய இயேசு கிறிஸ்துவை அனுப்பினார்.

• தேவன் தீர்க்கதரிசிகளை பூமியில் தனது பிரதிநிதிகளாக அழைக்கிறார்.

• பண்டைய காலத்தில், தேவன் ஆதாம், நோவா, ஆபிரகாம் மற்றும் மோசே போன்ற தீர்க்கதரிசிகளை அழைத்தார்.

• இன்று நமக்குக் கற்பிப்பதற்கும் வழிநடத்துவதற்கும் ஒரு ஜீவிக்கிற தீர்க்கதரிசி தேவனிடமிருந்து வெளிப்பாட்டைப் பெறுகிறார்.

• இயேசு கிறிஸ்துதான் தேவ குமாரன்.

• தம்முடைய பூலோக ஊழியத்தின்போது, இயேசு தம்முடைய சுவிசேஷத்தைப் போதித்து அவருடைய சபையை ஸ்தாபித்தார்.

• இயேசு பன்னிரு அப்போஸ்தலர்களை அழைத்து, தம் சபையை வழிநடத்த அவர்களுக்கு அதிகாரம் அளித்தார்.

• இயேசு தம் வாழ்வின் இறுதியில், கெத்சமனே தோட்டத்திலும் சிலுவையில் அறையப்பட்ட போதும் தாம் அனுபவித்த பாடுகளால் நம்முடைய பாவங்களுக்காக பரிகாரம் செய்தார். இயேசு மரணத்திற்குப் பிறகு, உயிர்த்தெழுந்தார்.

• இயேசுவின் பாவநிவாரண பலியின் காரணமாக, நாம் மனந்திரும்பும்போது நம்முடைய பாவங்கள் மன்னிக்கப்பட்டு சுத்திகரிக்கப்படலாம். இது நமக்கு சமாதானம் தருகிறது மற்றும் தேவனின் பிரசன்னத்திற்குத் திரும்பவும் மகிழ்ச்சியின் முழுமையையும் பெறுவதை சாத்தியமாக்குகிறது.

• இயேசுவின் உயிர்த்தெழுதலின் காரணமாக, நாம் அனைவரும் மரித்த பிறகு உயிர்த்தெழுப்பப்படுவோம். இதன் பொருள் ஒவ்வொரு நபரின் ஆவியும் சரீரமும் மீண்டும் ஒன்றிணைந்து என்றென்றும் வாழும்.

• இயேசுவின் அப்போஸ்தலர்களின் மரணத்திற்குப் பிறகு, இயேசு கிறிஸ்துவின் சுவிசேஷம் மற்றும் சபையிலிருந்து ஒரு பரவலான வீழ்ச்சி ஏற்பட்டது.

• இந்த நேரத்தில், மக்கள் பல சுவிசேஷ போதனைகளை மாற்றினர். ஞானஸ்நானம் போன்ற ஆசாரியத்துவ நியமங்களையும் மக்கள் மாற்றினார்கள். ஆசாரியத்துவ அதிகாரமும் இயேசு ஸ்தாபித்த சபையும் இதற்குமேல் பூமியில் இல்லை.

• ஜோசப் ஸ்மித் எந்த சபை தேவனின் உண்மையான சபை, ஆகவே அவர் அதில் சேரலாம் என்பதை அறிய முயன்றார். பரலோக பிதாவும் இயேசு கிறிஸ்துவும் 1820 இல் அவருக்குத் தோன்றினர். இந்த நிகழ்வு முதல் தரிசனம் என்று அழைக்கப்படுகிறது.

• அவர் முந்தைய காலங்களில் தீர்க்கதரிசிகளை அழைத்ததுபோல, தேவன் ஜோசப் ஸ்மித்தை ஒரு தீர்க்கதரிசியாக இருக்க அழைத்தார்.

• இயேசு கிறிஸ்துவின் சுவிசேஷம் ஜோசப் ஸ்மித்தால் மறுஸ்தாபிதம் செய்யப்பட்டது.

• பிற பரலோக தூதுவர்கள் ஆசாரியத்துவத்தை மறுஸ்தாபிதம் செய்தனர், மேலும் இயேசு கிறிஸ்துவின் சபையை ஒழுங்கமைக்க ஜோசப் அதிகாரமளிக்கப்பட்டார்.

