Lumakad sa liwanag ng Diyos

Maaari mong makasama sa tuwina ang Espiritu Santo. Nang makumpirma kang miyembro ng Simbahan, inanyayahan kang “tanggapin ang Espiritu Santo.” Ang pagkakataong mapasaiyo palagi ang Espiritu ay isa sa mga pinakadakilang kaloob ng Diyos sa iyo.

Ang paggawa ng mabubuting pagpili ay nagpapabuti sa iyong kakayahang madama ang Espiritu. Maraming mabubuti at makabuluhang bagay sa mundong ito. Tulad ng iyong katawan na naaapektuhan ng iyong kinakain at iniinom, ang iyong isipan at espiritu ay lubos na naaapektuhan ng iyong binabasa, pinanonood, at pinakikinggan.

Maglaan ng oras para sa Panginoon araw-araw. Alamin ang tungkol sa Kanya. Lagi Siyang alalahanin. Manalangin sa iyong Ama sa Langit. Pag-aralan ang mga banal na kasulatan at mga salita ng mga buhay na propeta. Pagkatapos ay sikaping ipamuhay ang natutuhan mo.

Hangarin ang mga bagay na nagpapasigla, nagbibigay-inspirasyon, at nag-aanyaya sa Espiritu. Habang nagpapasiya ka kung ano ang panonoorin, babasahin, pakikinggan, o sasalihan, isipin kung ano ang ipinadarama nito sa iyo. Nag-aanyaya ba ito ng magagandang kaisipan? Lumayo sa anumang bagay na kumukutya sa mga sagradong bagay o imoral. Huwag makilahok sa anumang bagay na nagpapapurol sa iyong paghatol o pagiging sensitibo sa Espiritu, tulad ng karahasan, alak, at nakapipinsalang droga. Magkaroon ng lakas ng loob na patayin ang isang video o laro, lumabas ng sinehan o sayawan, baguhin ang pinakikinggan mong musika, o talikuran ang anumang bagay na hindi naaayon sa Espiritu.

Gamitin ang social media para magpasigla. Ang social media ay maaaring maging mabisang kasangkapan sa komunikasyon. Kung gagamitin mo ito, magpokus sa liwanag, pananampalataya, at katotohanan. Huwag ikumpara ang inyong buhay sa tila nararanasan ng ibang tao. Tandaan na ang inyong kahalagahan ay nagmumula sa pagiging anak ng mga magulang sa langit, hindi mula sa social media.

Maghangad ng makabuluhang mga karanasan at tunay at nagtatagal na mga relasyon. Mag-ingat para hindi pumalit ang paggamit mo ng teknolohiya at media sa personal na pag-uukol ng oras sa pamilya at mga kaibigan. Maaaring ubusin ng social media at ng iba pang teknolohiya ang oras mo nang wala gaanong mapakikinabangan. Tumigil sandali sa pagkonekta sa virtual na mundo at makipag-ugnayan sa mga tao sa tunay na buhay.

Maaaring mapasaiyo palagi ang Espiritu. Ang pangakong ito ay bahagi ng tipang ginagawa mo tuwing nakikibahagi ka sa sakramento. Patototohanan sa iyo ng Espiritu Santo ang Ama sa Langit at si Jesucristo. Ikaw ay Kanyang papanatagin, gagabayan, bibigyan ng babala, at pababanalin. Tutulungan ka Niya na makilala ang katotohanan at makita ang kabutihan sa mundo.