Tiahk oh inou sarawi kan en tehnpas sarawi kin elehda ahmw kak alehdi kapai kan en Koht

Doctrine and Covenants 95:8

Ekei Sapwellimen Sahm Nanleng kapai kan me sarawi mehlel, kahrehiong Ah mahsanihong kitail en katohrehla, wasa sarawi kan wasa me kitail kak alehdi kapai pwukat: tehnpas sarawi kan. Nan tehnpas sarawi, tehnpesen Kauno, ke kak alehdi Sapwellime tiahk sarawi keieu ileile kan—endaumend oh katengtengpene—oh alehdi Sapwellime inou keieu kesempwal kan.

Mehlel Poatoapoat Kan

Endaumend wia ehu kisakis en marain oh manaman. Nan tiahk sarawi kan en endaumend en tehnpas sarawi, ke kin alehda ni unsek mwaren Sounkomouro. Ke kin inoukihda en peikiong Koht, tohnmetei pwehn wia Kupwure, momouriki rongamwahu en Sises Krais, peikiong kosonned en mwakelekel, oh mehleliong—de mweidohng—ahmw mour oh soahng koaros me Koht ketkihonguhk ong Sapwellime Mwomwohdiso. Metkan iei ahmw inou kan. Koht kin inoukihda me E pahn kapaikinuhkada marain laud, perehre, oh elen alehdi Sapwellime manaman. E pil kin inouki en kihonguhk mour soutuk Reh. Me wia kisehn endaumend, ke kin alehdi ansou mwahu en likawih likou sarawi en prihsduhd sarawio. Likou sarawi wet wia kilelepen Sises Krais oh mehn ketemenpen ahmw inou sarawi kan en tehnpesen Koht.

Katengteng penehn nan tehnpas sarawi kin kihpene pwopwoud kan oh ahr peneinei kan kohkohlahte. Nan tiahk sarawi en katengtengpene, kowe oh ahmw pwoud pahn wiahda inou sarawi ong Koht oh nan pwungamwa. Kumwa pahn inoukihda en mehlel ong Koht oh nanpwungamwa, en poakpene oh papah emen emen, oh ehupene pwehn kolokol kosonned akan en Koht. Met iei amwa inou. Koht kin inouki me ahmw ehuong ahmw pwoud oh noumwa seri kan pahn mihmi erein. E pil inoukihda me ke pahn kak alehdi Sapwellime lingan lap Reh nan wein selesdiel ma ke pahn kolokol ahmw inou sarawi kan. Kapai wet kahdaniki lapalapala.

Luhk akan

Ansou koaros kolokol kisin likoun mweimwei en pidelong nan tehnpas sarawi. Tuhong emen towe kan en pwihn en pisop kan pwehn alehdi noumw. E pahn kalelapak rehmw ia mwomwen ahmw kin momouriki koasoandi en Kauno kan pwe ken kak pidelong nan Sapwellime tehnpas sarawi. Nantihong wadwadek kalelapak pwukat ansou koaros. (Ke kak diar nan iren kaweid kapatapat kan en pwuken kaweid wet.) Mendahte ma ke dohsang tehnpas sarawi, nantihong kolokol kisin likou wet pwehn wia kasalepen ahmw limpoak ong Kauno oh ahmw inou en momouriki Sapwellime koasoandi kan.

Nantihong kalapw kohla ni tehnpas sarawi. Sang ni noumw kisin likou wet, ke kak pidelong nan tehnpesen Kauno oh pepdaiski oh kasarawihla ong ahmw peneinei en mahsoko, pwe irail en kak alehdi kapai kan me ke alehdier. Alehda ansou mwahu koaros me kin kohienguhk pwehn kak kohla nan tehnpas sarawi. Rapahki Kauno nan Sapwellime tehnpas. Rapahki Ih nan tiahk sarawi kan, kasansal kan, oh Ngehn Sarawi me ke kehn. Ke pahn diar Ih.

Kaunopada pwehn wiahda inou sarawi kan nan tehnpas en Kauno. Ehu wiepe me keieu mwahu en wia met iei en kolokol ahmw inou sarawi en pepdais. Koasoanehdi en wiahkihkla mehn kaweid ahmw mour pwe ken alehdi tiahk sarawi kan en tehnpas sarawi oh ken wia emen me kin kolokol inou sarawi kan erein ahmw mour. Tapiada met en momouriki kosonned akan me ke pahn inoukihda en kolokol nan tehnpas sarawi: peikiong kosonned akan en Koht, tohnmetei, rongamwahu en Sises Krais, mour mwakelekel, oh kasarawihala. Ahmw peneinei, pisop, oh towe kan en Mwomwohdisoht kak seweseiuk.

