Pakikibahagi sa Gawain sa Templo at Family History

Sa kanyang mensahe sa pangkalahatang kumperensya na “Mga Ugat at mga Sanga,” hinikayat ni Elder Quentin L. Cook ang mga pamilya na magtipun-tipon upang malaman ang buhay ng kanilang mga kapamilya. Maaaring maging parte ng mga pagtitipong ito ang pagbabahagi ng mga kasaysayan ng pamilya, kuwento, larawan, o iniingatang mga pag-aari ng mga magulang o lolo’t lola. Pagkatapos, ang mga miyembro ng pamilya na maalam sa teknolohiya, kasama na rito ang mga kabataan, ay maaaring i-upload ang impormasyon at mga larawan sa kanilang Family Tree. Isiping mag-organisa ng ganitong uri ng pagtitipon kasama ang iyong pamilya. Anong mga kasanayan ang taglay ng bawat isa na makatutulong sa iyo para malaman ang tungkol sa inyong pinagtagni-tagning family history? Pagnilayan kung paano makatutulong ang tulung-tulong ninyong paggawa ng family history na pag-ugnayin ang magkakaibang henerasyon at mapalalakas ang inyong ugnayan sa mga mahal ninyo sa buhay. Pagkatapos, simulan ang paggawa ng mga simpleng hakbang sa pagpaplano ng isang pagtitipon ng iyong sariling pamilya. Maaari mo ring anyayahan ang mga kapamilya na tulungan ka sa prosesong ito.

Ang mga banal na kasulatan ay puno ng mga halimbawa ng family history. Basahin ang Eter 1 na isang halimbawa mula sa Aklat ni Mormon. Paanong tila paggawa ng family history ang pagpapaikli ni propeta Moroni sa mga sulatin ni Eter? Anong mga katotohanan ang natutuhan natin sa kabanatang ito dahil isinulat at iningatan ito? (tingnan sa Eter 1:35–37, 40–43). Pagnilayan kung paano ka pinagpala ng “mga family history” na nakatala sa banal na kasulatan. Paano makikinabang ang mga susunod na henerasyon sa iyong mga kuwento at sa mga kuwento ng iyong mga ninuno?

Kapag iniisip ninyo ang family history, marahil ang unang naiisip ninyo ay pananaliksik at talaan ng mga kasaysayan. Ngunit kabilang din sa family history ang malaman ang tungkol sa mga kapamilya na nabubuhay at ang pagtuklas ng mga koneksyon ninyo sa inyong mga ninuno. Sama-sama ninyong rebyuhin ang mensahe ni Elder Gerrit W. Gong na “Bawat Isa sa Atin ay May Kuwento,” at pagkatapos ay gumawa ng isang proyekto na kinapapalooban ng higit na pag-aaral tungkol sa inyong sarili, sa inyong mga kapamilya, o sa inyong mga ninuno. Maaari kayong gumuhit o magpinta ng puno na may mga ugat at sanga na may pangalan ng inyong mga ninuno o gumawa ng isang libro na naglalaman ng kanilang mga kuwento. Pagkatapos ay talakayin kung paano kayo nakokonekta sa inyong pamilya, pati na sa mga nauna sa inyo, sa paggawa ng family history.

Itinuro ni Elder Quentin L. Cook, “Kapag nalaman natin ang mga pagsubok at paghihirap na naranasan ng ating mga ninuno, lalago ang ating pagmamahal at pagpapahalaga sa kanila.” Maaari ninyong alamin ang tungkol sa isa sa inyong mga ninuno at ang mga pagsubok na naranasan niya at pagkatapos ay ibahagi ang kuwentong iyon sa grupo. Maaari ding magpakita kayo ng larawan o magdala ng isang bagay na kumakatawan sa inyong ninuno. Talakayin kung paano nakaapekto sa inyo ang mga kuwentong ito at nakatulong sa inyo na pahalagahan kung saan kayo nanggaling.

Lucas 10:23–38; 1 Nephi 5:14–17; 19:2–5

Dennis B. Neuenschwander, “Bridges and Eternal Keepsakes,” Ensign, Mayo 1999, 83–85

FamilySearch.org

Isipin kung paano makatutulong sa iyo ang pagsasagawa ng mga ordenansa para sa mga patay para madama mo na mas konektado ka sa langit. Pagkatapos ay basahin ang dalawang kuwento sa mensahe ni Elder Gerrit W. Gong na “Maligaya Magpakailanman” tungkol sa mga miyembro ng Simbahan na nagkaroon ng kakaibang espirituwal na karanasan sa pamamagitan ng pakikibahagi sa gawain sa templo at family history. Pagnilayan kung paano magdudulot ng kapayapaan, pag-asa, o pagpapagaling sa buhay mo ang pakikibahagi mo sa gawain sa templo at family history at makatutulong sa iyo na madagdagan pa ang nalalaman tungkol sa Pagbabayad-sala ni Jesucristo.

