Sapwellmen Kauno pilahn iei ong komwi

Sahm Nanleng me koasoanehdi pilahn wet. Ihme wia papahn palingenomw, oh E poakohng uhk. E men kihonguhk Sapwellime kapai keieu laud—iei mour soutuk Reh. Pilehu wehwe, E kupwurki ken duehla Ih oh iang momouriki mour en popohl, oh kaselel me E ketin momouriki. E Sapwellimanki manaman koaros oh mwahngih mehkoaros. Ke kak likih Ih, mendahte ma mour kin apwal.

Sises Krais kahrehiong pilahn wet ah pweida. Mwohn sampah wet ah kepikipikda, Sahm Nanleng pilada Ih en wia ahmw Sounkomour. Sises Krais kelehpw me kak kapwureiukalahng rehn Semomw Nanleng. Met me kahrehda atail kin pilada en idawehn Ih. Dahme kin pwarada koaros kin kohsang ni pilipil wet.

Pwopwoud oh peneinei udahn kesempwal ong sapwellimen Koht pilahn. Ke wia kisehn peneinei en Koht, oh Sapwellime seri ngehn koaros kin kohdo ni sampah sang pahpa oh nohno men. Koht kupwurki Sapwellime serepein oh pwutak kan en ehupene kekeirda kolahng unsek soutuk. Ohl oh lih akan kin sawaspene ni pahrek ong pwopwoud ehu me limpoak, oh ehupene. Mour en peneinei pohn sampah wet—mendahte wasa sohte itar kan koaros—kak wahdo popohl laud. E koasoandieng en sewese kaunopuhkada ong mour soutuk rehn Koht.

Kolokol madamadau soutuk ehu. Ansou kan me ke kin lelohng kasongosong, kaluet, kansensuwed, de pilipil apwal akan, katamanki pein kowe duwen pilahn en Koht. Kilang ia mwomwen ahmw wehwehki Sapwellime pilahno ah kak seweseiuk wekidala mwomwen ahmw kin kilang ahmw kahpwal kan.

Rapahki Limen Koht kan nan ahmw mour. Kilang soangen mwohmw akan me Koht kin kapaiukada. E kakete sang ni wiewia mwahu ong emen, ansoun meleilei ehu, de pasapeng en kapakap ieu.

Pilada en idawehn pilahn en Koht. Esehla duwen dahme Sahm Nanleng kupwurki ken wia. Rapahki Sapwellime kaweid ni ahmw pahn kin onopiki pwuhk sarawi kan, mahsen kan en soukohp momour akan, kalohk ehu ong sampah, oh ahmw kapai en peitriahk. Met pahn seweseiuk en kaunopada papah Kauno, nin duwen misineri men oh pil erein ahmw mour. Wiahda papah ong Kauno, kopwopwoud nan tehnpas sarawi, oh kakairada noumw seri kan en wia mehkot keieu kesempwal nan ahmw mour. Wia ahmw pwukoah ansouwet sang ni ahmw pahn padahkihong ahmw peneinei en kin idawehn padahk en Sises Krais.

Ke kak sohpai kahpwal en mour wet sang ni ahmw pahn ahneki komwad oh koapwoaroapwoarki Krais. Pwehki ahmw ese duwen pilahn en Koht, ke kolokolehr dipwisou kesempwal ehu me kak seweseiuk nan ansou apwal akan. Ke esehier me mie mehkot me inenen kesempwal ong mour wet palahsang dahme kin wiawi nanpwungen ipwidi oh mehla. Ke esehier udahn ihs kowe, ia ahmw pwukoah, oh isime ke kak wiahla sang ni sawas en Sounkomouro. Sises Krais iei kakehlepomw!

Ke kak alehdi mour soutuk sang ni ahmw pahn idawehn Sises Krais. E pahn ketkihonguhk manaman en duehla Ih, pwurala rehn Sahm oh Ihn nanleng, oh koukousoanehng ni popohl ahmw peneinei kan. Likih Sises Krais.