Pamilya

Basahin at pagnilayan ang Moises 5:12. Isipin ang mahahalagang katotohanan at aral na maaaring itinuro ng mga magulang na ito sa kanilang mga anak. Itinuro ni Sister Tamara W. Runia na “ang [mga] pamilya ay isang laboratoryo na ibinigay ng Diyos kung saan maaari tayong sumubok at matuto, kaya posible at malamang na makagawa tayo ng mga maling hakbang at desisyon. At hindi ba maganda kung sa dulo ng ating buhay ay makikita natin na ang mga ugnayang iyon, pati na ang mahihirap na sandali, ang mismong nakatulong sa atin na maging higit na tulad ng ating Tagapagligtas? … Ang mga ugnayan ng pamilya [ay] isang napakahusay na kasangkapan na magtuturo sa atin ng mga aral na dapat nating matutuhan dito sa lupa.” Sa palagay mo, bakit mahalaga ang mga pamilya sa plano ng Diyos? Paano nakatulong sa iyo ang mga karanasan mo sa iyong pamilya para umunlad at maging mas katulad ng Ama sa Langit at ni Jesucristo? Paano makaaapekto sa pagtingin mo sa mga kakulangan ng iyong pamilya ang isiping tulad ng isang “laboratoryo” ang buhay pamilya?

Ito ang payong ibinigay ni Pangulong Gordon B. Hinckley: “Inorden ng Panginoon na tayo ay mag-asawa, na tayo ay magsama sa pagmamahal at kapayapaan at pagkakaisa, na magkaroon tayo ng mga anak at palakihin sila sa Kanyang mga banal na pamamaraan. … Sa huli, ito ang kahulugan ng ebanghelyo. Ang pamilya ay likha ng Maykapal. Ito ay saligan ng paglikha. Ang paraan upang mapalakas ang bansa ay patatagin ang mga tahanan ng mamamayan.” Talakayin kung bakit tayo dinala ng Diyos sa lupa na may kani-kanyang pamilya at kung paano ito nakatutulong sa pagsasakatuparan ng Kanyang plano. Paano makatutulong ang pagpapatatag ng ating tahanan sa pagpapalakas ng ating mga komunidad? Para ilarawan ang ideyang ito, maaari kayong maglaro ng isang laro na kailangan ninyong magtulungan. Halimbawa, maaari kayong bumuo ng isang buhol (bumuo ng isang bilog at hawakan sa mga kamay ang dalawang magkaibang tao) at magtulungan kayo sa pagtanggal ng pagkakabuhol ninyo nang hindi nagbibitaw ng mga kamay. O maaari kayong bumuo ng pila batay sa ilang katangian nang hindi nagsasalita (tulad ng ayon sa buwan ng inyong kapanganakan, kulay ng mata, o taas). Pagkatapos ay pag-usapan kung paano nakatutulong ang pagtutulungan bilang pamilya sa pagsasakatuparan ng mga layunin ng Ama sa Langit para sa Kanyang mga anak.

Doktrina at mga Tipan 49:15–17; Moises 2:27–28

D. Todd Christofferson, “Bakit Dapat Mag-asawa at Bumuo ng Pamilya,” Liahona, Mayo 2015, 50–53

Basahin ang mga sumusunod na salaysay ng mga magulang na tinuruan ang kanilang mga anak: Mosias 1:2–8; Helaman 5:4–12. (Maaari mo ring basahin ang Deuteronomio 6:4–7; 11:19–21; Isaias 54:13; 2 Nephi 25:26 para sa karagdagang kaalaman tungkol sa pagiging magulang.) Anong mga alituntunin ng ebanghelyo ang itinuro ng mga magulang na ito? Bakit mahalagang matutuhan ng mga bata ngayon ang mga alituntuning iyon? Paano mo matutulungan ang iyong mga anak o iba pang mahal sa buhay na matutuhan at maipamuhay ang mga katotohanang iyon? Maaari mo ring isipin ang iba pang mga ulirang magulang na kilala mo. Ano ang natutuhan mo sa kanila sa kung paano tinuturuan ng mabubuting magulang ang mga anak ng Diyos?

Ipinayo ni Pangulong Russell M. Nelson: “Huwag tangkaing kontrolin ang inyong mga anak. Bagkus, pakinggan sila, tulungan silang matutuhan ang ebanghelyo, bigyan sila ng inspirasyon, at akayin sila [tungo] sa buhay na walang-hanggan. Kayo ang mga kinatawan ng Diyos sa pangangalaga sa mga anak na ipinagkatiwala Niya sa inyo. Panatilihin sa inyong mga puso ang Kanyang banal na impluwensya habang kayo ay nagtuturo at nanghihikayat.” Paano ninyo igagalang ang tiwala ng Diyos sa inyo sa pamamagitan ng masigasig na pagtuturo sa inyong mga anak ng ebanghelyo? Paano ninyo irerespeto ang kalayaang pumili ng inyong mga anak kapag inaakay ninyo sila tungo sa buhay na walang hanggan? Isipin kung paano mo hahayaan na gabayan ka ng Kanyang impluwensya sa iyong mga pagsisikap sa araw-araw.

