Si Jesucristo ay naghahatid ng kagalakan

Nilayon kang magkaroon ng kaligayahan at kagalakan. Iyan ang layunin ng buhay. Iyan ang layunin ng plano ng kaligayahan ng Ama sa Langit. Hindi ibig sabihin nito na hindi ka malulungkot o mahihirapan. Pero ibig sabihin nito ay matutulungan ka ng Tagapagligtas na malagpasan ang mahihirap na panahon at makahanap ng kagalakan.

Ang kagalakan ay hindi nagmumula sa iyong sitwasyon; nagmumula ito sa pagsunod kay Jesucristo. Maaari kang magkaroon ng masamang araw, masamang linggo, o masamang taon. Subalit ang kagalakan ay hindi kawalan ng kalungkutan sa iyong buhay; ito ay ang presensiya ni Cristo sa iyong buhay.

Ang kagalakan ng Tagapagligtas ay mas dakila at mas tumatagal kaysa sa anupaman. Tutuksuhin ka ni Satanas na maghangad ng kasayahan at kasiyahan sa makasariling mga paraan o mula sa kamunduhan. Anumang bagay na salungat kay Jesucristo at sa Kanyang mga kautusan ay hindi makapagdudulot sa iyo ng tunay at walang-hanggang kagalakan at kaligayahan. Tandaan na ang mga bagay ng mundong ito ay pansamantala. Ang ebanghelyo ni Jesucristo ay nag-aalok ng kagalakan at kaligayahan na malalim, banal, at walang hanggan.

Piliin ang kagalakan. Bagama’t totoo na may kalungkutan at paghihirap sa mundong ito, pinuspos din ng Ama sa Langit ang mundo ng maraming magaganda at makabuluhang bagay. Hanapin ang mga iyon. Sikaping pansinin ang mga dahilan para magalak araw-araw—siguro ay isulat pa ang mga ito. Ito ay mga kaloob mula sa iyong mapagmahal na Ama sa Langit.

Maghatid ng kagalakan at kaligayahan sa iba. Natagpuan ni Jesucristo ang ganap na kagalakan sa pamamagitan ng paghahatid sa atin ng kagalakan. Matutularan mo ang Kanyang halimbawa sa pamamagitan ng paghahanap ng kagalakan at kaligayahan sa paglilingkod sa iba. Tulungan ang ibang tao na madamang minamahal siya. Magbigay ng tapat na papuri. Hikayatin ang isang taong nahihirapan. Kung nadarama mo na kailangan mo ng higit na kagalakan sa iyong buhay, sikaping maghatid ng kagalakan sa ibang tao.

Maging masaya sa pagsamba sa Panginoon. Kapag nagsisimba ka, magtuon sa kagalakang ibinibigay sa iyo ni Jesucristo, at purihin Siya para dito! Gawin ang iyong bahagi para makapag-ambag sa masayang diwa sa iyong mga miting sa Simbahan. Gawing bahagi ng iyong pagsamba sa tahanan at sa simbahan ang sagradong musika.

Makadarama ka ng kagalakan kahit mahirap ang buhay. Maaari mong isipin kung paano ito posible, ngunit ito ay totoo. Ang iyong pananampalataya kay Jesucristo, ang Kanyang nakapagpapagaling na kapangyarihan, at ang Kanyang walang-hanggang mga pangako ay makapagbibigay sa iyo ng patuloy na kagalakan. Nadaraig ng Kanyang kagalakan ang kalungkutan at naghahatid iyon ng kapayapaan na hindi masayod ng pag-unawa.

Ang ganap na kagalakan ay naghihintay sa iyo sa kahariang selestiyal ng Diyos. Nadaig ni Jesucristo ang lahat ng bagay na makahahadlang sa iyo sa pagtanggap ng walang-hanggang kagalakan. Kapag nagtiwala ka sa Kanya at sumunod sa Kanya, ang kagalakang ito ay mapapasaiyo.