• இயேசு கிறிஸ்து இன்றும் ஜீவிக்கிற தீர்க்கதரிசிகள் மற்றும் அப்போஸ்தலர்கள் மூலம் தம்முடைய சபையை தொடர்ந்து வழிநடத்துகிறார்.

• மார்மன் புஸ்தகம் என்பது பண்டைய காலங்களில் அமெரிக்காவிலிருந்த தீர்க்கதரிசிகளால் எழுதப்பட்ட வேதத்தின் ஒரு தொகுதி ஆகும். ஜோசப் ஸ்மித் அதை தேவ வரத்தாலும் வல்லமையாலும் மொழிபெயர்த்தார்.

• வேதாகமத்துடன், மார்மன் புஸ்தகம் நமது இரட்சகராக இயேசுவின் ஊழியம், போதனைகள் மற்றும் பணி ஆகியவைபற்றிய சாட்சியை வழங்குகிறது.

• மார்மன் புஸ்தகத்தை வாசிப்பதன் மூலமும், அதன் கொள்கைகளைக் கடைப்பிடிப்பதன் மூலமும் நாம் தேவனுக்கு நெருக்கமாகலாம்.

• மார்மன் புஸ்தகம் தேவனுடைய வார்த்தை என்பதை நாம் அதைப் படிப்பதன் மூலமும், சிந்தித்துப் பார்ப்பதன் மூலமும், அதைப் பற்றி ஜெபிப்பதன் மூலமும் அறியலாம். ஜோசப் ஸ்மித் ஒரு தீர்க்கதரிசி என்பதை அறியவும் இந்த செயல்முறை உதவும்.

• ஜெபம் என்பது தேவனுக்கும் அவருடைய பிள்ளைகளுக்கும் இடையிலான இருவழி தொடர்பு.

• நேர்மையான ஜெபத்தின் மூலம், இயேசு கிறிஸ்துவின் சுவிசேஷத்தின் மறுஸ்தாபிதத்தின் செய்தி உண்மையானது என்பதை நாம் அறிந்து கொள்ளலாம்.

• நாம் ஜெபிக்கும்போது, பரிசுத்த ஆவியானவர் நமக்கு சத்தியத்தைப் போதித்து உறுதிப்படுத்துகிறார்.

தீர்க்கதரிசிகளை அழைப்பதுவும், அவர்களுக்கு ஆசாரியத்துவ அதிகாரம் கொடுப்பதுவும், அவருக்காகப் பேச அவர்களுக்கு உணர்த்துவதும் தேவன் நம்மீது தம்முடைய அன்பைக் காண்பிக்கும் ஒரு முக்கியமான வழி. தீர்க்கதரிசிகள் பூமியில் தேவனின் பிரதிநிதிகள். பழைய ஏற்பாட்டு தீர்க்கதரிசி ஆமோஸ், “கர்த்தராகிய ஆண்டவர் தீர்க்கதரிசிகளாகிய தம்முடைய ஊழியக்காரருக்குத் தமது இரகசியத்தை வெளிப்படுத்தாமல் ஒரு காரியத்தையும் செய்யார்” என பதிவு செய்தான். (ஆமோஸ் 3:7). ஜீவிக்கிற தீர்க்கதரிசிகளிடமிருந்து நாம் பெறும் சில ஆசீர்வாதங்கள் கீழே கோடிட்டுக் காட்டப்பட்டுள்ளன.

இயேசு கிறிஸ்துவின் சாட்சிகள். தீர்க்கதரிசிகள் இயேசு கிறிஸ்துவின் விசேஷித்த சாட்சிகள், அவரை நமது இரட்சகர் மற்றும் மீட்பர் என்று சாட்சியளிக்கிறார்கள்.

போதனைகள். பிழையிலிருந்து உண்மையைப் பகுத்தறிவதற்கு நமக்கு உதவுவதற்காக தீர்க்கதரிசிகள் தேவனிடமிருந்து வழிகாட்டுதலைப் பெறுகிறார்கள். தேவனுடைய கட்டளைகளுக்குக் கீழ்ப்படியவும், நாம் தவறுசெய்யும்போது மனந்திரும்பவும் அவர்கள் நமக்குக் கற்பிக்கிறார்கள். அவர்கள் பாவத்தைக் கண்டித்து அதன் விளைவுகளைப் பற்றி எச்சரிக்கிறார்கள்.