Basahin nang sabay-sabay ang Moises 3:21–24. Pagkatapos ay basahin ang kaisipang ito ni Elder Neil L. Andersen: “Sa simula pa lamang, pinasimulan na ng Diyos ang kasal sa pagitan ng isang lalaki at isang babae—kina Adan at Eva. Itinakda Niya na ang mga layunin ng pag-aasawa ay hindi lang para magtuon sa pansariling kasiyahan ng mag-asawa, kundi ang mas mahalaga, ay magbigay ng angkop na kapaligiran para sa pagsilang, pagpapalaki, at pag-aaruga ng mga anak. Ang mga pamilya ang yaman ng langit.” Maaari kayong gumamit ng treasure box o tingnan ang kalakip na larawan habang pinag-uusapan ninyo ang talata sa banal na kasulatan at ang pahayag ni Elder Andersen. Pagkatapos ay maaari kayong sumulat ng isang bagay na makatutulong sa paglikha ng magandang kapaligiran para matuto at umunlad ang mga bata sa ebanghelyo.

Tingnan ang kalakip na larawan at pag-usapan kung bakit napakahalaga ng pundasyon ng isang tahanan. Itinuro ni Elder Tad R. Callister: “Bilang mga magulang, tayo ang dapat maging pangunahing mga guro at halimbawa ng ebanghelyo sa ating mga anak—hindi ang bishop, Sunday School, Young Women o Young Men, kundi ang mga magulang. Bilang kanilang pangunahing mga guro ng ebanghelyo, maituturo natin sa kanila ang kapangyarihan at katotohanan ng Pagbabayad-sala—ang kanilang pagkatao at banal na tadhana—at sa paggawa nito ay nabibigyan sila ng matibay na pundasyong mapagsasaligan. Matapos masabi at magawa ang lahat, ang tahanan pa rin ang pinakamagandang lugar sa pagtuturo ng ebanghelyo ni Jesucristo.” Maaari ninyong pag-usapan ang kahalagahan ng pagbalangkas ng mga pagkakataong magturo ng ebanghelyo, ngunit talakayin din kung paano madalas na natural na nangyayari ang pagtuturo sa ating mga anak habang ginagawa natin ang ating mga gawain sa araw-araw. Ibahagi ang mga karanasan ninyo sa mga impormal na sandali ng pagtuturo at ang natutuhan ninyo mula sa mga karanasang ito. Paano makatutulong ang regular at natural na pag-uusap na ito para matiyak na may matibay na pundasyon ng ebanghelyo ang mga bata at kabataan upang mapalakas ang kanilang patotoo? Itala ang inyong mga ideya, at kumilos ayon sa anumang impresyong natatanggap ninyo.

Mga Kawikaan 22:6; Efeso 6:1–4; Mosias 4:14–15; 3 Nephi 18:21; Doktrina at mga Tipan 88:119–20

M. Russell Ballard, “Alalahanin Kung Ano ang Pinakamahalaga,” Liahona, Mayo 2023, 105–7

Dieter F. Uchtdorf, “Si Jesucristo ang Lakas ng mga Magulang,” Liahona, Mayo 2023, 55–59

David A. Bednar, “Mas Masigasig at Mapagmalasakit sa Tahanan,” Liahona, Nob. 2009, 17–20

“Tahanan at Pamilya,” sa Pagtuturo sa Paraan ng Tagapagligtas (2022), 32–33

Ipinangako ni Pangulong Nelson: “Sa dakilang plano ng kaligayahan ng Diyos, ang mga pamilya ay maaaring mabuklod sa mga templo at maging handa sa pagbalik sa Kanyang banal na presensya magpakailanman. Iyan ang buhay na walang-hanggan! Tinutugunan nito ang pinakamasisidhing pag-asam ng kaluluwa ng tao—ang likas na pag-asam na makasama nang walang hanggan ang mga pinakamamahal na miyembro ng kanyang pamilya.” Isipin ang kagalakang matatamo mo na “makasama nang walang hanggan” ang iyong pamilya. Nasaan ka ba sa landas para makamit ang mithiing ito? Ano ang susunod na hakbang ng iyong pamilya sa landas na iyan? Kung mahirap ang sitwasyon ng iyong pamilya kung saan ang “makasama nang walang hanggan” ang isang tao ay maaaring hindi gaanong maganda sa ngayon, paano mo aanyayahan ang kapangyarihan ng Tagapagligtas na tumulong sa pagpapagaling ng inyong mga ugnayan sa pamilya?

Maaari ninyong sama-samang panoorin ang video na “Families Can Be Together Forever” (3:10). Pag-usapan ang payo ni Pangulong Henry B. Eyring tungkol sa pagmamahal sa loob ng pamilya. Ano ang ipinaaalala sa atin ng huling mga salita ni Pangulong Eyring sa video? Pagkatapos ay basahin ang turong ito ni Pangulong Nelson: “Ang buhay na ito ang panahon ng paghahanda para sa kaligtasan at kadakilaan. Sa walang-hanggang plano ng Diyos, ang kaligtasan ay nasa tao; ang kadakilaan ay nasa pamilya.” Maaari kayong magsaya sa sama-samang paghahanda ng isang bagay na tulad ng paghahanda ng isang paboritong pagkain o mapagsasaluhan. Pagkatapos ay maaari ninyong pag-usapan kung bakit napakahalaga ng espirituwal na paghahanda sa pagtanggap ng kadakilaan at magkasama magpakailanman bilang pamilya.

Doktrina at mga Tipan 131:1–4; 132:15–20

Henry B. Eyring, “Templo’y Ibig Makita,” Liahona, Mayo 2021, 28–31

D. Todd Christofferson, “Ang Kapangyarihang Magbuklod,” Liahona, Nob. 2023, 19–22