Iren Mahsen sang Presidensi Keieu

Se poakohng kumwail, oh se kopworopworkin kumwail. Ke iang mih nan pwungen Sapwellimen Sahm Nanleng seri ngehn pilipilda kei, me pekederdohr pohn sampah nan ansou wet pwe ken wia soahng kesempwal kan.

Ke kehlail oh ahniki koahiek laudsang uwen me ke ese. Oh ansou me ke kin likih Sounkomouro, ahmw kehlail kin laudla. Ih me wia “kakehlepen me pwulopwul kan.”

Irair wet pahn sewesei komwi en ahniki poahson kehlail ni ahmw pahn kin wiahda pilipil en idawehn inou sarawi kan me pahn kahluwaiukalahng mour soutuk. E pahn sewesei komwi wiahda inou sarawi kan nan tehnpas sarawi, kounopada en wia misin, oh rapahkihda peren en idawehn Sises nan amw mour. Ke ahneki wasa kesempwal ehu nan Sapwellime Mwomwohdiso. Sises Krais pahn seweseiuk en kapwaiada Sapwellime koasoandi kan ohng uhk.

Se ese me Koht ieias. Se kapakapki me ke pahn keskesihnen teng nan sapwellime ahl—ahl en wiahda oh kolokol inou sarawi kesempwal kan rehn Koht. Ih ahl me pahn kahluwaiukalahng rehn sahm Nanleng. Ni omw wia met, ke pahn ahneki mwekid me mwahu, ehukiwei rongamwahuo ni popohl, kihpene sapwellimen Koht serihkan, oh koukounop sampah ong Ketido Keriau en Sounkomour o. Tamataman: Sises Krais iei kakehlepemw!