Tiahk oh inou sarawi kan elehda ahmw kak alehdi kapai kan en Koht

Doctrine and Covenants 84:20

Sahm Nanleng mentehnoh kasukuhlihuk oh kapaiukada. Ehu ahl me E kin wia met kin sang tiahk sarawi kan me duwehte pepdais, kasarawi, oh kamadipw sarawi. Sang ni tiahk sarawi kan me due mepwukat, kitail kin wiahda inou sarawi ehu, de inou, ong Koht. Momouriki inou sarawi kan kin kalaudehla sapwellimen Koht manaman nan ahmw mour oh seweseiuk en kaunopieng mour soutuk. Met iei kahrepen tiahk oh inou sarawi kan ahr udahn kesempwal ong kitail—pwehki irail kin kakehlailih nan pwungen kitail oh Sahm Nanleng iangahki atail Sounkomouro oh kin sewese kitail en duwehla Ira.

Mehlel Poatoapoat Kan

Tiahk sarawi kan kin kaineneiukalahng Sises Krais. Tiahk sarawi ieu wia kasarawi kesempwal ehu me iangahki kasansal kan me kin padahki duwen Sises Krais. Kamadipw sarawio, ni karasepe, kaidehn pilawahte oh pihl. E kin katamankin kitail duwen Sounkomouro.

Inou sarawi kan wia kilelepen Sapwellimen Koht limpoak, likilik, oh kupwure kan. Irail kin kaloalehla ahmw ehuong Koht. Ke kin kasalehda ahmw limpoak oh loaloapwoat ohng Koht sang ni inou sarawi kan. Ke kak likih Ih, oh E pil kak likihuk. Ehupene kehlail wet kahrehda ke kak alehdi Sapwellime manaman oh sawas ni ahmw pahn momouriki ahmw inou sarawi kan.

Ke kin wiahda inou sarawi kan ong Koht ansou ke pepdaislahr oh kasarawilahr oh ansou ke kin alehda kamadipw sarawi. Ansou me ke pepdaisla, ke inoukihda me ke pahn alehda mwaren Sises Krais, papah Ih, oh kolokol Sapwellime kosonned akan erein ahmw mour. Nan ansoun kamadipw sarawi, ke pil inoukihda en kin tamataman Ih ansou koaros. Mepwukat me wia ahmw inou. Sang ni ahmw pahn inengieng en kapwaiada mepwukat, Koht inoukihonguhk me ke pahn alehda Ngehn Sarawi en ieianguhk ansou koaros.

Luhk kan

Medewe me kamadipw sarawi wia kisakis sarawi ehu. Kasalehda ahmw poadidiong Sises Krais sang ni ahmw pahn kaunopada en kehn mehkot sarawi nan ansoun kamadipw sarawio. Medemedewe dahme ke kak wia pwehn kahrehiong tiahk sarawi wet en wia mehkot laud en palingehn nan erein wihko.

Rapahki Sounkomouro nan tiahk sarawi pwukat. Ansou me ke pahn kilang de iang patehng tiahk sarawi ieu, kalelapek rehmw, “Dahme i esehla me pid Sises Krais sang met?” de “Ia mwomwen ah seweseie en karaniala Ih?” Tehk mwahu dahme ngehn sarawi pahn kin padahkihonguhk.

Mweidehng ahmw inou sarawi kan en kaweid ahmw wiewia kan. Ansou me mie pilipil ke pahn wiahda, tamanda ahmw inou sarawi ong Koht. Mehleliong Ih. Kalelapak rehmw: Met pahrekohng ahi inou sarawi kan? Karasepe, i kin pereniki papah mehteikan, kansenamwahuih aramas akan me anahne nsenamwahu, oh wia soun kadehdeh men en Krais—wasa oh ansou koaros?

Krais ni tehpel ehu kaukaunop kamadipw sarawi ong mehn Nipahi kan

Kapai kan me Inoudier

Ke kak alehdi manaman en powehdi kasongsong, dihp, oh kahpwal kan en mour wet. Wiahda oh koloklol inou sarawi kan kin kihonguhk en kak alehdi manaman en Koht. Sang manaman wet, ke kak sohpai soahng koaros ni eimah. Sises Krais iei kakehlepomw!

