Mahalin ang Diyos, mahalin ang iyong kapwa

Mahal ka ng Diyos. Siya ang iyong Ama. Ang Kanyang sakdal na pagmamahal ay maaaring magbigay-inspirasyon sa iyo na mahalin Siya. Kapag ang pagmamahal mo sa Ama sa Langit ang pinakamahalagang impluwensiya sa iyong buhay, maraming desisyon ang nagiging mas madali.

Ang dalawang pinakadakila sa lahat ng kautusan ay mahalin ang Diyos at mahalin ang iyong kapwa. At sino ang iyong kapwa? Lahat! Ang lahat ng iba pang itinuturo sa mga banal na kasulatan at ng mga propeta ay may kaugnayan sa dalawang kautusang ito.

Lahat ng tao ay iyong mga kapatid—kabilang na, siyempre pa, ang mga taong naiiba sa iyo o hindi mo kasundo. Nais ng Ama sa Langit na magmahalan ang Kanyang mga anak. Kapag pinaglilingkuran mo ang Kanyang mga anak, pinaglilingkuran mo Siya.

Magpakita ng pagmamahal sa Diyos sa pamamagitan ng pagsunod sa Kanyang mga utos. Halimbawa, sa pagpapanatiling banal ng araw ng Sabbath, kabilang na ang matapat na paghahanda para sa at pagtanggap ng sakramento, ipinapakita ninyo sa Diyos na handa kayong maglaan sa Kanya ng isang araw sa isang linggo. Habang nag-aayuno at nagbabayad kayo ng mga ikapu at handog, ipinapakita ninyo sa Diyos na mas mahalaga sa inyo ang Kanyang gawain kaysa sa mga materyal na bagay. Kapag ginagamit ninyo ang mga pangalan ng Diyos at ni Cristo nang may pagpipitagan, hindi kailanman sa walang kabuluhan o kaswal na paraan, ipinapakita ninyo na nagpapasalamat kayo sa lahat ng Kanilang nagawa para sa inyo.

Tratuhin ang lahat bilang anak ng Diyos. Bilang disipulo ni Jesucristo, maaari kang maging halimbawa sa pagtrato sa mga tao sa lahat ng lahi at relihiyon at sa iba pang mga grupo nang may pagmamahal at paggalang—lalo na sa mga biktima kung minsan ng masasakit na salita at gawa. Tulungan ang mga taong maaaring nalulungkot, nag-iisa, o walang magawa. Ipadama sa kanila ang pagmamahal ng Ama sa Langit sa pamamagitan mo. Ibahagi sa kanila ang mga pagpapalang ibinigay Niya sa iyo, at anyayahan silang sundin si Jesucristo.

Tiyaking nakikita sa iyong pananalita ang pagmamahal sa Diyos at sa ibang tao—personal ka mang nakikipag-usap o sa virtual na paraan. Magsabi ng mga bagay na nagpapasigla—na hindi nagpapawatak-watak, nakakasakit, o nakakasama ng loob, kahit pabiro. Maaaring maging makapangyarihan ang iyong mga salita. Hayaang maging makapangyarihan ang mga iyon para sa kabutihan.

Magpakita ng pagmamahal sa iyong pamilya. Ang pagmamahal sa lahat ng anak ng Diyos ay nagsisimula sa tahanan. Gawin ang iyong bahagi para ang tahanan mo ay maging lugar kung saan madarama ng lahat ang pagmamahal ng Tagapagligtas.

Ang iyong kaugnayan sa Diyos ay lalalim kapag ipinakita mo ang iyong pagmamahal sa pamamagitan ng pagsunod sa Kanyang mga utos at pagtupad sa iyong mga tipan sa Kanya.

Ang iyong kaugnayan sa iba ay lalalim kapag ipinahayag mo ang iyong pagmamahal sa pamamagitan ng paglilingkod na katulad ng paglilingkod ni Cristo. Magagalak ka kapag ginagawa mong mas mapagmahal na lugar ang mundo.