Chasik’ ru li chaab’il

Sa’ li hu Choq’ re Xkawilaleb’ li Saaj, taataw li raatin li Jesukristo ut eb’ lix profeet. Chi k’amb’il aab’e xb’aan li raatineb’, li taab’aanu tatrosob’tesi anajwan ut chi junelik q’e kutan.

Laa’at jun xraarookil musiq’ejil ralal li Dios. Lix nimla k’uub’anb’il na’leb’ re sahil ch’oolejil naxk’e aawankil chi k’iik sa’ musiq’ej ut chixnimob’resinkil laa choxahilal. Li Dios kixtaqla li Jesukristo jo’ aj Kolol aawe.

Laa Yuwa’ sa’ Choxa naxnaw k’a’ru naru taab’aanu. K’a’jo’ naq nakatrosob’tesi rik’in lix tz’aqalil li evangelio ut eb’ li loq’laj k’ojob’anb’il k’anjel ut sumwank li nakate’xbak’ rik’in a’an ut neke’xk’e lix wankilal sa’ laa yu’am. Rik’in li sumwank a’an naniman li sahil ch’oolejil, a’ut wan ajwi’ li tenenb’anb’il sa’ qab’een. A’an naxnaw naq naru taajal li ruchich’och’, ut chi jo’kan, wan naq tento naq jalanaqat rik’in li ruchich’och’. Kanab’ laa Choxahil Yuwa’ chab’eresinkil naq nakasik’ ru laa b’e. A’an tatrosob’tesi rik’in li musiq’anb’il na’leb’ li taachalq rik’in li Santil Musiq’ej.

Li Jesukristo a’an li b’e re xtawb’al li sahil ch’oolejil maak’a’ roso’jik. Naq nakasik’ xtaaqenkil li Jesukristo, wankat sa’ li b’e li nak’amok sa’ li sahil ch’oolejil maak’a’ roso’jik. K’e li Jesukristo jo’ eetalil chawu, laa kawil k’ojleb’aal. K’ojob’ laa yu’am sa’ xb’eeneb’ li raatin, ut b’is li b’e nakasik’ ru rik’in a’an. Li sumwank nakat-ok wi’ sa’ li kub’iha’, li loq’laj wa’ak, ut li santil ochoch naxk’e xkawilal laa kawil k’ojleb’aal rik’in li Kristo. Toj te’chalq li ch’a’ajkilal ut li aaleek, a’b’an laa Choxahil Yuwa’ ut li Jesukristo tate’xtenq’a chixq’axb’aleb’ ru.

Li rajom li hu Choq’ re Xkawilaleb’ li Saaj maawa’ xyeeb’al “us” malaj “ink’a’ us” chirix li jar paay chi na’leb’ taak’ul sa’ laa yu’am. Li Qaawa’ yoo b’an chab’oqb’al chi b’eek sa’ jun b’e taqenaq ut sant wi’chik—jun b’e taasik’ wi’ li yaal ut li k’a’ru yeechi’inb’il xb’aan li Qaawa’. A’an a’in lix b’e. Li hu a’in tixk’ut lix b’e chawu. Tixch’olob’ li yaal li naxk’utb’esi. Chak’eheb’ li na’leb’ a’an jo’ aj k’amol aab’e—re naq te’xk’am aab’e chirix li ok sa’ sumwank sa’ li santil ochoch ut li xik sa’ mision, jo’ ajwi’ chirix li nakab’aanu wulaj wulaj, jo’ rilb’aleb’ laa was aawiitz’in ut xnumsinkil laa hoonal.

Us ta wankeb’ li naru te’tenq’anq aawe, laa k’iijik sa’ musiq’ej aawe aajunes. Teneb’anb’il a’an sa’ aab’een. Yal aaq’e wulaj wulaj, paab’ lix taqlahom li Dios ut laa sumwank, ut tenq’aheb’ laa was aawiitz’in chi nach’ok rik’in li Kolonel.

Chi’ilmanq Mosiah 4:29–30 (maak’a’ rajlankileb’ li k’iila paay chi maak, jo’kan naq tento taqil qib’); Helaman 5:12 (k’e laa k’ojleb’aal sa’ xb’een li Kristo); Tzol’leb’ ut Sumwank 45:57 (k’e li Santil Musiq’ej jo’ aj k’amol aab’e); 25:13 (paab’ laa sumwank).