ஒப்புக்கொடுத்தல்களை செய்து காத்துக்கொள்ள மக்களுக்கு உதவுங்கள்

என்ன அழைப்புகளை வழங்க வேண்டும், எப்போது வழங்க வேண்டும் என்பது குறித்து ஆவியின் வழிகாட்டுதலை நாடுங்கள். ஒரு நபர் உங்கள் அழைப்பை ஏற்றுக்கொள்ள என்ன போதனை அல்லது கோட்பாடு, சரியாகப் புரிந்து கொள்ளப்பட்டால் உதவும் என்று அதைப் பற்றி சிந்தியுங்கள். சரியான நேரத்தில் சரியான அழைப்பு, அவர்களின் விசுவாசத்தை வளர்க்கும் விஷயங்களைச் செய்ய மக்களைத் தூண்டும். இந்த செயல்கள் இருதயத்தில் பெரும் மாற்றத்திற்கு வழிவகுக்கும் (மோசியா 5:2; ஆல்மா 5:12–14 பார்க்கவும்).

நீங்கள் கொடுக்கும் அழைப்புகள் சிறியதாக இருக்கலாம், வேதத்தின் ஒரு அத்தியாயத்தைப் படிப்பது அல்லது திருவிருந்துக் கூட்டத்திற்கு வருவது போன்றவை. அல்லது அவை ஞானஸ்நானம் பெறுவது போல மிக முக்கியமானதாக இருக்கலாம். ஒருவர் தனது ஆவிக்குரிய பயணத்தில் இருக்கும் இடத்திற்கு அழைப்புகள் பொருத்தமானதாக இருக்க வேண்டும்.

ஒரு நபர் ஆவிக்குரிய ரீதியில் முன்னேற உதவும் வகையில் ஆவியால் வழிநடத்தப்படும் அழைப்புகள் ஒன்றன் மீது ஒன்று கட்டமைக்கப்படுகின்றன (2 நேபி 28:30; கோட்பாடும் உடன்படிக்கைகளும் 93:12–13 ஐப் பார்க்கவும்). உங்களை நீங்களே கேளுங்கள், “அந்த நபர் என்ன உறுதிமொழிகளைக் கடைப்பிடிக்கிறார்? அவர் முன்னேற அடுத்து என்ன செய்ய வேண்டும்?”

நீங்கள் பேசுபவர்களையோ அல்லது கற்பிப்பவர்களையோ கேளுங்கள். நீங்கள் கேட்பதிலிருந்தும் உணர்வதிலிருந்தும், ஒவ்வொரு நபரும் பரிசுத்த உடன்படிக்கைகளைச் செய்வதற்கு முன்னேற என்ன அழைப்புகள் உதவும் என்பது குறித்து ஆவியின் வழிகாட்டுதலைத் தேடுங்கள்.

அழைப்புகளை வழங்குவதற்கு கிறிஸ்துவில் விசுவாசம் தேவை. உங்கள் அழைப்புகளை மக்கள் ஏற்றுக்கொண்டு, அவற்றை நிறைவேற்றும்போது, ​​அவர் அவர்களை ஆசீர்வதிப்பார் என்று விசுவாசியுங்கள்.

சுவிசேஷ சத்தியத்தின்படி செயல்பட நீங்கள் மக்களை அழைக்கும்போதும், அந்த மாற்றம் அவர்களை எவ்வாறு ஆசீர்வதிக்கும் என்பதைப் பார்க்க உதவும்போதும் அவர்கள் மாறுவதற்கான வாய்ப்புகள் அதிகம். அவர்கள் ஆவியை உணர்ந்து, இயேசு கிறிஸ்துவின் சுவிசேஷத்தின்படி வாழ்வதன் மகிழ்ச்சியை அனுபவிக்கும் அளவிற்கு மாறுவார்கள்.

நீங்கள் மக்களுடன் நேரிலோ அல்லது நேரலையிலோ ஈடுபடும் போதெல்லாம், கிறிஸ்துவில் அவர்களின் விசுவாசத்தை வலுப்படுத்தவும், ஆவியை உணரவும் எந்த அழைப்பு அவர்களுக்கு உதவும் என்பதைக் கருத்தில் கொள்ளுங்கள். சில நேரங்களில் இது உங்களை மீண்டும் சந்திப்பது அல்லது ஒரு சபை நிகழ்ச்சிக்கு வருவது போன்ற எளிமையானதாக இருக்கலாம்.

