Paliweremwen sarawi

Paliweremwen mih ni mwomwen Koht—Wahr me keieu lingan, lapalap, nan wasa koaros. Pwuhk sarawi kan kin karasahiong paliweretail kan ong tehnpas sarawi ieu, wasa ieu me Ngehno kak mihmi ie. Ni mehlel, paliweremwen sohte unsek met. Ahpw soahng kan ke kin lelehng ni ahmw ahniki paliwar kak sewese iuk kaunopieng en alehdi paliwar ieu me unsek, iasadahr, oh linganlahr ehu rahn.

Mour wiawihkida paliweromwen oh palingenimwen. Pwehki kahrepe wet, roson mwahu en paliwar oh palingehn kin ehupene. Sounkomouro kasalehda duwen Mahsen en Eripit pwe en padahngki duwen kamwahu kan ong apwalih paliweremw oh en inouki kapai kan en paliwar oh palingehn.

Pepehm en nenek kan wia kisehn sapwellimen Koht pilahn en wiahda pwopwoud mwahu oh peneinei soutuk kan. Pepehm pwukat sohte wiahda dihp—irail me sarawi. Pwehki pepehm kan en nenek ah nohn sarawi oh manaman, Koht ketikiong uhk Sapwellime kosonned en mwakelekel pwe en kaunop iukada ong doadoahkepen pepehm pwukat nin duwen me E ketin kupwuriki. Kosonned en mwakelekel kosoia me Koht kamanalahr mwekid en nenek ongete nan pwungen ohl oh lih emen me pwopwoudlahr. Tohto nan sampah kin pohnsehse de kauwe sapwellimen Koht kosonned, ahpw Kauno kin lukei kitail en wia Sapwellime werek oh momouriki mour me mwahu sang sampah.

Apwalih paliweremwen—oh paliweren mehteikan— ki wahu. Ni omw medewe duwen ahmw likou, wiepen moangemw, oh mwomwemw mwohn aramas, pein idek rehmw, “Ih wauneki kisakis en paliwereiet nin duwen eh wia kisakis sarawi ehu sang rehn Koht?” Samatail Nanleng kupwuriki kitail en kilang emen emen ong udahn ihs kitail: kaidehnte ni paliwar kei ahpw Sapwellime seri kei me ahneki doadoahk poatoapoat. Kalekehsang uhk mwohmw akan me pahn kalaudehla de wiahda aramas en kilikilang paliweremwen ah kaidehn ihs kowe ni omw wia seri en Koht emen me kak ahneki mour poatoapoat ehu rahn. Mweidohng mour mwakelekel oh limpoak ong Koht en kahluwa ahmw pilipil kan. Ale kaweid sang rehn ahmw peneinei.

Wia soahng kan me pahn kakehlailih paliweremwen, kaidehn mehkot me pahn kamadakihala de kauwehla. Perepereniki ni kaping soahng tohto kan koaros me Koht ketikihdahr. Tamataman me sakau, sika, koahpi, dih, oh soangen mehn kasahliel teikan oh wini teikan kaidehn ong paliweremwen de palingenimwen. Pil iangahki wini en sawas akan, me duwehte wini sang toahkte, kak kauwehla ma ke sohte doadoahngki ni pwung.

Kolokol nenek oh pepehm en nenek kan en wia mehkot kesempwal. Re sohte konehng wia iren kamwan de mehn kaperen. Likin pwopwoud nan pwungen ohl oh lih emen, e sapwung ken doahke wasa me sohte konehng, wasa sarawi en paliweren emen, itarete ma e likou. Nan ahmw mehn pilipil kan en dahme ke pahn wia, kilikilang, wadek, rong, medewe, kihda nan sohsel mihdia, de dekski, keisang mehkot me pahn kak wiahda ineng suwed me kainengihda mehteikan de pein kowe. Met iangahki kasdo suwed akan ni soangen mwohmw sohte lipilipil. Ma ke diarada me irair akan de kemwekid kan kin kalaudehla kasongosong kan, soik irailla. Ke ese soangen irair pwukat de kemwekid dah kei mwo. Oh ma ke sohte nohn ese, Ngehno, ahmw peneinei, oh ahmw kaun kan kak seweseiuk en esehla. Kasalehiong Sememw Nanleng me ke wauneki oh kesempwaliki sapwellime manaman sarawi en kapikada mour.

Ahmw wauneki pein kowe oh mehteikan pahn laudla ni omw pahn wauneki paliweremwen sang ni omw mwekid, mwomwemw, oh likou.

Kauno inoukihdahr kapai laud tohto en loalokong ong irail akan me kin kolokol Mahsen en Eripit. Paliwar kehlail ehu, me sohte tengedieng mehkot suwed, kin kalaudehla ahmw koahiok en alehdi kaudiahl, medewe ni sansal, oh papah Kauno.

Momouriki mour en mwakelekel kin wahdo sapwellimen Koht utuht oh pein ahmw manaman en ngehno. E wia perepen kowe oh ahmw peneinei nan ansou kohkohdo kan. Ansou me ke pwopwoudahr, kosonned wet kin wahdo limpoak laud, koapwoaroapwoar, oh ehupene nan ahmw pwopwoud. Kapwaiada kosonned wet pahn wiahiong uhk ken keirda poatoapoat oh duwehla Semomw Nanleng. Ahmw kehlail pahn keirida ni ahmw pahn momouriki nin duwen sapwellimen Sises Krais tohn doadoahk men.