Sises Krais kin ketkihdo popohl

Doctrine and Covenants 101:36

Semomw Nanleng ahneki popohl. E kupwurki kowe, ni duwen ahmw wia Sapwellime seri, en ahneki uwen popohl me kak koaros. Iei met me kahrehda Ah kaunopadahr pilahn en pereno. E ketin kadaredo Sapwellime Ieroso, Sises Krais, pwehn wia amwail Soundoar oh padahngki Sapwellime rongamwahu. Lepin lokaia rongamwahu wehwehki “rohng kaperen” oh rohng kapereno iei me pwehki Sises Krais, ke kak ahneki peren nan mour wet oh popohl unsek kohkohlahte.

Mehlel poatoapoat kan

E koasoandier ken ahneki peren oh popohl. Iei ih kahrepen ahmw mour. E wia kahrepen Sapwellimen Sahm Nanleng pilahn en pereno. Met sohte wehwehki me ke sohte pahn ahneki nsensuwed oh kahpwal. Ahpw e wehwehki me Soundoaro kak seweseiuk en powehdi kahpwal kan oh diar popohl.

Popohl sohte kin kohsang ahmw kahpwal kan; ahpw e kin kohsang ni ahmw kin idawehn Sises Krais. Ke kakete ahneki rahn kansensuwed, wihk kansensuwed, de pahr kansensuwed. Ahpw popohl mie nan ahmw mour kaidehn pwehki sohte pahtou; ahpw pwehki Krais ketiket nan ahmw mour.

Sapwellimen Soundoaro popohl laudsang oh kin erein sohte duehte soahng teikan. Tepelo pahn songuhk pwe ken rapahki peren nan soahng kan me sohte katepe de sang ni ineng kan en sampah. Soahng koaros me kin uhwong Sises Krais oh Sapwellime kosonned kan sohte kak wahdo peren, mehlel oh popohl soutuk. Tamataman me soahng koaros nan sampah ohngete ansou kis. Rongamwahu en Sises Krais kin kihda popohl oh peren me loal, sarawi, oh poatoapoat.

Luhk kan

Pilada popohl. Mendahte ah mehlel me mie kansensuwed oh kahpwal nan sampah, Sahm Nanleng pil audehkidahr sampah mehkot me mwahu, oh kaselel kan. Rapahkin iraillda. Song en pohnese irair en kaping kan rahn koaros—ke pil kak ntingihedi. Mepwukat wia kisakis kei sang Sahm limpoako Nanleng.

Wahdo popohl oh peren rehn mehteikan. Sises Krais diar popohl unsek ehu sang ni Ah wadohng kitail popohl. Ke kak alasang Sapwellime karasaras sang ni ahmw pahn diar popohl oh peren sang papah mehteikan. Sewese emen aramas en kehn limpoak. Kepingahki mehteikan koasoai mwahu. Kakehlailih emen me mihmi nan kahpwal. Ma mie ansou me ke kin anahne kalaudehla popohl nan ahmw mour, song sewesehki popohl ohng emen tohrohr.

Ahneki popohl nan ahmw kin pwongih Kauno. Ansou me ke kin kohla sarawi, medewehte duwen popohl me Sises Krais kin ketkihonguhk, oh kapingkihong Ih! Wia ahmw pwukoah en kapatahieng ahmw sawas en wahdo popohl en palingehn nan ansoun kaudek kan nan Mwomwohdiso. Koasoanehdi koul en sarawi kan en wia kisehn ahmw kaudek nan imwomw oh pil wasahn kaudek kan.

Minerva Teichert, Krais likauwih Likoutei Weitahta

Kapai kan me inoudier

Ke kak kehn popohl mendahte ma mour wet apwal. Ke kakete medewe ia mwomwen soahng wet ah kak wiawi, ahpw e mehlel. Ahmw pwoson Sises Krais, Sapwelime manaman en kamwahuihala, oh Sapwellime inou soutuk kan kak kihong uhk popohl ansou koaros. Sapwellime popohl kin powehdi kansensuwed oh kin wahdo meleilei me sohte me kak wehwehki.

Popohl unsek awiawih komwi nan sapwellimen Koht wehi en selesdiel. Sises Krais powehdier soahng koaros me kak perehsanguhk en alehdi popohl soutuk. Sang ni ahmw pahn likih oh idawehn Ih, ke pahn alehdi popohl wet.

Peidek oh Pasapeng Kan

Ma rongamwahu wet ahneki popohl, dahme kahrehda i kehn nsensuwed laud? Pepehm en nsensuwed sohte wehwehki me ke sohte kin momouriki rongamwahuo. Mour en aramas koaros audaudkihda kasongosong, kahpwal, oh pahtou. Idihdawehn Sises Krais sohte wekidala met, ahpw e kihognuhk Soundoar emen me kak sewese kansenamwahuihuk oh seweseiuk en diar popohl oh peren.

Dahme kahrehda lokolok tohto nan sampah? Ekei lokolok en sampah kan kin kohsang ni aramas akan ahr kin doadoahngki arail mehn pilipil oh wiahda pilipil sapwung. Met kak kahrehiong lokolok ohng pein irail oh ekei aramas. Nan irair teikan, lokolok kaidehn sapwung en emen aramas—e kohsang ni atail momour nan sampah ehu me sohte unsek. Sohte lipilipil dahme kahrehda, e kakete kalok en kilang aramas emen ah lokolok, mehlel mehmen ke poakohng. Kamehlele me Koht pil kin iang nsensuwed ansou me ke kin lokolok. E kin ketin mweidada kahpwal kan en sampah pwehn seweseiuk kekeirda oh kaunopiong popohl soutuk Reh, ahpw e sohte kin mweidehnguhk en lokolok kelehpw. E kadaredo Sises Krais pwe pein Ih en alehda ahmw medek kan pwe En kak seweseiuk. Sises Krais iei kakehlepemw! Oh E ketin lukehionguhk en, nin duwen Sapwellime sounpapah men, and wia dahme ke kak pwehn sewese lokolok en mehteikan.

Kilang Melkahka Kan 16:11 (popohl unsek mihmi nan wein Koht); 95:1 (sing unto the Lord); Sohn 16:33 (perenda; Sises Krais powedier sampah); Kalehsia 5:22 (wahn ngehno iei popohl); Ipru 12:2 (Sises powehdi Ah lokolok pwehki popohl en kapitala Sapwelimen Koht seri kan); 2 Nipahi 2:25 (Koht kupwurki ken ahneki popohl); Alma 26:15–16 (wiewia Sapwelimen Koht doadoahk kin wahdo popohl); Doctrine and Covenants 18:15–16 (Ia pahn uwen laud en ahmw popohl ansou me ke pahn wahdo mehteikan rehn Krais).

Peidek en Kisin likou en mweimwei ong tehnpas sarawi

Mie ahmw kadehde ong Sapellimen Krais Tomwpen Dihp oh Eh ketin wia Sounkomour oh Soundoar?