நீங்கள் ஒரு பாடம் கற்பிக்கத் தயாராகும்போது, ​​ஒவ்வொரு நபரின் தேவைகளையும் முன்னேற்றத்தையும் கருத்தில் கொள்ளுங்கள். உங்கள் பாடத்திட்டத்தில் அந்நபர் முன்னேற உதவும் ஒன்று அல்லது அதற்கு மேற்பட்ட அழைப்புகள் உள்ளதா என்பதை உறுதிப்படுத்திக் கொள்ளுங்கள்.

ஒரே நேரத்தில் அதிகமான அழைப்புகளை வழங்காமல் கவனமாக இருங்கள். ஒவ்வொரு அழைப்பிலிருந்தும் செயல்பட, வளர, கற்றுக்கொள்ள ஒரு நபருக்கு நேரம் தேவை.

மக்களை ஒப்புக்கொடுத்தல்களைச் செய்ய அழைக்கும்போது தைரியமாக இருங்கள், ஆனால் அதிகமாகப் பேசாதீர்கள் (ஆல்மா 38:12 ஐப் பார்க்கவும்). மக்களின் சுயாதீனத்தை மதிக்கவும்.

ஒரு அழைப்பு பெரும்பாலும் “நீங்கள் செய்வீர்களா” என்ற கேள்வியின் வடிவத்தை பெறும், இதற்கு ஆம் அல்லது இல்லை என்ற பதில் தேவைப்படும். உங்கள் அழைப்புகளை அன்பாகவும், குறிப்பிடத்தக்கதாகவும், தெளிவாகவும் ஆக்குங்கள். இயேசு கிறிஸ்துவில் விசுவாசத்துடன் செயல்படுவதற்கு ஒரு ஒப்புக்கொடுத்தல் செய்ய அவர்கள் மக்களை அழைக்க வேண்டும் அல்லது வழிநடத்த வேண்டும்.

உங்கள் அழைப்புகள் ஒவ்வொரு நபருக்கும் தனித்துவமாக இருந்தாலும், பின்வரும் உதாரணங்களைக் கருத்தில் கொள்ளுங்கள்:

• சபைக்குச் செல்வது தேவனை வணங்குவதற்கும் அவருடைய ஆவியை உணருவதற்கும் ஒரு நேரத்தையும் இடத்தையும் வழங்குகிறது. இரட்சகரிடம் நெருங்கி வர மாற்றங்களைச் செய்யும்போது, ​​ஆதரவளிக்கும் சமூகத்தின் ஒரு பகுதியாக மாறவும் இது உங்களுக்கு உதவும். இந்த ஞாயிற்றுக்கிழமை திருவிருந்துக் கூட்டத்திற்கு எங்களுடன் வருவீர்களா?

• வேதங்களைப் படிப்பதன் முக்கியத்துவத்தைப் பற்றி இப்போது நாம் கலந்துரையாடினோம், நீங்கள் [வேதத்தின் ஒரு குறிப்பிட்ட பகுதியை] வாசிப்பீர்களா? உங்களுக்கு ஏதேனும் எண்ணங்கள் அல்லது கேள்விகள் இருந்தால் எழுதுவீர்களா? அடுத்த முறை சந்திக்கும் போது உங்கள் எண்ணங்களைப் பற்றி கலந்துரையாடலாம்.

• நாம் இரட்சகரின் வாழ்க்கையையும் அவருடைய கட்டளைகளையும் பற்றி கலந்துரையாடி வருகிறோம். அவருடைய சபையில் ஞானஸ்நானம் பெற்று, அவருக்கு வாக்குறுதிகள் அளிப்பதன் மூலம் அவருடைய முன்மாதிரியைப் பின்பற்றுவீர்களா? (அத்தியாயம் 3 இல் “ஞானஸ்நானம் மற்றும் திடப்படுத்தப்படுவதற்கான அழைப்பு” பார்க்கவும்.)

• உங்கள் வாழ்க்கையில் தேவனுடன் அதிகமாக இணைவதில் ஆர்வம் தெரிவித்தீர்கள். ஜெபத்தின் ஆசீர்வாதங்களை அனுபவிக்க, அடுத்த சில நாட்களில் விசுவாசத்துடன் ஜெபிப்பீர்களா?