தீர்க்கதரிசிகளின் போதனைகள் நம்மை தேவனிடம் உயர்த்தி, அவர் விரும்பும் ஆசீர்வாதங்களைப் பெற உதவுகின்றன. அவருடைய தீர்க்கதரிசிகள் மூலம் கொடுக்கப்பட்ட கர்த்தருடைய வார்த்தைகளைப் பின்பற்றுவதிலேயே நம்முடைய மிகப்பெரிய பாதுகாப்பு இருக்கிறது.

ஆசாரியத்துவ அதிகாரம் தற்போதைய தீர்க்கதரிசி பூமியில் தலைமை தாங்கும் ஆசாரியத்துவம் தரித்திருப்பவர். ஆசாரியத்துவம் என்பது தேவனிடமிருந்து வரும் வல்லமை மற்றும் அதிகாரமாகும். அவரது பிள்ளைகளின் இரட்சிப்புக்காக தேவனின் நாமத்தில் பேசவும் செயல்படவும் தீர்க்கதரிசி அதிகாரம் பெற்றவர்.

சபை வழிகாட்டுதல். இயேசு கிறிஸ்துவின் சபை தீர்க்கதரிசிகள் மற்றும் அப்போஸ்தலர்களின் அடித்தளத்தின் மீது கட்டப்பட்டுள்ளது (எபேசியர் 2:19–20; 4:11–14 பார்க்கவும்).

பூமியின் முதல் தீர்க்கதரிசி ஆதாம். தேவன் இயேசு கிறிஸ்துவின் சுவிசேஷத்தை அவனுக்கு வெளிப்படுத்தினார் மற்றும் அவனுக்கு ஆசாரியத்துவ அதிகாரத்தை வழங்கினார். ஆதாமும் ஏவாளும் தங்கள் பிள்ளைகளுக்கு இந்த சத்தியங்களைக் கற்றுக்கொடுத்து, விசுவாசத்தை வளர்த்து, சுவிசேஷத்தின்படி வாழ ஊக்குவித்தார்கள்.

இறுதியில் ஆதாம் மற்றும் ஏவாளின் சந்ததியினர் கலகம் செய்து சுவிசேஷத்திலிருந்து விலகினர். இது மதமாறுபாடு அல்லது வீழ்ச்சி என்ற நிலைக்கு இட்டுச் சென்றது. பரவலான மதமாறுபாடு நிகழும்போது, தேவன் தம் ஆசாரியத்துவ அதிகாரத்தைத் திரும்பப் பெறுகிறார், இது சுவிசேஷத்தின் நியமங்களைக் கற்பிப்பதற்கும் நிர்வகிப்பதற்கும் அவசியமானது.

பரவலான மதமாறுபாட்டின் பல நிகழ்வுகளை பழைய ஏற்பாடு பதிவு செய்கிறது. இந்த காலகட்டங்களை முடிக்க, தேவன் மற்றொரு தீர்க்கதரிசியை அழைப்பதன் மூலம் தனது பிள்ளைகளை அணுகினார். அவர் இந்த தீர்க்கதரிசிகளுக்கு சுவிசேஷத்தின் சத்தியங்களை புதிதாக வெளிப்படுத்தினார் மற்றும் அவர்களுக்கு ஆசாரியத்துவ அதிகாரத்தை வழங்கினார். இந்த தீர்க்கதரிசிகளில் சிலர் நோவா, ஆபிரகாம் மற்றும் மோசே. துரதிர்ஷ்டவசமாக, காலப்போக்கில் மீண்டும் மீண்டும், மக்கள் தீர்க்கதரிசிகளை நிராகரித்தனர் மற்றும் வீழ்ந்து போனார்கள்.

இயேசு கிறிஸ்துவின் சுவிசேஷத்தின் முழுமை பூமியில் இல்லாத பல நூற்றாண்டுகளில், பரலோக பிதா தம் பிள்ளைகளை அணுகிக்கொண்டே இருந்தார். காலப்போக்கில், அவருடைய பூரண சுவிசேஷத்தால் அவர்கள் மீண்டும் ஆசீர்வதிக்கப்படுவதற்கு அவர் வழியை ஆயத்தம் செய்தார். சூழ்நிலைகள் சரியாக இருந்தபோது, அவர் ஜோசப் ஸ்மித்தை ஒரு தீர்க்கதரிசியாக அழைத்தார், அவர் மூலம் சுவிசேஷம் மற்றும் இயேசு கிறிஸ்துவின் சபை மறுஸ்தாபிதம் செய்யப்படும்.

