Me pwulopwul
9. Ke kapaidahr sang kih oh mweimwei kan en prihsduhd
meninkeder kan sang nanleng kapwurehdo kih nan en prihsduhd nan Tehnpas Sarawi en Kirtland

9.

Ke kapaidahr sang kih oh mweimwei kan en prihsduhd

Madiu 16:18–19

Ni ansou me Sises padahkihong Piter duwen manaman en prihsduhd, E kosoia duwen kih kan. Kih kan kin doadoahkehng ohpenda oh ritingada soahng kan me kin loak. Kih kan en prihsduhd kak ritingadahng uhk manaman en Koht, kisakis, oh kapai kan nan ahmw mour.

Mehlel Poatoapoat Kan

Koaros kih oh mweimwei en prihsduhd kin kohsang rehn Sises Krais. Koaros me kolokol prihsduhd kak kilang iawasa arail prihsduhd tepsang ie oh pwurala lela Reh. Sounkomouro kin pilada isime kak ale manaman wet oh isime kak ale kih kan en prihsduhd. Kitail likih Sapwellime marain unseko.

Sises Krais kapwuredohr Sapwellime prihsduhd nan atail ansou. E kin kaweid ia mwomwen prihsduhd wet ah kin doadoahk. Adam, Moses, Piter, oh soukohp tohto nan poadoapoad alehdier kih pwukat en prihsduhd. Nan atail ansou, Sosep Smith alehdi kih kan en prihsduhd sang Sohn sounpepdais, Moses, Elias, Ilaisa, oh mehteikan. Towe kan en keieun Presedensi iangahki kohrumw en Wahnparon Ehk Riemeno koaros kolokol kih koaros en prihsduhd pohn sampah rahnwet. Sounpapah kan en ahmw wasa iangahki preseden en kohrumw kan koaros kolokol kih kan en prihsduhd ong arail pwukoah kan. Kih kan en Prihsduhd me kin kaweid Sapwellimen Koht doadoahk. Irail kin kihong mweimwei oh manaman rehn ohl oh lih akan pwe en sawas nan doadoahk wet.

Manaman koaros en prihsduhd kin kapaiada sapwellimen Koht seri koaros. Pwehki kopwurpwurdohn prihsduhdo, ke kakehr alehda tiahk sarawi kan oh wiahda inou sarawi ong Koht. Ke kak doadoahk ni mwaren Koht ansou me ke alehdi pwukoah sang emen me kolokol mweimwei.

Luhk akan

Alehda pwukoah kan en Mwomwohdiso oh papah ni pwoson. Ansou me ke kin alehdi pwukoahn Mwomwohdiso, ke kin kasarawihla sang mweimwei en Koht pwehn papah nan pwukoahu. Ke pil kak alehdi kaweid sang Koht ong ahmw pwukoah. Ni ahmw pahn papah, ke wia weliepen Sises Krais. Kihong Ih ahmw kak koaros.

Utungada irail akan me Koht malipehier pwehn papah. Pwehn utungada emen sohte wehwehkihte ken kauwada pehmwen ansou me ke rong eden aramaso nan ansoun Sarawio. E wehwehki en utung oh sewese. Rapahki soangen ahl akan me ke kak sewesehki irail akan me Sises Krais piladahr en papah nan Sapwellime Mwomwohdiso.

Kapwaiada pwukoah kan sang irail sounpapah kan en Mwomwohdiso—me iangahki me sang rehn ahmw kohrumw de presedensi. Irail kolokol mweimwei sang rehn Koht, pwehn kihonguhk ong pwukoahu. Ke kakete alehdi pwukoahn papah emen, kasamwoh aramas akan ansou me irail pahn iang towehda kaudek en kamadipw sarawi, de sawas nan kemwekid ieu. Mendahte dahme ke pwukoahki, medewehte me e wia ansou mwahu ehu ken wia soun idawehn Sises Krais men oh papah sapwellimen Koht seri kan.

Sises Krais pepdaisla rehn Sohn Sounpepdais nan pillap en Sordan

Kapai kan me Inoudier

Ke kak koapwoaroapwoarki me tiahk sarawi kan me ke alehdi mweimweidahr sang Sises Krais. Met iei ehu kahrepen Mwomwohdiso en Sises Krais ah weksang mehteikan. Sang ni tiahk sarawi kan en prihsduhd, manaman en Koht kin sansalda.

Ke pahn wiahla dipwisoun doadoahk nan limen Kauno. Ni ahmw pahn papah Kauno ki Sapwellime manaman oh pahn kaweidpen Sapwellime sounpapah kan me kolokol kih kan en prihsduhd, E pahn ketin seweseiuk en ese ia mwomwen ahmw pahn papah mehteikan nan Sapwellime doadoahk.` Sises Krais iei kehlepomw. Ahmw papah pahn seweseiuk en karanihala Ih oh kihonguhk popohl.

Peidek oh Pasapeng Kan

Isime kolokol kih kan en prihsduhd nan ahi wardo? Pisop iangahki preseden kan en kohrumw en elder kan, sounpadahk kan, oh dihken kan kolokol kih kan en prihsduhd. Met wehwehki me Kauno kepwukoahkin irail en kaweid mwomwen prihsduhd eh pahn doadoahk pwehn papah oh kapaiada koaros nan wardo.

Ia mwomwen kih kan en prihsduhd ah kapaiehda? Tiahk sarawi kan me duehte pepdais oh kamadipw sarawi kin mweimweida sang kih kan en prihsduhd. Ansou me ke kin ale ahmw pwukoah nan Mwomwohdisoht, ke kin kasarawihla sang emen me kolokol kih kan. Met kin kapaiukada pwe ken kak papah nan pwukoahu. Sounpapah kan en Mwomwohdisoht oh sounpadahk kan me kin papah iuk pil kin alehdi mweimwei en prihsduhd sang kih kan.

Ia mwomwen ohl oh lih akan ahr kin papahki mweimwei en prihsduhd? Ohl akan me warohng kin alehdi prihsduhd oh kasarawihong nan ohpis kan en dihken, sounpadahk, prihs, oh elder. Lih oh ohl akan me kin kasarawihong pwehn papah nan kepwukoah ieu kin alehdi mweimwei en prihsduhd sang Koht pwehn kapwaiada pwukoahu. Met pil duehte ong ohl oh lih akan me kin alehdi kepwukoah ieu sang emen sounpapahn Mwomwohdisoht.

Kilang Doctrine and Covenants 35:24–27 (Mwomwohdisoht kin ale kaweid sang kih kan me Kauno ketkidohr); 107:18–20 (kih kan en prihsduhd en Melkisedek oh Aron); 110:11–16 (Moses, Elias, oh Elaisa kapwurehdohr kih kan).

Peidek kan en kisin likou en mweimwei en pidelong nan Tehnpas sarawi

  • Komw kin utung Preseden en Mwomwohdiso en Sises Krais en Souleng en Imwin Rahn-akan me wia soukohp, sounkairoir, oh sounkaudiahl oh ihte ih aramas pohn sampah me kolokol oh ahneki mweimwei en doadoahngki kih koaros en prihsduhd?

  • Komw kin utung irail kan me towe Presedensi Keieu oh Pwihn en Wahnparon Ehk-riemen ko me irail wia soukohp kei, sounkairoir kei, oh sounkaudiahl kei?

  • Komw kin utung irail teikan me pil iang wia Kaun Lapalap en Mwomwohdisoht oh irail kan me kakaun Mwomwohdisoht nan sapwomw?