• உங்களுக்கு பயனுள்ளதாக இருக்கும் என்று நாங்கள் நினைக்கும் ஒரு காணொளி எங்களிடம் உள்ளது. நாங்கள் அதை உங்களுக்குக் காட்டலாமா அல்லது இணைப்பை அனுப்பலாமா? நீங்கள் அதைப் பார்ப்பீர்களா? நீங்கள் என்ன நினைக்கிறீர்கள் என நாளைக்கு நாங்கள் உங்களை வந்து பார்க்கலாமா?

தயவான, குறிப்பிட்ட மற்றும் தெளிவான அழைப்புகளை வழங்குவதற்கான இயற்கையான வழிகளைக் கருத்தில் கொள்ளும்போது பரிசுத்த ஆவியின் தூண்டுதல்களைத் தேடுங்கள்.

சுருக்கமான தினசரி தொடர்புக்கான திட்டம்

நீங்கள் முதலில் அவர்களைச் சந்தித்து அவர்களுக்குக் கற்பிக்கும்போதே, மக்கள் தங்கள் ஒப்புக்கொடுத்தல்களைக் காத்துக் கொள்ள உதவுவது தொடங்குகிறது. அவர்களுடைய தொலைபேசி, காலண்டர் அல்லது நீங்கள் அவர்களிடம் விட்டுச் செல்லும் ஏதாவது ஒன்றில் அவர்களுடைய ஒப்புக்கொடுத்தலைப் பதிவு செய்யச் சொல்லுங்கள்.

நீங்களோ அல்லது பங்கேற்று வரும் ஒரு உறுப்பினரோ, கற்பித்தல் சந்திப்புகளுக்கு இடையில் ஒரு சுருக்கமான தினசரி தொடர்பை ஏற்படுத்த முடியுமா என்று கேளுங்கள். இந்த தொடர்புகளின் நோக்கம் அவர்களை ஆதரிப்பதே என்பதை விளக்கி, அதை நீங்கள் செய்யக்கூடிய சில வழிகளை விளக்கவும். இந்த தொடர்புகள் கோட்பாடும் உடன்படிக்கைகளும் 84:106 இல் உள்ள கொள்கையைப் பயன்படுத்துவதற்கான ஒரு வழியாகும்.

ஒரு சுருக்கமான சந்திப்பு, தொலைபேசி அழைப்பு, குறுஞ்செய்தி அல்லது சமூக ஊடகச் செய்தி போன்ற மிகவும் பயனுள்ளதாக இருக்கும் தொடர்பு முறையைத் தீர்மானிக்கவும். கூடுதல் நினைவூட்டல்கள் மற்றும் ஆதரவுக்கான பல விருப்பங்களை தொழில்நுட்பம் வழங்குகிறது.

நீங்கள் அனுப்பும் ஒவ்வொரு அழைப்பிற்கும், அடுத்த நாள் எவ்வாறு தொடர்வது என்பது குறித்த குறிப்புகளை என் சுவிசேஷத்தைப் பிரசங்கியுங்கள் செயலியில் பதிவு செய்யவும். அடுத்த நாளை நீங்கள் திட்டமிடும்போது, ​​மக்கள் தங்கள் ஒப்புக்கொடுத்தல்களைக் காத்துக்கொள்ள எவ்வாறு உதவுவது என்பதைப் பற்றி கலந்துரையாடும்போது ஆவியின் வழிகாட்டுதலைத் நாடுங்கள்.

மக்களுடனான உங்கள் அன்றாட தொடர்புகளை நேர்மறையாகவும் ஊக்கமளிப்பதாகவும் ஆக்குங்கள். அவர்களுக்காக ஜெபிக்கவும் அவர்கள் தங்கள் ஒப்புக்கொடுத்தல்களைக் காப்பாற்ற நீங்கள் உதவும்போது அன்பையும் புரிதலையும் காட்டுங்கள். கேள்விகளுக்கு பதிலளித்து, சவால்களை சமாளிக்க அவர்களுக்கு உதவுங்கள். நேரம் இருந்தால், மார்மன் புஸ்தகத்திலிருந்து ஒன்றாகப் படியுங்கள். தொடர்புடைய சபை ஊடகங்களைப் பகிரவும், அவர்களை உயர்த்தக்கூடிய சபை தயாரித்த இசை உட்பட. அவர்களின் நேரத்தையும் விருப்பங்களையும் மதித்து நடந்து கொள்ளுங்கள்.