ஜோசப் ஸ்மித் கிழக்கு அமெரிக்காவில் ஒரு பெரிய மத உற்சாகத்தின் போது வாழ்ந்தார். அவருடைய குடும்ப உறுப்பினர்கள் தேவனிடம் அர்ப்பணிப்புடன் சத்தியத்தைத் தேடினார்கள். பல சபைகள் சத்தியத்தைக் கொண்டிருப்பதாகக் கூறின, மேலும் எது சரியானது என்பதை அறிய ஜோசப் விரும்பினார் (ஜோசப் ஸ்மித்–வரலாறு 1:18 ஐப் பார்க்கவும்). “ஒரே கர்த்தரும், ஒரே விசுவாசமும், ஒரே ஞானஸ்நானமும்” (எபேசியர் 4:5) என்று வேதாகமம் போதிக்கிறது. ஜோசப் வெவ்வேறு சபைகளுக்குச் சென்றதால், எதில் சேருவது என்பதில் அவருக்கு குழப்பம் ஏற்பட்டது. பின்னர் அவர் சொன்னார்:

பல்வேறு சபைகளுக்கிடையே குழப்பமும் விவாதமும் பெரிதாக இருப்பினும், … என்னைப்போன்ற இளைஞனுக்கு யார் சொல்வது சரி, யார் தவறு என்ற குறிப்பான முடிவுக்கு வர முடியாததாக இருந்தது.…”

“இந்த வார்த்தை யுத்தத்திற்கும் கருத்துக்களின் சந்தடிக்கும் நடுவில், நான் அடிக்கடி என்னையே கேட்டுக் கொண்டேன்: என்ன செய்யப்பட வேண்டும்? இந்தப் பிரிவுகளில் யாரெல்லாம் சரியானவர்கள், அல்லது மொத்தத்தில் அவர்கள் எல்லோருமே தவறானவர்களா? அவைகளில் எதாவது ஒன்று சரியாயிருந்தால் அது எது, அதை நான் எவ்வாறு அறிந்துகொள்வது?” ஜோசப் ஸ்மித்—வரலாறு 1:8,10.

பலரைப் போலவே, ஜோசப் ஸ்மித்துக்கும் அவரது ஆத்தும இரட்சிப்பு பற்றிய கேள்விகள் இருந்தன. அவர் தனது பாவங்கள் மன்னிக்கப்பட்டு தேவனுக்கு முன்பாக சுத்தமாக இருக்க விரும்பினார். தன் கேள்விகளுக்கு வெவ்வேறு சபைகளில் பதில் தேடி ஜோசப் வேதாகமத்தில் வாசித்தார்: “உங்களில் ஒருவன் ஞானத்தில் குறைவுள்ளவனாயிருந்தால், யாவருக்கும் சம்பூரணமாய்க் கொடுக்கிறவரும், ஒருவரையும் கடிந்து கொள்ளாதவருமாகிய தேவனிடத்தில் கேட்கக்கடவன், அப்பொழுது அவனுக்குக் கொடுக்கப்படும்.” யாக்கோபு 1:5

இந்த பத்தியின் காரணமாக, ஜோசப் தேவனிடம் என்ன செய்ய வேண்டும் என்று கேட்க முடிவு செய்தார். 1820 ஆம் ஆண்டு வசந்த காலத்தில், அவர் தனது வீட்டிற்கு அருகிலுள்ள ஒரு மரத்தோப்பிற்குச் சென்று ஜெபம் செய்ய முழங்கால்படியிட்டார். ஜோசப் ஸ்மித் அல்லது அவரது வழிகாட்டுதலின் கீழ் எழுத்தாளர்களால் பதிவுசெய்யப்பட்ட தரிசனத்தின் நான்கு விவரங்கள் உள்ளன. (see Gospel Topics Essays, “First Vision Accounts”). புனித நூலாக அறிவிக்கப்பட்ட விவரத்தில், அவர் தனது அனுபவத்தை பின்வருமாறு விவரித்தார்:

