K’a’jo’ wi’chik naq nakat-osob’tesiik xb’aan li Dios sa’ xk’ab’a’eb’ li k’ojob’anb’il k’anjel ut li sumwank re li santil ochoch

Li loq’laj tiqib’aak a’an jun maatan re nawom ut wankilal. Sa’eb’ li k’ojob’anb’il k’anjel re li loq’laj tiqib’aak, nakak’ul lix k’ab’a’ li Kolonel sa’ aab’een. Nakat-ok sa’ sumwank naq taapaab’ li Dios, tatmayejaq re xb’aanunkil li rajom, taayu’ami lix evangelio li Jesukristo, taapaab’ li chaq’rab’ re saq ru ch’oolej, ut taaq’axtesi laa yu’am ut chixjunil li naxk’e li Dios aawe re lix Iglees. A’an a’in li nakaye naq taab’aanu. Li Dios naxye naq tixk’e aanawom, tixkol aawix, ut tixk’e xwankilal aawe. Naxye ajwi’ naq tatwanq rik’in a’an chi junelik q’e kutan. Sa’ li loq’laj tiqib’aak, usilanb’ilaqat rik’in xk’amb’al chawix li loq’laj t’ikr re li santil tijonelil. Li loq’laj t’ikr a’an reetalil li Jesukristo ut naxjultika aawe laa sumwank re li santil ochoch.

Neke’junajiman chi junelik li sumal ut li junkab’al naq neke’tz’ape’ sa’ junajil sa’ li santil ochoch. Sa’ li k’ojob’anb’il k’anjel re li tz’apok sa’ junajil, laa’at ut laa sum aatin tex’ok sa’ sumwank rik’in li Dios ut cherib’il eerib’. Tex’ok sa’ aatin naq teetaaqe li Dios chi anchal eech’ool ut naq ink’a’ teesach lee sumlajik, naq teera ut teetenq’a eerib’ cherib’il eerib’, ut naq wotz texk’anjelaq chixpaab’ankil lix taqlahom li Dios. A’an a’in li nakaye naq taab’aanu. Li Dios naxye naq taaruuq tatwanq rik’in laa sum aatin ut laa kok’al chi junelik. Naxye ajwi’ naq taaruuq taak’ul li loq’al jwal nim rik’in a’an sa’ li choxahil awa’b’ejihom naq taapaab’ laa sumwank. Li osob’tesink a’in, a’an li taqenaqil loq’al.

K’e reetal naq junelik wanq laa recomendacion re li santil ochoch. Aatinan rik’in jun komon sa’ li obiispil re xk’ulb’al. A’an tixpatz’ aawe chan ru naq yookat chixpaab’ankil lix chaq’rab’ li Qaawa’ re ok sa’ lix santil ochoch. Tz’ileb’ rix li patz’om a’in chi kok’ aj xsa’. (Neke’tawman sa’ xraqik li hu a’in.) Us ta najt wankat rik’in jun li santil ochoch, chak’e laa recomendacion chixk’utb’al xyaalal laa rahom choq’ re li Qaawa’ ut laa wajom chixpaab’ankil lix chaq’rab’.

Ayu sa’ li santil ochoch chi kok’ aj xsa’ a’ yaal naru chawu. Rik’in laa recomendacion re li santil ochoch, naru nakat-ok sa’ li rochoch li Qaawa’ ut naru taakub’eeq aaha’ ut tatk’ojob’aaq choq’ ruuchileb’ laa xe’toonil, re naq te’ruuq chi osob’tesiik jo’ chanru osob’tesinb’ilat laa’at. Chatwanq sa’ li santil ochoch chi kok’ aj xsa’. Sik’ li Qaawa’ sa’ li rochoch. Sik’ sa’eb’ li k’ojob’anb’il k’anjel, li eetalil, ut li Musiq’ej nakaweek’a. Taataw a’an.

Kawresi aawib’ re ok sa’ sumwank sa’ li rochoch li Qaawa’. Naru nakab’aanu a’in chi chaab’il naq taapaab’ laa sumwank re li kub’iha’. K’e aach’ool chixk’ulb’aleb’ li k’ojob’anb’il k’anjel re li santil ochoch ut chixpaab’ankil laa sumwank chiru chixjunil laa yu’am. Tikib’ anajwan xyu’aminkileb’ li chaq’rab’ taayeechi’i xpaab’ankil sa’ li santil ochoch: xpaab’ankileb’ lix taqlahom li Dios, li mayejak, lix evangelio li Jesukristo, li saq ru ch’oolej, ut li q’axtesink-ib’. Laa junkab’al, laa obiisp, ut xkomoneb’ chik laj jolominel sa’ li Iglees naru tate’xtenq’a.

Naru nakatwulak jo’ chanru li Jesukristo. Li Jesus tatxtenq’a chixtaaqenkil li tiikilal. Eb’ li k’ojob’anb’il k’anjel ut sumwank re li santil ochoch te’xk’ut chawu chan ru tat-ok sa’ rilob’aal li Dios ut taak’ul li junelik yu’am rik’in.

Kawresinb’ilaqat rik’in lix wankil li Dios. Sa’ li sumwank re li santil ochoch nayeeman naq lix wankil ut lix loq’al li Dios taawanq sa’ aab’een. Eb’ lix anjel tate’ril.

Li wank sa’ li santil ochoch tatxnach’ob’resi rik’in li Jesukristo ut li Santil Musiq’ej. Taaweek’a li tuqtuukilal ut li hilaal naxk’e li Dios. Taawab’i lix yaab’ xkux chi saqen wi’chik ru. Taatehe’q li choxa, ut taataw ru lix b’e li Dios. Taanimanq aametz’ew re xnumsinkil li ch’a’ajkilal xb’aan naq laq’ab’anb’ilaq laa ch’ool rik’in li re a’an.