மற்ற சபை உறுப்பினர்களுக்கு அவர்களை அறிமுகப்படுத்துங்கள். பொருத்தமான நேரங்களில், மக்கள் தங்கள் ஒப்புக்கொடுத்தல்களைக் கடைப்பிடிக்க உதவுமாறு உறுப்பினர்களைக் கேளுங்கள் (அத்தியாயம் 10 ஐப் பார்க்கவும்).

தங்கள் ஒப்புக்கொடுத்தல்களைக் காப்பாற்ற பாடுபடுபவர்களைப் பாராட்டுங்கள். அவர்களுடைய முயற்சிகளால் கர்த்தர் எவ்வாறு மகிழ்ச்சியடைகிறார் என்பதைப் புரிந்துகொள்ள அவர்களுக்கு உதவுங்கள். இந்த மக்கள் தங்கள் வாழ்க்கையை மாற்றிக் கொள்கிறார்கள், இதற்கு நிறைய உழைப்பும் பொறுமையும் தேவை. அவர்கள் பெறும் ஆசீர்வாதங்களை அடையாளம் காண உதவுங்கள். அவர்களால் வெற்றி பெற முடியும் என்ற நம்பிக்கையை தெரிவியுங்கள்.

மக்கள் தங்கள் ஒப்புக்கொடுத்தல்களைக் காப்பாற்றவில்லை என்றால், அன்பைக் காட்டுங்கள். உங்கள் அன்றாடத் தொடர்புகளின் போது அவர்களுக்கு ஆதரவளிக்க முன்வாருங்கள். உதாரணமாக, மார்மன் புஸ்தகத்தில் ஒரு அதிகாரத்தைப் படிக்க அழைப்பை ஏற்றுக்கொண்ட ஒருவர், ஆனால் இன்னும் அதைப் படிக்கவில்லை என்றால், அதை ஒன்றாகப் படிக்க முன்வாருங்கள். ஒப்புக்கொடுத்தல்களைக் கடைப்பிடிப்பது அவரது வாழ்க்கையை எவ்வாறு ஆசீர்வதிக்கும் என்பதை அனுபவத்தின் மூலம் கண்டறிய அந்த நபருக்கு உதவுங்கள்.

ஒரு ஒப்புக்கொடுத்தலைக் காப்பாற்ற மக்கள் பல முயற்சிகள் எடுக்கலாம், மேலும் அவர்களுக்கு உதவ நீங்கள் பல முறை செல்ல வேண்டியிருக்கலாம். ஒப்புக்கொடுத்தல்களைக் காப்பாற்றுவதில் உள்ள சவால்களை அவர்கள் எவ்வாறு சமாளிக்க முடியும் என்பதைப் பற்றி கலந்துரையாடவும். பொறுமையாகவும் ஆதரவாகவும் இருங்கள், குறை கூறுவதோ அல்லது தீர்ப்பளிப்பதோ வேண்டாம்.

நீங்கள் மக்களைப் பின்தொடரும்போது, ​​ஒப்புக்கொடுத்தல்களைக் கடைப்பிடிப்பதில் அவர்களின் அனுபவத்தைப் பகிர்ந்து கொள்ளச் சொல்லுங்கள். அவர்கள் என்ன கற்றுக்கொண்டார்கள், என்ன உணர்ந்தார்கள் என்று கேளுங்கள். இது அவர்களின் வாழ்க்கையில் ஆவியின் செல்வாக்கை அடையாளம் காணவும், அடுத்த கட்டத்தை அடையாளம் காணவும் உதவும்.

நீங்கள் ஒவ்வொரு நாளும் மக்களைத் தொடர்பு கொள்ளும்போது, ​​உங்கள் நோக்கத்தின் ஒரு முக்கிய பகுதி, பரிசுத்த ஆவியின் செல்வாக்கை அவர்களின் வாழ்க்கையில் அழைப்பதாகும். நீங்கள் இல்லாதபோது ஆவியை எப்படி உணருவது என்பதை அவர்கள் அடையாளம் காண உதவுங்கள். நீங்கள் அவர்களுக்குக் கற்றுக் கொடுத்தபோது அவர்கள் உணர்ந்த ஆவிக்குரிய உணர்வுகளை உங்கள் அன்றாட தொடர்பு வலுப்படுத்த வேண்டும். பரிசுத்த ஆவியின் வல்லமையையும் செல்வாக்கையும் அவர்கள் உணரும்போது அவர்கள் மனமாற்றம் அடைவார்கள்.