“சூரிய பிரகாசத்துக்கும் அதிகமான, ஒரு ஒளிக்கற்றை சரியாக என்மீது இறங்குவதை நான் கண்டேன். அது என் மீது விழும் வரை மெதுவாக இறங்கியது. “… ஒளி என்மீது விழுந்தபோது, எல்லா விளக்கத்திற்கும் சவாலான பிரகாசத்திலும் மகிமையிலுமிருந்த, எனக்கு மேலே காற்றில் நின்றுகொண்டிருந்த இரண்டு பிரமுகர்களை நான் கண்டேன். அவர்களில் ஒருவர் என்னுடன் பேசி, என்னைப் பெயர் சொல்லி அழைத்து மற்றவரைச் சுட்டிக்காட்டிச் சொன்னார்—இவர் என் நேச குமாரன். இவருக்குச் செவி கொடு!” ஜோசப் ஸ்மித்—வரலாறு 1:16–17.

இந்த தரிசனத்தில், பிதாவாகிய தேவன் மற்றும் அவருடைய குமாரன் இயேசு கிறிஸ்து, ஜோசப் ஸ்மித்துக்கு தோன்றினர். எந்த சபையிலும் சேர வேண்டாம் என்று இரட்சகர் சொன்னார்.

இந்த தரிசனத்தின் மற்றொரு விவரத்தில், இரட்சகர் தன்னிடம் கூறியதாக ஜோசப் பகிர்ந்துகொண்டார்: “உன் பாவங்கள் மன்னிக்கப்பட்டன. … இதோ, நான் மகிமையின் தேவன். என் நாமத்தை நம்புபவர்கள் யாவரும் நித்திய ஜீவன் பெறும்படியாக, நான் உலகத்துக்காக சிலுவையிலறையப்பட்டேன்.”

தரிசனத்திற்குப் பிறகு, ஜோசப் சொன்னார், “என் ஆத்துமா அன்பால் நிறைந்தது, பல நாட்கள் நான் மிகுந்த மகிழ்ச்சியில் களிகூர்ந்தேன், கர்த்தர் என்னுடன் இருந்தார்” (Joseph Smith History, circa Summer 1832, 3, josephsmithpapers.org; spelling and punctuation modernized).

இந்த தரிசனத்தின் மூலம், ஜோசப் ஸ்மித் இயேசு கிறிஸ்துவின் சாட்சியாக ஆனார் மற்றும் தேவத்துவத்தைப் பற்றிய முக்கியமான சத்தியங்களைக் கற்றுக்கொண்டார். உதாரணமாக, பரலோக பிதாவும் இயேசு கிறிஸ்துவும் தனித்தனி நபர்கள் என்பதை அவர் கற்றுக்கொண்டார். அவர்கள் அவரைப் பெயர் சொல்லி அழைத்தபோது, அவர்களுக்கு அவரைத் தனிப்பட்ட முறையில் தெரியும் என்று தெரிந்துகொண்டார். ஜோசப் மன்னிக்கப்பட்டதாகக் கூறப்பட்டபோது, தேவன் இரக்கமுள்ளவர் என்பதை அறிந்தார். இந்த அனுபவம் அவரை மகிழ்ச்சியில் நிறைத்தது.

பல முந்தைய தீர்க்கதரிசிகளுடன் தேவன் செய்ததைப் போலவே, அவர் ஜோசப் ஸ்மித்தை ஒரு தீர்க்கதரிசியாக அழைத்தார், அவர் மூலம் பூரண சுவிசேஷம் பூமியில் மறுஸ்தாபிதம் செய்யப்படும். இந்த மறுஸ்தாபிதம், தேவனின் பிள்ளைகள் இந்த உலகத்தில் மகிழ்ச்சியையும், வரவிருக்கும் உலகில் நித்திய ஜீவனையும் காண உதவும்—அனைத்தும் இயேசு கிறிஸ்துவின் மூலம்.

பிதாவும் குமாரனும் தோன்றிய பிறகு, மற்ற பரலோக தூதுவர்கள் ஜோசப் ஸ்மித் மற்றும் அவரது தோழரான ஆலிவர் கவுட்ரியிடம் அனுப்பப்பட்டனர். யோவான் ஸ்நானன் உயிர்த்தெழுப்பப்பட்டவனாக தோன்றி, ஆரோனிய ஆசாரியத்துவத்தையும் அதன் திறவுகோல்களையும் அவர்களுக்கு வழங்கினான். ஆரோனிய ஆசாரியத்துவம் ஞானஸ்நானம் கொடுக்கும் அதிகாரத்தை உள்ளடக்கியது.

