3.
Ke kak iang sawas nan Sapwellimen Koht doadoahk
Moses 1:39
Sahm Nanleng poakohng Sapwellime seri kan koaros. E kupwurki irail koaros en diar peren oh popohl, pwurala Reh, oh alehdi mour soutuk. Met kahdaniki Sapwellime doadoahk en komour oh lapalapala, oh E ketin lukehiong uhk en iang sawas!
Mehlel poatoapoat kan
Sapwellimen Koht doadoahk iei en kapwaiada oh kihonguhk mour soutuk. Mour soutuk wehwehki en momour nan paliwar iasadahr ehu kohkohlahte. Mour soutuk, de lapalapala, iei en duehla Koht oh mihmi Reh erein nin duwen peneinei kan. Soahng pwukat koaros kak pweida pwehki Sises Krais oh Sapwelime Tomwo. Ke kak likih Ih.
Ke kak sawas nan Sapwellimen Koht doadoahk sang ni ahmw pahn alehda Krais oh sewese mehteikan en alasang. Ansou koaros me ke kin sewese aramas emen en idawehn Sises Krais, ke kin seusewese Sapwellimen Koht doadoahk.
Luhk kan
Momourki rongamwahuo. Kakehlakahla ahmw pwoson Sises Krais. Koluhla rahn koaros. Alehda Sapwellimen Koht tiahk sarawi en prihsduhd kan oh kolokol ahmw inou sarawi kan. Wihwia met erein ahmw mour.
Apwalih irail kan me anahne sawas Rapahkihda ahl akan en papah mehteikan, me iangahki ahmw peneinei, kempoakepahmw, oh ahmw wasahn kousoan. Ehu ahl kesempwal ohng sewese aramas akan me anahne sawas iei en peikiong kosonned en kaisihsol oh kihda meiroangen kaisihsol akan.
Lukehiong koaros en alehda rongamwahuo. Mweidohng ahmw koasoai oh ahmw mwekid en kasalehda ahmw pwoson Sises Krais. Kaunopuhkada en kak sapeng aramas akan me pahn kalelapak rehmw duwen koapwoaroapwoar oh peren me ke kin kehn nin duwen ahmw wia Sapwellime tohn papah. Ohng pwutak pwulopwul kan, doadoahk en misineri wia pwukoah en prihsduhd men. Ohng peinakapw akan, e wia ansou mwahu kesempwal; kapakap pwe ken ese ma Kauno kupwurki ken papah. Kaunopada en kalohngki rongamwahuo erein ahmw mour.
Kihpene peneinei kan ohng mour soutuk sang ni wihwia poadepen peneinei oh doadoahk en tehnpas sarawi. Esehla duwen kadaudokomw kan. Diarada irail akan me anahne tiahk sarawi en tehnpas sarawi. Kohla nan tehnpas sarawi ansou koaros me ke kak pwe ken kak pepdaisla oh kasarawihla ohng irail. Ma ke anahne sawas, kohla nan FamilySearch.org.
Kapai kan me Inoudier
Koht pahn seweseiuk. Sahm Nanleng sohte kasik ken kelehpwiki doadoahk wet. E kin ketin ieiang uhk. Ansou me ke pahn ni karakarahk pwilikihdi ahmw ansou oh mohngiong, E pahn doadohngkin uhk oh wiahda soahng tohto kaselel kan. Sises Krais iei kakehlepemw!
Ke pahn direkihla popohl. Sapwellimen Koht doadoahk wia doadoahk en popohl ehu! Ansou me ke pahn patehng oh wia, ke pahn kak kehn Sapwellime popohl. Medewehla uwen popohl laud me ke pahn ehukihong Sahm Nanleng iangahki irail akan me ke sewesehier wahdo Reh!
Peidek oh Pasapeng Kan
Mehelel Koht kak doadoahngkin ie nan Sapwellime doadoahk? Ei! Soangen ahl tohto mie pwehn sewese doadoahk wet. E kakete mwomwen me mehteikan koahiek de semen sanguhk, ahpw Sahm Nanleng kilkilangete dahme ke kak wiahda. E ketkihonguhkehr kisakis kan me ke kak doadoahngki pwehn papah oh wahdo Sapwellime seri kan. E mwahu ma kisakis pwukat weksang dahme mehteikan ahneki. Ni mehlel, ihme kahrehda ahmw kisakis kan ah kesempwal. Mie anahnepomw!
Kilang Madiu 10:39 (ma ke pahn luhs sang ahmw mour pwehki ahmw papah Sounkomouro, ke pahn komourla); 1 Korint 12:14–27 (towe kan koaros mie anahnepe rehn Krais); Pilipai 1:6 (ahneki eimah pwehki Koht wie doadoahk rehmw); Seikop 5:72 (Kaun en mwetuelo ianguhk wie doadoahk); Doctrine and Covenants 18:15–16 (ahmw popohl pahn lap rehn irail akan me ke sewesehdo rehn Krais); 64:33–34 (doadoahk laud ehu kin kohsang mehkot tikitik oh mengei); Moses 1:6 (“I kaunopadahr doadoahk ehu ohng komwi”); 6:31–34 (Koht kin kakoahiekih irail akan me E kin pilada, mendahte ma irail pepehm me irail sohte kak).
Peidek en Kisin likou en mweimwei ong tehnpas sarawi
-
Mie ahmw kadehde me pid Kopwurupwurdohn rongamwahu en Sises Krais o?