Eb’ li saaj
5. Chatb’eeq sa’ xsaqen li Dios
Li Jesukristo naxk’aak’aleheb’ li ketomq

I Shall Not Want [Maak’a’ taamajelo’q chiwu], xb’aan laj Yongsung Kim. B’antiox re Havenlight

5.

Chatb’eeq sa’ xsaqen li Dios

Galatas 5:25

Naq saqen ru nakat-ilok, chaab’il ajwi’ li b’e nakasik’ ru. Chi jo’kan naq jwal aajel ru li saqen; li saqen nokoxtenq’a chixk’eeb’al reetal li chaab’il b’e. Laa Choxahil Yuwa’ naxk’e xyo’leb’aal li choxahil saqen aawe—a’an li maatan re li Santil Musiq’ej—re aatenq’ankil chixk’eeb’al reetal chi saqen ru li chaab’il ut li moko chaab’il ta, li us ut li ink’a’ us.

Li junelikil yaal

Li Santil Musiq’ej naru tatrochb’eeni rajlal. Naq xatk’ojob’aak choq’ komon sa’ li Iglees, kiyaab’asiman aawe, “K’ul li Santil Musiq’ej.” Li ochb’eeniik rajlal xb’aan li Musiq’ej a’an jun reheb’ lix maatan li Dios q’axal nim choq’ aawe.

Xsik’b’al ru li us nakatxtenq’a chireek’ankil li Musiq’ej. Wan naab’al li chaab’ilal sa’ ruchich’och’. Jo’ naq najala laa junxaqalil rik’in li nakawa’ ut nakawuk’, najala chi yaal laa k’a’uxleb’aal ut laa musiq’ rik’in li nakawil ut li nakawab’i.

Li b’oqok

K’e xhoonal li Qaawa’ wulaj wulaj. Tzolon chirix a’an. Jultikaaq a’an aawe junelik. Tijon chiru laa Choxahil Yuwa’. Tzoleb’ li loq’laj hu ut li raatineb’ li yo’yookil profeet. Chirix a’an yal aaq’e chixyu’aminkil li nakatzol.

Sik’ li k’a’ru nawaklesin ch’oolej, namusiq’an k’a’uxlej, ut naxb’oq li Musiq’ej. Rik’in li taawil ut taawab’i, malaj tattz’aqonq wi’, k’oxla li naxk’e chaweek’a. Ma narala li chaab’il k’oxlahom? Najtob’resi aawib’ rik’in yalaq k’a’ru nareetz’u li k’a’ru loq’ ut yalaq k’a’ru moko tiik ta. Mattz’aqon sa’ li k’a’ru naxpo’ laa seeb’al chi tz’ilok-ix malaj chireek’ankil li Musiq’ej, jo’ li rahob’tesink, li uk’a nakaltesin, ut eb’ li droga. Kawaq aach’ool re xchupb’al junaq video malaj b’atz’unk, elk sa’ jun li pelicula malaj xajok, xjalb’al jun li son, malaj xkanab’ankil yalaq k’a’ru ink’a’ naxk’am rib’ rik’in li Musiq’ej.

Oksiheb’ li redes sociales re waklesink ch’oolej. Li redes sociales naru neke’tenq’an sa’ li aatinak-ib’. Wi nakawoksi, puktesi li saqen, li paab’aal, ut li yaal. Maajuntaq’eeta laa yu’am rik’in li yookeb’ chixk’ulb’al li jun siir chik. Chijultiko’q aawe naq aaloq’al nachal xb’aan naq laa’at jun ralal malaj xrab’in li choxahil na’b’ej yuwa’b’ej, ink’a’ rik’ineb’ li redes sociales.

Sik’ li chaab’ilal ut li komonil tz’aqal taakanaaq. K’e reetal naq li roksinkileb’ li k’anjeleb’aal a’in ink’a’ tixchap xna’aj li hoonal taanumsi raj rik’ineb’ laa komon ut laa wamiiw. Li redes sociales ut xkomoneb’ chik li k’anjeleb’aal naru te’xchap naab’al laa hoonal chi b’ab’ay ajwi’ li chaab’ilal neke’xsutq’isi aawe. Us naq wan naq taakanab’ li internet, ut tat-aatinaq rik’ineb’ li kristiaan sa’ laa yu’am.

