12.
Li Jesukristo naxk’e li sahil ch’oolejil
K’ajo’ xsahil xch’ool laa Choxahil Yuwa’. A’an naraj naq laa’at, li ralal malaj xrab’in, taanumtaaq ajwi’ xsahil aach’ool. Chi jo’kan naq kixkawresi li na’leb’ re sahil ch’oolejil. Kixtaqla li Jesukristo, li Ralal, re xkolb’al aawix ut xk’utb’al lix evangelio. Li aatin evangelio naraj naxye “chaab’il esil,” ut li chaab’il esil a’an naq b’antiox re li Jesukristo, naru taataw xsahil aach’ool sa’ li yu’am a’in ut xtz’aqalil xsahil aach’ool chi junelik.
Li junelikil yaal
Na’ajman naq laa’at taasaho’q aach’ool. A’an li rajom laa yu’am. A’an li kixk’uub’ li qaChoxahil Yuwa’ sa’ lix na’leb’ re sahil ch’oolejil. Yaal ajwi’ naq taaraho’q aach’ool ut naq taanumsi li ch’a’ajkilal chi jo’q’ehaq. A’ut li Kolonel naru tatxtenq’a chi saho’k aach’ool us ta ch’a’aj wankat.
Li sahil ch’oolejil ink’a’ nachal rik’in li wankat wi’; nachal b’an rik’in xtaaqenkil li Jesukristo. Maare ch’a’aj li kutan, li xamaan, malaj chixjunil li chihab’. A’b’an li sahil ch’oolejil ink’a’ nachal naq maak’a’ li rahilal; li sahil ch’oolejil a’an naq li Kristo wan sa’ laa yu’am.
Li sahil ch’oolejil li naxk’e li Kolonel jwal nim wi’chik ut jwal najt wi’chik nakana chiru yalaq k’a’ chik ru. Laj Satanas tatraale chixsik’b’al li sahilal li q’etq’et malaj li sahilal re li ruchich’och’. Yalaq k’a’ru ink’a’ naxk’am rib’ rik’in li Jesukristo ut lix taqlahom ink’a’ naru tixk’e li sahil ch’oolejil li yaal ut li taakanaaq. Chijultiko’q aawe naq yal numel chixjunil li k’a’aq re ru re li ruchich’och’. A’ut lix evangelio li Jesukristo naxk’e li sahil ch’oolejil li q’axal nim ut sant, ut li junelik taakanaaq.
Li b’oqok
Sik’ li sahil ch’oolejil. Us ta wan li rahilal ut li ch’a’ajkilal sa’ li ruchich’och’ a’in, li qaChoxahil Yuwa’ kixnujob’resi ajwi’ rik’in k’iila k’a’aq re ru ch’ina-us ut chaab’il. Sik’eb’ a’an. Yal xtawb’al li k’a’ru naxk’e xsahil aach’ool wulaj wulaj—maare us xtz’iib’ankil k’a’ru a’an. A’aneb’ a’in maatan k’eeb’il xb’aan laa Yuwa’ sa’ Choxa li nakatxra.
Tenq’aheb’ laa was aawiitz’in chi saho’k xch’ooleb’. Li Jesukristo kixtaw xtz’aqalil xsahil xch’ool sa’ xk’eeb’al li sahil ch’oolejil qe. Naru nakataaqe li kixb’aanu a’an; xtawb’al xsahil aach’ool sa’ xtenq’ankileb’ laa was aawiitz’in. Tenq’a jun kristiaan chixnawb’al naq raaro aab’aan. Ye junaq chaab’il aatin re anihaq. Waklesi xch’ool li ani ch’a’aj wan. Wi joq’e’haq nakaweek’a naq nakawaj xkomon chik xsahil aach’ool, yal xtenq’ankil jalan chik chi saho’k xch’ool.
Sahaq aach’ool sa’ xloq’oninkil li Qaawa’. Naq nakatwulak sa’ iglees, k’e reetal li sahil ch’oolejil naxk’e li Jesukristo aawe, ut nima ru re xb’antioxinkil! K’e aach’ool chixpuktesinkil li musiq’ej re sahil ch’oolejil sa’eb’ laa ch’utam sa’ li Iglees. Oksiheb’ li loq’laj b’ich re loq’onink sa’ laa junkab’al ut sa’ li iglees.
