I Shall Not Want, sang Yongsung Kim. Kilel sang Havenlight
5.
Alu Nan Marain en Koht
Kalesia 5:25
Ke kin wiahda pilipil mwahu ansou me ke kin kak kilang soahng kan ni sansal. Ihme kahrehda marain ah nohn kesempwal; marain kin kamangaila ken kak kilang ahl me pwung. Samatail Nanleng kihong uhk marain en nanleng—kisakis en Ngehn Sarawi—pwe en seweseiuk en kilang ni sansal dahme mwahu oh suwed, pwung de sapwung.
Mehlel poatoapoat kan
Ke kak ale Ngehn Sarawio pwehn wia kempoakepahmw. Ansou me ke kasarawiala pwehn wiahla towe en Mwomwohdisoht, ke lukehngehr en “alehda Ngehn Sarawio.” Kapai en kolokol Ngehno pwehn wia kempoakepahmw ansou koaros wia ehu kisakis keieu laud sang Koht.
Wiahda pilipil mwahu kin kalaudehla ahmw kak kehn Ngehno. Diren mehkot mwahu oh unsek nan sampah. Duwehte paliweremwen ah kin doadoahk ong ni dahme ke kang oh nim, ahmw madamadau oh palingenomw kin wekidekihla dahme ke wadek, kilang, oh rong.
Luhk kan
Wiahda ahmw ansou ong Kauno rahn koaros. Esehla duwen Ih. Tamataman Ih ansou koaros. Kapakap ong Semomw Nanleng. Onopiki pwuhk sarawi kan oh koasoai kan sang rehn soukohp akan. Eri nantiong momouriki dahme ke esehier.
Rapahki dahme pahn pwokada, kaperenih, oh kin lukehdo Ngehno. Ni omw wia pilipil en dahme ke pahn kilang, wadek, rong, de patehng, medewe soangen pepehm e kin kiheng uhk. E kin lukehdo madamadau mwahu? Dehr patehng mehkot me pahn lalahwe mehkot sarawi kan de me samin. Ke dehr patehng mehkot me pahn kaluwetehla ahmw madamadau de pepehm ong Ngehno, me duwehte tiahk lemei, sakau, oh mehn koalitopw kehlail kan. Ahneki kehlail en kakunla kasdo de mehn mwadong, kokohlasang kasdo de kahlek, wekidala noumw koul, de sohpeisang mehkot me suwed ong Ngehno.
Doadoahngki sohsel mihdia ong kakehlail. Sohsel mihdia kak wia dipwisou kehlail en loklokaiapene ehu. Ma ke doadoahngki, kilangete marain, pwoson, oh mehlel. Ke dehr karasahiong ahmw mour ong dahme aramas teikan kin wiewia. Tamataman me kesempwalpemw kohsang ni omw wia seri en pahpa oh nohno en nanleng, kaidehn sang sohsel mihdia.
Rapahki tiahk unsek kan, oh mehkot mehlel me pahn poatoapoat. Kanaiehng ni omw pahn doadoahngki dipwisou en teknoloti oh mihdia sohte kin weliandi ahmw ansou-ong ahmw peneinei de koampokepahmw kan. Sohsel mihdia oh soangen teknoloti teikan kak kihsang ahmw ansou laud ni ah sohte kin kihdo mehkot mie katepe mwuhr. Komoalsang sampah oh ehuong aramas akan nan ahmw mour.
Kapai kan me inoudier
Ke kak ahneki Ngehno ansou koaros. Inou wet wia kisehn inou sarawi me ke wiahda ansou me ke kin ale kamadipw sarawi. Ngehn Sarawi pahn wia soun kadehdepen Sahm Nanleng oh Sises Krais ong uhk. E pahn kansenamwahuih, kahluwa, kaparki, oh kasarawih iukala. E pahn sewese iuk en diarada mehlel oh kilang soahng me mwahu kan nan sampah.
Peidek oh Pasapeng Kan
Ia mwomwen ahi pahn ese me I kehn Ngehn Sarawio? Esehla duen ahmw pahn kehnda Ngehno kin mie wen ansou ehu, kalapw wiewia, oh kanengamah. E kin mahsenieng soangesoangen aramas kei ni mwohmw wekpeseng kan. Kedehr kin soikala mehkot mengei kan-meleilei me ke kin ahniki ni ahmw kin rongorong an emen kadehde de pwunod me ke kin ahniki ni ahmw kin wiahda pilipil sapwung kan. Rapahki iren pwuhk sarawi ong mwohmw tohto kan duen Ngehno ah kin koasoai ong kitail, kapakapki, oh nantieng raparapahki mwomwen ăhmw pahn kehnda Ngehno.
Dahieu kilel suwed? Dahme I anahnehki soikala? Kilel suwed wia weliepen, nan kilel de ni koasoai kan, me wiawihda pwehn kahrehda pepehm en nenek kan. Kilel suwed kin kohdo ni soangen mwohmw tohto, me iangahki kasdo kan, kilel kan, pwuhk kan, oh pil koul kan. E pil kakete koasoai kan de kilel kan me kin pekeder seli nanpwungen kompani kan. Kilel suwed kin wiahng soahng koaros me sarawi—paliweretail kan oh pepehm en nenek kan—en sohte wahupe. Ke kakete kilangedi kilel suwed ni ahmw sohte medewehiong. Ma ke sapwungala kilangedi kilel kilisou kan de soh, mwadangete sohpeisang. Ke pil kak men kosoieng emen pahpa de emen me laud me ke koapwoaroapwoarki. Pein insekihda kilang kilel kilisou wia dihp oh kin kauwehla ahmw kak kehn Ngehno. E kin kaluwetehla pein-ahmw kehl oh kauwehla mwomwen ahmw kin kilang pein kowe oh mehteikan. Sises Krais ahneki manaman en sewese iuk en soikala kilel suwed oh koluhla. Sohpei lahng Ih oh sohpeisang nan rotorot. Ahmw pisop kak sewesei iuk alehda kehlail oh mahk sang Sounkomouro. Sises Krais iei kakehlepomw!
Kilang Melkahka Kan 119:105 (Mahsen en Koht duehte dengki nan atail ahl); Eimwos 5:14 (rapahki me mwahu); Kalesia 5:22–23 (wahn Ngehno kan); Moronai 7:18–19 (marain en Krais); Doctrine and Covenants 6:23 (Kauno kin mahsenki meleilei); 20:77, 79 (kapakap en kamadipw sarawi kan).
Peidek en Kisin likou en mweimwei ong tehnpas sarawi
-
Kauno mahsaniher me mehkoaros pahn kin “wiawi ni mwakelekel” mwohn Silahngi (Doctrine and Covenants 42:41). Komw kin nantiong en ahneki lamalam oh wiewia mwakelekel?