மனமாற்ற செயல்முறை கிறிஸ்துவைப் போன்ற அன்பை மையமாகக் கொண்டது (4 நேபி 1:15 ஐப் பார்க்கவும்). தயாளத்துவ வரத்தை நாடுங்கள். உண்மையான அன்பைக் காட்டுவது மக்கள் தங்கள் வாழ்க்கையில் ஆவியை உணர உதவும். உங்கள் அன்பின் வெளிப்பாடுகள் அவர்கள் அழைப்புகளை ஏற்றுக்கொள்ளவும், மனமாற்றத்திற்கு வழிவகுக்கும் ஒப்புக்கொடுத்தல்களைக் கடைப்பிடிக்கவும் உதவும்.

நீங்கள் மற்றவர்களை நேசித்து கற்பிக்கும்போது, ​​இரட்சகரிடம் உங்கள் சொந்த மனமாற்றம் ஆழமாகும்.

மற்றொரு நபரின் மனமாற்றத்திற்கு உதவுவது ஒரு பரிசுத்தமான செயல். இந்த பணியிலும் மற்றவர்களுக்கு சேவை செய்வதிலும் உங்களை அர்ப்பணிக்கும்போது நீடித்த மகிழ்ச்சியைக் காண்பீர்கள். (மத்தேயு 10:39; மோசியா 2:17; ஆல்மா 27:17–18; கோட்பாடும் உடன்படிக்கைகளும் 18:10–16 பார்க்கவும்).

• பாடம் 4-ல் இருந்து ஒரு கட்டளையை அடையாளம் காணவும். இந்தக் கட்டளையுடன் தொடர்புடைய வாக்குறுதியளிக்கப்பட்ட ஆசீர்வாதங்களை விவரிக்கும் பிற்கால தீர்க்கதரிசிகளின் வேத குறிப்புகளையும் மேற்கோள்களையும் கண்டுபிடித்து பதிவு செய்யுங்கள். இந்தக் கட்டளைக்குக் கீழ்ப்படிவதன் மூலம் நீங்கள் பெற்ற ஆசீர்வாதங்களைப் பற்றி யோசித்துப் பாருங்கள், அவற்றை உங்கள் குறிப்பிதழில் எழுதுங்கள்.

• உங்கள் குடும்பத்தினருடனோ அல்லது மற்றவர்களுடனோ நீங்கள் தொடர்பு கொள்ளும்போது, ​​ஒரு குறிப்பிட்ட கட்டளைக்குக் கீழ்ப்படிவதன் மூலம் அவர்கள் எவ்வாறு ஆசீர்வதிக்கப்பட்டார்கள் என்று கேளுங்கள் (உதாரணமாக, ஓய்வு நாளைப் பரிசுத்தமாகக் கடைப்பிடிப்பது, தசமபாகப் பிரமாணத்திற்குக் கீழ்ப்படிவது அல்லது நீங்கள் கற்பிக்கும் ஒருவருக்குக் கடினமான ஒரு கட்டளையைக் கடைப்பிடிப்பது).

• அழைப்புகளை வழங்குவதில் நீங்கள் எந்தெந்த பகுதிகளில் முன்னேறலாம் என்பதைக் கண்டறிய உதவும் பின்வரும் கேள்விகளுக்கு பதிலளிக்கவும். மேம்படுத்த திட்டங்களை உருவாக்குங்கள்.

  • அவர்களை நீங்கள் நேசிக்கிறீர்கள் என்பது நீங்கள் கற்பிப்பவர்களுக்குத் தெரியுமா?

  • நமது அழைப்புகளின்படி செயல்படுவதன் மூலம் அவர்கள் ஆசீர்வதிக்கப்படுவார்கள் என்று நான் உறுதியாக இருக்கிறேனா?

  • மக்கள் தங்கள் ஒப்புக்கொடுத்தல்களைக் காப்பாற்ற உதவும் வகையில், அவர்களுடன் தினமும் தொடர்பு கொள்வதற்கு நான் போதுமான நேரத்தையும் கவனத்தையும் செலுத்துகிறேனா?

