Maaari kang tumulong sa gawain ng Diyos

Ang gawain at kaluwalhatian ng Diyos ay ang isakatuparan ang iyong kawalang-kamatayan at buhay na walang hanggan. Ang imortalidad o kawalang-kamatayan ay ang mabuhay magpakailanman na mayroong nabuhay na mag-uling katawan. Ang buhay na walang hanggan, o kadakilaan, ay ang maging katulad ng Diyos at mamuhay sa piling Niya nang walang hanggan bilang mga pamilya. Posible ang lahat ng ito dahil kay Jesucristo at sa Kanyang Pagbabayad-sala. Siya ay mapagkakatiwalaan mo.

Makatutulong ka sa gawain ng Diyos sa pamamagitan ng paglapit kay Cristo at pagtulong sa iba na gawin din iyon. Sa tuwing gagawa ka ng anumang bagay para tulungan ang isang tao na sundin si Jesucristo, tumutulong ka sa gawain ng Diyos.

Ipamuhay ang ebanghelyo. Isalig ang iyong pananampalataya kay Jesucristo. Magsisi araw-araw. Tanggapin ang mga ordenansa ng priesthood ng Diyos at tuparin ang iyong mga tipan. Gawin iyan sa buong buhay mo.

Tulungan ang mga nangangailangan. Humanap ng mga paraan para makapaglingkod at tumulong sa iba, kabilang na sa iyong pamilya, mga kaibigan, at komunidad. Ang isang magandang paraan para matulungan ang mga taong nangangailangan ay sundin ang batas ng ayuno at magbigay ng mga handog-ayuno.

Anyayahan ang lahat na tanggapin ang ebanghelyo. Ipakita sa iyong mga salita at kilos ang iyong pananampalataya kay Jesucristo. Maging handang sabihin sa sinumang nagtatanong sa iyo ang tungkol sa pag-asa at kaligayahang nadarama mo bilang Kanyang disipulo. Para sa mga kabataang lalaki, ang paglilingkod sa full-time mission ay isang responsibilidad ng priesthood. Para sa mga kabataang babae, ito ay isang magandang oportunidad; ipagdasal na malaman kung nais ng Panginoon na maglingkod ka. Maghandang ibahagi ang ebanghelyo sa buong buhay mo.

Pagbuklurin ang mga pamilya sa kawalang-hanggan sa pamamagitan ng paggawa ng family history at gawain sa templo. Kilalanin ang iyong mga ninuno. Alamin kung sino ang nangangailangan ng mga ordenansa sa templo. Magpunta sa templo nang madalas hangga’t maaari para mabinyagan at makumpirma para sa kanila. Kung kailangan mo ng tulong, pumunta sa FamilySearch.org.

Mapasasaiyo ang tulong ng Diyos. Hindi inaasahan ng Ama sa Langit na gagawin mo ang gawaing ito nang mag-isa. Kasama mo Siya. Kapag mapagpakumbaba mong ibinibigay ang iyong panahon at puso, gagawa Siya ng kamangha-manghang mga bagay sa pamamagitan mo. Si Jesucristo ang iyong lakas!

Mapupuspos ka ng kagalakan. Ang gawain ng Diyos ay isang masayang gawain! Kapag nakikibahagi ka rito, madarama mo ang kagalakang nadarama Niya. Isipin ang kagalakang maibabahagi mo sa Ama sa Langit at sa Kanyang mga anak na tinulungan mong madala sa Kanya!