Sa kanyang mensaheng “Pagtitipon sa Pamilya ng Diyos,” nagpatotoo si Pangulong Henry B. Eyring na ang puso ng mga anak ng Diyos ay bumabaling sa kanilang mga ama (tingnan sa Malakias 4:5–6; 3 Nephi 25:5–6; Joseph Smith—Kasaysayan 1:39). Sinabi niya: “Marami sa inyong mga ninuno ang hindi nakatanggap ng mga ordenansa [ng priesthood]. Ngunit sa awa ng Diyos, natanggap ninyo ang mga iyon. At alam ng Diyos na mapapalapit ang damdamin ninyo sa inyong mga ninuno nang may pagmamahal at na magkakaroon kayo ng teknolohiyang kailangan para matukoy sila. Alam din Niya na mabubuhay kayo sa isang panahon na mas malaki ang pagkakataon na makapasok kayo sa mga banal na templo, kung saan maisasagawa ang mga ordenansa, kaysa sa anumang panahon sa kasaysayan. At alam Niya na maaari Siyang magtiwala na isasagawa ninyo ang gawaing ito para sa inyong mga ninuno.”

Paano pinatitindi ng tiwala ng Diyos ang hangarin ninyong tulungang matanggap ng inyong mga ninuno ang mga pagpapala ng templo mula sa Kanya? Paano pinatitibay ng Kanyang pang-unawa sa hinaharap ang inyong patotoo na may plano Siya para sa Kanyang walang-hanggang pamilya? Pagnilayan kung paano mas sasadyain mong makatulong sa gawain ng Diyos, at pagkatapos ay kumilos ayon sa anumang impresyong natatanggap mo.

Sa isang libing noong Agosto 15, 1840, itinuro ni Joseph Smith na ang kalalakihan at kababaihan ay maaaring mabinyagan para sa mga patay. Naging kapana-panabik ang balitang ito sa mga Banal kaya sila ay “halos agad na nagsimulang magpabinyag para sa pumanaw na mga mahal sa buhay sa mga ilog at batis malapit sa Nauvoo.” Isiping basahin ang “Mga Liham tungkol sa Binyag para sa mga Patay” nang magkakasama para malaman pa kung kailan ibinigay ang doktrina ng binyag para sa mga patay. Pagkatapos ay talakayin kung bakit kailangan ng mga buhay at ng mga patay ang isa’t isa. Ano ang ibig sabihin ng “tayo kung wala sila ay hindi magagawang ganap; ni sila kung wala tayo ay hindi magagawang ganap”? (Doktrina at mga Tipan 128:18). Paano inihahanda ng gawain sa templo at family history ang mga buhay at ang mga patay para sa buhay na walang hanggan? Maaari din ninyong panoorin ang video na “What Are Baptisms for the Dead?” at pag-usapan kung paanong ang pakikibahagi sa gawain sa templo at family history ay makapagdudulot sa inyo ng kagalakang katulad ng nadama ng mga Banal noong unang panahon.

Itinuro ni Elder Dale G. Renlund: “Bilang mga miyembro ng Simbahan, tayo ay may banal na responsibilidad na hanapin ang ating mga ninuno at magtipon ng mga kasaysayan ng pamilya. … Kahanga-hanga na, sa pamamagitan ng family history at gawain sa templo, makatutulong tayo sa pagtubos sa mga patay.” Rebyuhin ang mensaheng ito nang sama-sama, at pagkatapos ay magtakda ng mithiin na may kaugnayan sa gawain sa templo at family history bilang isang grupo. Halimbawa, makapagdadala ang bawat isa sa inyo ng family name sa templo at magsagawa ng ordenansa para sa ninunong iyon. O maaari kayong makibahagi sa indexing sa FamilySearch para tulungan ang ibang maghanap ng pangalan ng kanilang mga ninuno. Paano pinalalalim ang hangarin ninyong magsagawa ng gawain sa templo at family history ng kaalaman na isang responsibilidad na itinalaga ng Diyos ang pagtubos sa mga patay? Paano ninyo nadama na pinapatnubayan kayo ng Espiritu sa inyong mga pagsisikap? Talakayin ang inyong mga karanasan sa isa’t isa, at ibahagi ang mga pagpapalang natanggap ninyo sa pagtupad sa mahalagang responsibilidad na ito.

Doktrina at mga Tipan 110:13–16; 128:15–19; 137:7–10; 138:29–35, 53–54

Russell M. Nelson at Wendy W. Nelson, “Buksan ang Kalangitan sa Pamamagitan ng Gawain sa Templo at Family History,” Liahona, Okt. 2017, 15–19

David A. Bednar, “Ang mga Puso ng mga Anak ay Magbabalik-loob,” Liahona, Nob. 2011, 24–27

“Templo at Family History”, collection, Gospel Library

“Temples,” ChurchofJesusChrist.org