  • நமது பாடத்திட்டங்களில் செயல்பட குறிப்பிட்ட அழைப்புகள் உள்ளதா?

• ஊழியப் பாடங்களில் ஒன்றில் உள்ள அழைப்புகளை பரிசீலனை செய்யவும். ஒவ்வொரு அழைப்பிற்கும், பின்வரும் கேள்விகளுக்கு பதிலளிக்கவும்:

  • இந்த ஒப்புக்கொடுத்தலைக் கடைப்பிடிப்பவர்களுக்கு கர்த்தர் என்ன ஆசீர்வாதங்களை வாக்குறுதி அளித்துள்ளார்?

  • இந்தக் கொள்கைக்குக் கீழ்ப்படிவது எவ்வாறு மக்கள் தங்கள் விசுவாசத்தையும் சாட்சியத்தையும் அதிகரிக்க உதவும்?

  • இந்த ஒப்புக்கொடுத்தல் மக்கள் மனந்திரும்பி, ஆவிக்கு அதிக உணர்திறன் உடையவர்களாக இருக்க எவ்வாறு உதவும்?

• உங்கள் திட்டமிடல் கருவிகளைப் பயன்படுத்தி, கடந்த இரண்டு நாட்களில் நீங்கள் தொடர்பு கொண்ட நபர்களின் பட்டியலை உருவாக்கவும். நீங்கள் கற்பிப்பவர்களையும் உறுப்பினர்களையும் சேர்த்துக் கொள்ளுங்கள்.

  • ஒவ்வொரு நபருக்கும், நீங்கள் வழங்கிய அழைப்புகள் மற்றும் அவர்கள் செய்த ஒப்புக்கொடுத்தல்களை எழுதுங்கள்.

  • வேறு என்னென்ன அழைப்புகளை நீங்கள் கொடுத்திருக்கலாம் என்று யோசித்துப் பாருங்கள்.

  • இந்த நபர்களில் சிலரிடமிருந்து நீங்கள் ஏன் ஒப்புக்கொடுத்தல்களை பெற முடிந்தது, ஆனால் மற்றவர்களிடமிருந்து ஏன் பெற முடியவில்லை என்பதைப் பற்றி கலந்துரையாடவும்.

  • இந்த அழைப்புகளைப் பின்பற்ற நீங்கள் என்ன செய்வீர்கள்?

• நீங்கள் கற்பிக்கும் மக்களுடன் தினசரி தொடர்புக்கு பயனுள்ள மற்றும் ஆக்கப்பூர்வமான யோசனைகளைப் பற்றி விவாதிக்கவும். ஊழியக்காரர்கள் உறுப்பினர்களுடன் எவ்வாறு திறம்பட பணியாற்றியுள்ளனர்? எந்த அச்சிடப்பட்ட அல்லது டிஜிட்டல் ஊடகங்கள் பயனுள்ளதாக இருக்கும்? வீட்டில் நபர்கள் இல்லாதபோது அல்லது உங்களைப் பார்க்க முடியாத அளவுக்கு வேலையாக இருக்கும்போது நீங்கள் என்ன செய்ய முடியும்?

• பாடம் 4 இல் உள்ள கட்டளைகளை ஊழியக்காரர்கள் எவ்வாறு திறம்பட கற்பித்திருக்கிறார்கள் என்பதைப் பற்றி கலந்துரையாடவும்.

• முடிந்த போதெல்லாம், ஊழியக்காரர்கள் கற்பிக்கும்போது அவர்களுடன் செல்லுங்கள். மக்கள் ஒப்புக்கொடுத்தல்களைச் செய்து அவற்றைக் கடைப்பிடிப்பதில் கவனம் செலுத்த அவர்களுக்கு உதவுங்கள்.

• மக்கள் இந்தத் தொடர்புக்கு ஒப்புக்கொண்டிருந்தால், ஊழியக்காரர்கள் கற்பிக்கும் மக்களுடன் தினசரி தொடர்பு கொள்ள தொகுதி ஆசாரியத்துவத் தலைவர்கள், அமைப்புத் தலைவர்கள் மற்றும் உறுப்பினர்களை ஊக்குவிக்கவும்.