Li osob’tesink yeechi’inb’ileb’
Naru nasaho’ aach’ool us ta ch’a’aj laa yu’am. Maare nakapatz’ ma yaal a’an, a’b’an tz’aqal yaal a’an. Laa paab’aal chirix li Jesukristo, lix wankil aj k’irtesinel, ut lix junelikil yeechi’ihom naru tatxk’e chi saho’k rajlal. Lix sahil xch’ool li Kristo nanumta sa’ xb’een li rahilal ut naxk’am li tuqtuukilal li naqʼaxok ru chixjunil li natawman ru.
Taataw xtz’aqalil xsahil aach’ool sa’ lix choxahil awa’b’ejihom li Dios. Li Jesukristo kinumta sa’ xb’een chixjunil li truuq raj taaramoq aawe chixk’ulb’al xsahil aach’ool chi junelik. Ut naq nakapaab’ ut nakataaqe a’an, taataw li sahil ch’oolejil a’in.
Li patz’ok ut li sumenk
Wi li evangelio naxk’e sahil ch’oolej, k’a’ut naq ra inch’ool? Naru naraho’ aach’ool us ta yookat chixyu’aminkil li evangelio. Sa’ li qayu’am chiqajunjunqal, wan li ch’a’ajkilal, li yalb’a-ix, ut li rahilal. Wan ajwi’ a’an us ta yooko chixtaaqenkil li Jesukristo, a’b’an naq nakataaqe, wan jun aj Kolol aawe li naru tixk’ojob’ aach’ool ut tatxtenq’a chi saho’k aach’ool.
K’a’ut naq k’a’jo’ xk’ihal li rahilal wan sa’ li ruchich’och’? Wan naq nachal li rahilal sa’ li ruchich’och’ sa’ xk’ab’a’ li ink’a’ us neke’xb’aanu li kristiaan. Ut chi jo’kan naq nachal li rahilal sa’ xb’eeneb’ a’an jo’eb’ ajwi’ jalaneb’ chik li maak’a’ ke’xb’aanu. A’ut ink’a’ naru naqaye naq li rahilal nachal xmaak anihaq—nachal b’an xb’aan naq wanko sa’ jun ruchich’och’ wan xmajelal. Maak’a’ naxye b’ar nachal chaq li rahilal, naraho’ qach’ool chirilb’al naq ra wan jun kristiaan, k’a’jo’ wi’chik wi a’an laa raarookil komon. Chanaw naq li Dios naraho’ ajwi’ xch’ool naq ra wankat. Li Dios naxkanab’ naq li yalb’a-ix re li yu’am a’in tatxtenq’a chi k’iik ut chi kawresiik choq’ re li junelikil sahil ch’oolejil rik’in a’an, a’ut a’an moko nakatxkanab’ ta aajunes. A’an kixtaqla li Jesukristo re xk’ulb’al laa rahilal sa’ xb’een a’an re naq taaruuq tatxtenq’a. Li Jesukristo a’an laa kawilal! Ut a’an nakatxb’oq, jo’ xtzolom a’an, chixb’aanunkil li k’a’ru naru chawu re xk’osb’al xrahilaleb’ laa was aawiitz’in.
Chi’ilmanq Salmos 16:11 (chiru li Dios wan xtz’aqalil li sahil ch’oolejil); 95:1 (b’ichan chiru li Qaawa’); Jwan 16:33 (chisaho’q aach’ool; li Jesukristo kinumta sa’ xb’een li ruchich’och’); Galatas 5:22 (li ruuchinihom li Musiq’ej a’an sahil ch’oolejil); Hebreos 12:2 (li Jesus kixkuy li rahilal xb’aan xsahil xch’ool sa’ xkolb’aleb’ li ralal xk’ajol li Dios); 2 Nefi 2:25 (li Dios naraj naq taasaho’q aach’ool); Alma 26:15–16 (xb’aanunkil lix k’anjel li Dios naxk’e sahil ch’oolejil); Tzol’leb’ ut Sumwank 18:15–16 (kʼaʼjoʼaq xnimal xsahil aachʼool wi taatenq’aheb’ laa was aawiitz’in chi chalk rik’in li Kristo).
Li patz’om re li recomendacion re li santil ochoch
-
Ma wan xnawom aach’ool chirix lix tojb’al rix li maak xb’aan li Jesukristo, ut lix k’anjel a’an jo’ aj Kolol aawe ut aj Tojol aawix?