Me pwulopwul
11. Me mehlel pahn kasaledek iukala
Kisin pwutak en mahs emen wie wadawad sang nan sikrohl ehu

Feast Upon the Word, sang Liz Lemon Swindle. sang Havenlight

11.

Me mehlel pahn kasaledek iukala

Sohn 8:32

Samamwail Nanleng iei Koht en mehlel. E kin ese-koaros. Mehlel koaros kin kohsang Reh oh kin kahluwahla Reh. Ke kin kasalehda me ke mehlel ni omw kin nantiong en koledi, momouriki mehlel, oh kin kehlailki uhki dahme pwung—menda ma ke kin kelehpw.

Mehlel soutuk kan

Samatail Nanleng mwahuki Sapwellime serepein oh pwutak kan en kin ansou koaros kaskasukuhl. Ke kolokol koaros kahrepe kan en paliwar oh palingehn en rapahki oh pereniki kasukuhl. Palien kasukuhl kaidehnte pwe ken wiahda noumw mwohni. E wia kisehn ahmw koasoandi poatoapoat en duwehla Samatail Nanleng.

Momourki mour mehlel wehwehki ke kin poakohng dahme pwung mwohn sihlang en Koht—laudsang ahmw poakohng pein soanomw, dehde, de dahme konehng. E wehwehki wiewia dahme pwung pwehki e pwung.

Mie mehkot kesempwal me ke anahne ehukihwei. Rongamwahu en Sises Krais o kolokol pasapeng kan en mour. Iei ih me wia ahl ong meleilei oh peren. Ke kakete sohte ese soahng koaros, ahpw uwen me ke ese kak elehda ahmw poakohng mehn mpomw kan, ehukihong irail padahk mehlel kan, oh lukehiong irail en kalaudehla arail wehwehki.

Luhk kan

Ansou koaros kin kaskasukuhl. Rapahki iren sawas akan en kalaudehla ahmw madamadau oh ahmw koahiek kan. Ansou mwahu pwukat kak iangahki kasukuhl en wasahn sukuhl de wasahn kaiahn teikan, oh pil pein ahmw kaskasukuhlsang ni mehn sawas kan me ke koapwoaroapwoariki. Taman Kauno nan soahng koaros, ah E pahn kahluwa iuk.

Esehla me pwung kan en palingehn. Ni ahmw pahn esehla duwen sampah, pil kasukuhlki duwen Sounkomouro, me kapikadahr Sampah. Onopiki Sapwellime mour oh padahk kan. Wiahki semineri, insdiduhd, oh pein omw onopiki Pwuhk sarawi kisehn ahmw wie kaskasukuhl. E kak kaunopuhkada en wia ahmw misin oh ehukihwei rongamwahuo erein ahmw mour.

Momourki mehlel. Kedehr pirap, likamw, sohte loaloapwoat, de lidipihki ekei me sapwung ni soahng sohte lipilipil—wasahn sukuhl, doadoahk, nan inderned, wasa koaros. Wiahte soun idawehn Sises Krais o nan pokon de pil ansou kan me ke kelehpw.

aramas akan kelepwidi mwohn Sises Krais me iasadahr

Kapai kan me Inoudier

Kasukuhl kin kalaudehla ahmw kak en papah Kauno, me iangahki wia misineri men. E kin kakehlailihuk en kapaida mehteikan, ahpw mehlel ahmw peneinei. Wen laud en ahmw koledi, iei wen laud en ahmw kak sewese kauwada wein Koht oh kasalehiong Sampah me mwahu.

Mehlel kin wahdo meleilei oh wahu ong-pein kowe. Ansou me ahmw kosoi oh mwekid kin ehuong me mehlel, ke kasalehda me aramas kak kopworopworkin uhk—sang aramas teikan oh sang rehn Kauno.

Ansou me ke kin uhki padahk kan en Sises Krais, E pil kin kesihnen limwahmw. Sises Krais iei kakehlepomw! Ekei mwein sohte pahn utung dahme ke kamehlele kan, ahpw ahmw kehlail oh karakarahk pahn sansal. Itarete ma sohte me pahn idawehn ahmw karasaras, ahmw kadehde, koapwoaroapwoar, oh pwoson Krais pahn keirida.

Peidek oh Pasapeng Kan

E sapwung ken ahneki peidek me pidada Mwomwodisoh? Ia mwomwen ahi kak diarada pasapeng kan? Ahneki peidek kan sohte wia sain en luwet de sohte pwoson. Ahpw mehlel, idihdek peidek kan kak sawas kalaude pwoson. Kopwurupwurdohn rongamwahu o tepida ansou me Sosep Smith me sounpar-14 idek peidek kan ni pwoson. Rapahki pasapeng kan nan Pwuhk Sarawi kan, ni kosoi kan en sapwellimen Koht soukohp akan, sang rehn omw kaun kan oh tohn peneinei pwoson kan, oh sang Rehn Koht. Ma pasapeng sohte kin mwadangete kohdo, koapwoaroapwoariki me ke pahn esehla ekis ekis. Momourikihte dahme ke esehier, oh nantihlahte raparapahki me mehlelo.

Ia mwomwen ai pahn uhki dahme pwung oh sohte kansensuwedihla palien lamalam teikan? Tepkihda ni omw pahn tehk mwahu me omw kosoi kan oh mwekid kan kohsang ni limpoak ong Koht oh Sapwellime seri kan. Ehukiwei rongamwahu o sohte anahne wiawi ni ngenen akamai ahpw ni sansal, karakarahk, oh kadek. Ke kak limpoak ong mehteikan itarete ma ke sohte pil pwungki arail madamadau kan. Wiahda karasaras mwahu nin duwen ahmw wia sounpapah men en Sises Krais sang ni mwomwen ahmw kin momour.

Kilang Madiu 5:14–16(mweidehng ahmw marain en sansal; Sohn 14:6 (Sises Iei me mehlelo); 1 Piter 3:15 (onopada ansou koaros pwehn ehukihda ahmw koapwoaropwoarki Krais); Doctrine and Covenants 88:77–80 (soahng kan me Kauno kupwurki kitail en esehla); 88:118 (rapahki eripit sang nan pwuhk kaselel kan); 93:36 (kilohri en Koht iei loalokong); 124:15 (mourki mehlel iei poakohng dahme pwung; 130:18 (atail loalokong pahn iang kitail ansou me kitail pahn iasada).

Peidek kan en kisin likou en mweimwei en pidelong nan Tehnpas sarawi

  • Komw kin nantiong en kin mehlel nan mehkoaros me komw kin wia?

  • Komw kin utung de pwungki sohte lipilipil padahk, wiewia kan, de koasoandi kan me uhong padahk kan en Mwomwohdiso en Sises Krais en Souleng en Imwin Rahn-akan?