Ke kak mwakelekelda oh alehdi mahk. Kisehn Sapwellimen Koht inou ong uhk ong omw kin kapwaiada ahmw inou en pepdais kan iei mahkepen dipwomw kan. Met wehwehki me ma ke pahn koluhla oh kapwaiada ahmw inou kan ong Koht, E pahn mahkehnguhk oh seweseiuk en kekeirda.

Ke kak kolokol Ngehn Sarawi ansou koaros. Pilehu inou me wia kisehn pepdais oh kamadipw sarawi iei me Ngehn Sarawi pahn ieianguhk ansou koaros oh sawasepen tohnleng kan. Ke sohla pahn kelehpwiki sohpai ahmw kasongsong kan. Koht sohte kin likidmeliehla Sapwellime aramas en inou kan—ke kak koapwoaroapwoarki met.

Ke kak alehdi utuht en Sapwellimen Koht aramas en inou kan. Ke wia kisehn pwihn en aramas en inou kan nan Sapwellimen Sounkomouro Mwomwohdiso. Kumwail pahn kin utungada oh kakehlailih emen emen. Kumwail pahn kin ahnikipene pahtou oh pereperen pene. Kumwail pahn ehukipene en emen emen katoutou kan. Ahmw peneinei, pisop, weliepe kan, oh towe teikan nan Mwomwohdisoht pahn kin seweseiuk, oh ke pil kak sewese irail.

Peidek oh Pasapeng Kan

I kak wia emen soun idawehn Sises Krais ma I saik alehdi tiahk oh inou sarawi kan? Totohn aramas mwahu me kin idawehn Sises Krais ni mohngiong unsek, ahpw saikinte pepdais de kohla nan tehnpas sarawi. Ahpw, Sahm Nanleng kupwurki Sapwellime seri koaros en alehdi Sapwellime tiahk oh inou sarawi kan ong Ih pwe irail en kalaudehla arail kak en alehdi Sapwellime sawas, mahk, oh kehl. Met wia ehu kahrepe keiou kan me Sises Krais kapwurehkihdo Sapwellime Mwomwohdiso! Seri en Koht koaros pahn ahneki ansou mwahu—nan mour wet de mwurin mour wet—en alehda tiahk oh inou sarawi kan me anahnepe pwehn kak alehdi mour soutuk.

I sohte kin ansou koaros loaloapwoat ohng ahi inou sarawi kan. Mie ahi koapwoaroapwoar? Ei! Rongamwahu en Sises Krais wia rongamwahu en koapwoaroapwoar oh mour kapw akan! Met iei me kahrehda atail kin alehda kamadipw sarawi wihk koaros. Sahm Nanleng mwahngiher me kitail pahn kin wiahda sapwung oh kin anahne pwurehng tepida. Sounkomouro pwilikihdi Ah mour pwehn kihonguhk ahl en pwurala Reh. Sang ni ahmw pahn ahneki pwoson Sises Krais oh koluhla, kek kak pilehu alehdi sapwellimen Koht manaman.

Kilang 1 Korint 11:23–26 (kitail kin kasalehda me kitail kamehlele Sises Krais oh Sapwelilme Tomwo sang ni atail kin ale kamadipw sarawi); Mosaia 18:10, 13 (inou sarawi en pepdais); Doctrine and Covenants 13 (Prihsduhd en Aron iangahki kih kan en koluhla, pepdais, oh sawas sang tohnleng kan); 20:37 (dahme anahnepe kan ong pepdais); 20:77, 79 (kapakap en kamadipw sarawi kan).

Peidek en Kisin likou en mweimwei ong Tehnpas Sarawi

Komw kin nantiong wauneki Rahn en Sapad, ni imwomwi oh ni imwen kaudek; iang mihting kan; kaunopohng oh warohng ale kamadipw sarawi; oh momourki mour me wauneki kosonned oh koasoandi kan en rongamwahuo?