பின்பு விரைவில், பேதுரு, யாக்கோபு மற்றும் யோவான்—கிறிஸ்துவின் முதல் அப்போஸ்தலர்களில் மூன்று பேர்—உயிர்த்தெழுப்பப்பட்டவர்களாகத் தோன்றி, மெல்கிசேதேக்கு ஆசாரியத்துவத்தையும் அதன் திறவுகோல்களையும் ஜோசப் ஸ்மித் மற்றும் ஆலிவர் கவுட்ரிக்கு அருளினர். இந்த ஆசாரியத்துவம்தான் கிறிஸ்து தம் அப்போஸ்தலர்களுக்கு பூர்வ காலத்தில் கொடுத்த அதே அதிகாரம்.

கர்த்லாந்து ஆலயத்தில், மோசே, எலியாஸ் மற்றும் எலியா ஆகியோர் ஜோசப் ஸ்மித் மற்றும் ஆலிவர் கவுட்ரிக்கு தோன்றி, கடைசி நாட்களில் தேவனின் பணியை நிறைவேற்றுவதற்குத் தேவையான கூடுதல் அதிகாரம் மற்றும் ஆசாரியத்துவத் திறவுகோல்களை அவர்களிடம் ஒப்படைத்தனர். மோசே இஸ்ரவேலின் கூடுகையின் திறவுகோல்களை ஒப்படைத்தான். ஆபிரகாமின் சுவிசேஷத்தின் உழியக்காலத்தை எலியாஸ் ஒப்படைத்தான். எலியா முத்திரிக்கும் வல்லமையியின் திறவுகோல்களை ஒப்படைத்தான். கோட்பாடும் உடன்படிக்கைகளும் 110:11–16 பார்க்கவும்; மற்றும் General Handbook, 3.1 பார்க்கவும்.

ஜோசப் ஸ்மித் இயேசு கிறிஸ்துவின் சபையை மீண்டும் பூமியில் ஒழுங்கமைக்க வழிநடத்தப்பட்டார். அவர் மூலம், இயேசு கிறிஸ்து பன்னிரண்டு அப்போஸ்தலர்களை அழைத்தார்.

வேதாகம காலங்களில் தீர்க்கதரிசிகள் நாம் வாழும் காலத்தை கடைசி நாட்கள் அல்லது பிற்காலம் என்று குறிப்பிடுகிறார்கள். இது இயேசு கிறிஸ்துவின் இரண்டாம் வருகைக்கு முந்தைய நேரம். அதனால்தான் சபை பிற்காலப் பரிசுத்தவான்களின் இயேசு கிறிஸ்து சபை என்று அழைக்கப்படுகிறது (கோட்பாடும் உடன்படிக்கைகளும் 115:3–4ஐப் பார்க்கவும்; 3 நேபி 27:3–8ஐயும் பார்க்கவும்).

இயேசு தம்முடைய சபையை வழிநடத்துவதற்காக தம்முடைய பூலோக ஊழியத்தின் போது அப்போஸ்தலர்களை அழைத்தது போல், இன்றும் அதை வழிநடத்த அப்போஸ்தலர்களை அழைத்திருக்கிறார். பிரதான தலைமை, மற்றும் பன்னிரு அப்போஸ்தலர் குழுமத்தினர் தீர்க்கதரிசிகள், ஞானதிருஷ்டிக்காரர்கள், வெளிப்படுத்துபவர்கள்.

மூத்த அப்போஸ்தலர் மட்டுமே தீர்க்கதரிசி என்று அழைக்கப்படுகிறார், ஏனென்றால் அவர் முழு சபைக்கும் தலைமை தாங்குகிறார் மற்றும் கர்த்தருக்காகப் பேசுவதற்கு தனிப்பட்ட அதிகாரம் பெற்றவர். அவர் ஜோசப் ஸ்மித்தின் அங்கீகரிக்கப்பட்ட வாரிசு ஆவார். ஜோசப் ஸ்மித் பரலோக தூதுவர்களின் கைகளால் நியமிக்கப்பட்டபோது தொடங்கிய ஒரு அறுக்கப்படாத கட்டளைகளின் சங்கிலியில் அவரும் தற்போதைய அப்போஸ்தலர்களும் இயேசு கிறிஸ்துவுக்கு தங்கள் அதிகாரத்தை தொடர்புபடுத்துகின்றனர்.