Li Jesukristo naxb’eresiheb’ li karneer sa’ jun li awimq

Li osob’tesink yeechi’inb’ileb’

Li Musiq’ej naru nawan aawik’in junelik. Yeechi’inb’il a’in aawe rajlal sut naq nakak’ul li loq’laj wa’ak. Li Santil Musiq’ej tixch’olob’ xyaalal laa Choxahil Yuwa’ ut li Jesukristo chawu. Tixk’ojob’ aach’ool, tixk’am aab’e, ut tatxsantob’resi. Tatxtenq’a chixk’eeb’al reetal li yaal ut li chaab’ilal sa’ li ruchich’och’.

Li patz’ok ut li sumenk

Chan ru tinnaw ma yookin chireek’ankil li Santil Musiq’ej? Li xk’eeb’al reetal li Musiq’ej naraj hoonal, yalok, ut kuyuk. Jalan jalanq naq nokoraatina chiqajunjunqal. Misach sa’ aach’ool li k’a’ru ka’ch’in—li tuqtuukilal nakaweek’a naq nakawab’i xch’olob’ahom jun kristiaan malaj li rahil k’a’uxlej nakaweek’a naq nakab’aanu li ink’a’ us. Sik’ sa’eb’ li loq’laj hu chan ru naq na’aatinak li Musiq’ej, tijon chirix, ut maakanab’ xsik’b’al li tixk’e chaweek’a li Musiq’ej.

K’a’ru li pornografia? K’a’ut naq tento tintz’eqtaana? Li pornografia a’aneb’ eetalil sa’ jalam-uuch malaj aatin, li yiib’anb’ileb’ re xwaklesinkil qatz’ejwalejil eek’ahom. K’iila paay li pornografia wan, sa’ video, sa’ jalam-uuch, sa’ hu, sa’ b’atz’unk, ut sa’ son. A’an ajwi’ li aatin malaj li jalam-uuch neke’xtaqla rib’ chirib’il rib’ li amiiw. Li pornografia nareetz’u li k’a’ru loq’—li qajunqaxalil ut li qatz’ejwalejil eek’ahom. Wan naq taawil li pornografia us ta ink’a’ xawaj. Us ta nakawil chi wan aach’ool malaj ink’a’, kanab’ sa’ junpaat. Maare us ajwi’ aatinak rik’in laa na’, laa yuwa’, malaj jalan chik ani wan xchihab’. Rilb’al li pornografia chi wan aawajom a’an maak ut naxpo’ laa wankilal chireek’ankil li Musiq’ej. Naxq’unob’resi laa seeb’al rilb’al aawib’ aajunes, ut naxjal chan ru nakawil aawib’ ut eb’ laa komon. Li Jesukristo wan xwankil chatenq’ankil chixtz’eqtaanankil li pornografia ut chixjalb’al aak’a’uxl. Sik’ li Kristo ut tz’eqtaana li aak’ab’. Laa obiisp naru chatenq’ankil chixk’ulb’al laa metz’ew ut xkuyb’al laa maak rik’in li Kolonel. Li Jesukristo a’an laa kawilal!

Chi’ilmanq Salmos 119:105 (li raatin li Dios chanchan li saqen sa’ li qab’e); Amos 5:14 (sik’ li us); Galatas 5:22–23 (li ruuchinihom li Musiq’ej); Moroni 7:18–19 (lix saqen li Kristo); Tzol’leb’ ut Sumwank 6:23 (li Qaawa’ naxye tuqtuukilal); 20:77, 79 (eb’ li tij re li loq’laj wa’ak).

Eb’ li patz’om re li recomendacion re li santil ochoch

  • Li Qaawa’ xye naq chixjunil li k’a’aq re ru tento taab’aanumanq “chi ch’ajch’o” chiru a’an (Tzol’leb’ ut Sumwank 42:41). Ma nakayal aaq’e re naq saqaq ru aak’oxlahom ut aab’aanuhom?