Laa’at naru tattz’aqonq sa’ lix k’anjel li Dios

Lix kʼanjel ut lix loqʼal li Dios, aʼan xkʼeebʼal chi uxmank laa kolbʼal chiru li kamk ut laa yuʼam chi junelik. Li kole’k chiru li kamk naraj naxye naq waklijenaqaq wi’chik li qajunxaqalil ut maajo’q’e chik tookamq. Li junelik yu’am, malaj li taqenaqil loq’al, naraj naxye wank jo’ chanru li Dios ut wank rik’in a’an ut li qajunkab’al chi junelik. Chixjunil a’in naru chi k’ulmank b’antiox re li Jesukristo ut lix tojb’al rix li maak kixb’aanu. Naru nakapaab’ li Jesukristo.

Naru tattenq’anq sa’ lix k’anjel li Dios naq tatchalq rik’in li Kristo ut taatenq’aheb’ laa was aawiitz’in chixb’aanunkil ajwi’ a’an. Yalaq jo’q’e nakab’aanu k’a’ruhaq li naxtenq’a anihaq chixtaaqenkil li Jesukristo, yookat chi tenq’ank sa’ lix k’anjel li Dios.

Yu’ami li evangelio. Nimob’resi laa paab’aal chirix li Jesukristo. Jal aak’a’uxl wulaj wulaj. K’uleb’ li k’ojob’anb’il k’anjel re lix tijonelil li Dios ut paab’ laa sumwank. B’aanu chixjunil a’in rajlal chiru laa yu’am.

Tenq’aheb’ li wankeb’ sa’ aajel ru. Tenq’aheb’ laa was aawiitz’in, jo’eb’ ajwi’ laa komon, laa wamiiw, ut laa wech tenamitul. Naru nakatenq’aheb’ li wankeb’ sa’ aajel ru naq taapaab’ li chaq’rab’ re li kuyuk sa’ ut nakak’e li mayej re li kuyuk sa’.

B’oqeb’ chixjunil chixk’ulb’al li evangelio. Kanab’ naq li nakaye ut nakab’aanu tixk’ut laa paab’aal chirix li Jesukristo. Ut yo’on wanqat chixyeeb’al re li ani napatz’ok li yo’onihom ut li sahil ch’oolejil nakaweek’a jo’ xmoos li Jesukristo. Teneb’anb’il sa’ xb’eeneb’ li saaj winq naq te’k’anjelaq sa’ mision. Eb’ li saaj ixq naru ajwi’ te’xik sa’ mision; tijon re xnawb’al ma naraj li Qaawa’ naq tatxik. Kawresi aawib’ re xwotzb’al li evangelio chiru laa yu’am.

Junajiheb’ li junkab’al chi junelik rik’in li k’anjel re li resilal li junkab’al ut li santil ochoch. Tzolon chirixeb’ laa xe’toonil. Tz’il rix ani naraj ru xk’ulb’aleb’ li k’ojob’anb’il k’anjel re li santil ochoch. Ayu sa’ li santil ochoch jo’ k’ihal sut naru chawu re naq taakub’eeq aaha’ ut tatk’ojob’aaq choq’ ruuchileb’ a’an. Wi nakawaj aatenq’, ayu sa’ FamilySearch.org.

Li Dios tatxtenq’a. Laa Choxahil Yuwa’ ink’a’ naxtaqla naq aajunes taab’aanu lix k’anjel. A’an wan aawik’in. Naq chi tuulan aach’ool nakaq’axtesi laa hoonal ut laa ch’ool, li Dios tixk’anjelaheb’ li sachb’a-ch’oolej aawik’in. Li Jesukristo a’an laa kawilal!

Tatnujob’resiiq rik’in sahil ch’oolejil. Lix k’anjel li Dios nujenaq rik’in sahil ch’oolejil! Naq tattz’aqonq, tatruuq chireek’asinkil li sahil ch’oolejil nareek’a li Dios. K’oxla li sahil ch’oolejil taanumsi aawochb’een laa Choxahil Yuwa’ ut li ralal xk’ajol li nakak’am rik’in a’an!