Kapai kan me Inoudier

Ke kak duehla Sises Krais. E pahn seweseiuk en wia emen me kin idawehn dahme pwung. Tiahk sarawi kan en tehnpas sarawi pahn padahkihonguhk mwomwen ahmw pahn pidelong nan wein Koht oh alehdi mour soutuk Reh.

Ke pahn kolokol sapwellimen Koht manaman. Inou sarawi kan en tehnpas sarawi iangahki inou me sapwellimen Koht manaman oh lingan pahn mih rehmw. Sapwellime tohnleng kan pahn sinsile iuk.

Ahmw ansou nan tehnpas sarawi pahn seweseiuk en karaniala douluhl Sises Krais oh Ngehn Sarawio. Ke pahn kehn Sapwellimen Koht meleilei oh komoal. Ke pahn karonge kepitie ni sansal mwahu. Nanleng pahn retdahnguhk, oh ke pahn wehwehkihla mwahu Sapwellime koasoandi kan. Ke pahn alehdi kakehlail en sohpai kahpwal kan pwehki ahmw mohngiong ehuong Sapwellimehu.

Peidek oh Pasapeng Kan

Iahd i kak alehdi ahi endaumend? Pilipil en wiahda doadoahk sarawi en inou wet wia pein ahmw; kapakapki pilipil wet. Koasoaiong ahmw pahpa nohno oh ahmw sounsawas en nan Mwomwohdiso. Pwehn alehdi ahmw endaumend, ke anahne sounpar 18 oh solahr mihmi nan sukuhl laud de dake keriau. Ke pahn wiahda tiahk sarawi wet mwohn ahmw pahn wia misin de katengtengpene, ahpw ke sohte anahne awih soahng riau wet mwohn ahmw pahn wia ahmw endaumend. Ke anahnehte en inengiong en wiahda oh kolokol pil ekei inou sarawi ong Sahm Nanleng. Ahmw pisop de preseden en prans kak sewese kehsehkinuhk ma ke onopadahr. Kedehpa medewe me wiahda endaumend wiahte ehu mehkot me ke anahne wiahsang pwe ken sohsohki mour soutuk. Medewe me e wia mehkot lingan oh kaselel me wia kisehn ahmw seiloak en kohdo rehn Krais oh alehda Sapwellimen Koht kapai laud kan.

Dahme i anahnehki kisin likoun mweimwei en pidelong nan tehnpas sarawi? Tehnpas sarawi wia tehnpas en Kauno, oh Ih me kin koasoanehdi koasoandi kan en pidelong loale. Tiahk oh inou sarawi kan en tehnpas sarawi me inenen sarawi ihme kahrehda irail kin anahnehki ehu soangen wiepen kaunopada ni palingehn. Kalelapak kan en kisin likoun mweimweio mie pwehn kak kasalehda me ke onopadahr ni palingehn pwehn alehdi kapai laud kan en inou kan en tehnpas sarawi. Sahm Nanleng lukehiong Sapwellime seri kan koaros en kaunopada pwehn wiahda inou kan ong Ih nan Tehnpese sarawio.

I anahne en unsek pwe ien kak wiahda inou en nan tehnpas sarawi kan? Sohte emen me unsek. Koht kupwurki ken kin mehlel oh inengiong kapwaiada Sapwellime kosonned akan. Wiahda oh kolokol inou sarawi kan ong Koht me kihonguhk manaman en unsekla pwehki Sises Krais. Ih me wia kehlepomw!

Kilang Aiseia 2:2–3 (Koht kin padahkihong kitail Sapwellime koasoandi kan en nan tehnpas sarawi); Madiu 11:28–30 (wahda Sapwellimen Soundoaro wisik); 1 Nipahi 14:14 (manaman en Koht mihmi pohn Sapwellime aramas en inou kan); Doctrine and Covenants 97:15–16 (Kauno oh Sapwellime lingan ketket nan tehnpas sarawi); 109:22 (kitail kin perehrehki Sapwellimen Koht manaman nan tehnpas sarawi); 131:1–4; 132:4–6, 15–20 (pwehn alehdi mour soutut, ohl oh lih emen anahne katengtengpene sang ni inou sarawi kapw oh soutuk en kopwopwoud); Abraham 1:2 (Abraham men wiahla emen me kin pereniki idawehn me pwung oh alehdi kamarain laud).

Peidek en Kisin likou en mweimwei ong Tehnpas sarawi

Komwi medemedewe me komwi warohng pidolong nan tehnpas en Kauno oh iang towehda nan tiahk sarawi kan?