Chara li Dios, chara laa was aawiitz’in

Mateo 22:34–40

Re aatenq’ankil chixsik’b’al ru li us, li Dios naxk’eheb’ lix taqlahom. Xb’aan lix rahom choq’ aawe naq naxk’eheb’. Ut jwal us naq taapaab’eb’ lix taqlahom li Dios xb’aan naq nakara. Li rahok wan sa’ xch’oolileb’ lix taqlahom li Dios.

Li junelikil yaal

Li Dios nakatxra. A’an laa Yuwa’. Lix rahom li tz’aqal re ru naru tatxmusiq’a chixraab’al ajwi’ a’an. Naq laa rahom choq’ re laa Choxahil Yuwa’ wan xb’een xb’een sa’ laa yu’am, saqen wi’chik ru li b’e taasik’.

Li wiib’ xninqal ru taqlahom a’an xraab’al li Dios ut xraab’al laa was aawiitz’in. Ut ani laa was aawiitz’in? Chixjunileb’ li kristiaan! Chixjunil chik li k’utb’il sa’ li loq’laj hu ut xb’aaneb’ li profeet naxtaw rib’ rik’ineb’ li wiib’ chi taqlahom a’in.

Chixjunileb’ li kristiaan a’aneb’ laa was aawiitz’in—naraj ajwi’ naxye eb’ li kristiaan li jalaneb’ rilob’aal ut jalaneb’ xk’a’uxl aawik’in. Li qaChoxahil Yuwa’ naraj naq eb’ li ralal xk’ajol te’xra rib’. Naq nakatk’anjelak chiruheb’ li ralal xk’ajol, yookat ajwi’ chi k’anjelak chiru li Dios.

Li b’oqok

K’ut laa rahom choq’ re li Dios rik’in xpaab’ankileb’ lix taqlahom. Qayehaq, wi nakawoxloq’i li hilob’aal kutan, rik’in xkawresinkil aawib’ ut xk’ulb’al li loq’laj wa’ak, nakak’ut chiru li Dios naq wan aach’ool chixk’eeb’al jun kutan re li xamaan choq’ re a’an. Wi nakakuy aasa’ ut nakatoj laa lajteqil ut mayej, nakak’ut chiru li Dios naq aajel wi’chik ru lix k’anjel chiru li k’a’aq re ru re li ruchich’och’. Naq nakayaab’asi xk’ab’a’ li Dios ut li Kristo rik’in oxloq’, maajo’q’e chi maakʼaʼ xyaalal, nakak’ut naq nakab’antioxi chixjunil li neke’xb’aanu choq’ aawe.

Chawileb’ chixjunileb’ laa was aawiitz’in jo’ ralal xk’ajol li Dios. Jo’ xtzolom li Jesukristo, laa’at naru nakak’ut chan ru li wank rik’ineb’ li kristiaan maak’a’ naxye chan ru xb’onol xtib’el, xpaab’aal, ut xwanjik rik’in rahok, oxloq’, ut k’ulub’aak—ut jwal wi’chik eb’ li neke’rahob’tesiik rik’in rahil aatin ut b’aanuhom. Ye’ laa wuq’ reheb’ li ani wankeb’ sa’ junaatalil, li wankeb’ xjunes, ut li wankeb’ sa’ aajel ru. Tenq’aheb’ chireek’ankil lix rahom li qaChoxahil Yuwa’. Wotzeb’ re a’an laa wosob’tesinkil naxk’e li Dios, ut b’oqeb’ chixtaaqenkil li Jesukristo.

K’e reetal naq li nakaye naxk’ut laa rahom choq’ re li Dios ut choq’ re laa was aawiitz’in—sa’ laa yu’am ut sa’ internet. Ye li k’a’ru nawaklesin ch’oolej—maawa’ li najachok, li narahob’tesin, li nahobok, us ta yal b’atz’unk raj nakawaj. Nim xwankileb’ laa waatin. K’e reetal naq nim xwankileb’ choq’ re li us.

K’ut laa rahom chiru laa junkab’al. Xraab’al chixjunileb’ li ralal xk’ajol li Dios natikla sa’ li ochoch. Yal aaq’e chixk’eeb’al chi eek’amank lix rahom li Kolonel sa’ laa wochoch.

Li Jesukristo (chire li Ha’ Betesda) naxtaqsi jun isb’ b’ar wi’ yokyo jun winq yeeq roq

Li osob’tesink yeechi’inb’ileb’

Taakawuuq laa sumwanjik rik’in li Dios naq nakak’ut laa rahom rik’in xpaab’ankileb’ lix taqlahom ut laa sumwank rik’in a’an.

Taakawuuq laa sumwanjik rik’ineb’ laa was aawiitz’in naq nakak’ut laa rahom rik’in k’anjelak chiruheb’ jo’ li Kristo. Taasaho’q aach’ool naq nakatamresi li rahok sa’ li ruchich’och’.

Li patz’ok ut li sumenk

Chan ru tweek’a lix rahom li Dios? Junelik naru nakaweek’a lix rahom li qaChoxahil Yuwa’. Aatinan rik’in a’an sa’ tijok chi kok’ aj xsa’. Wotz li nakaweek’a rik’in, ut ab’i li tixye aawe. Il li raatin sa’ li loq’laj hu. K’oxla chixjunil li xb’aanuhom choq’ aawe. Wanqat sa’eb’ li na’ajej ut k’anjel b’ar wi’ nawan lix Musiq’.

Ma naraj li Qaawa’ nax tinraheb’ chixjunil li kristiaan, jo’eb’ ajwi’ li nikine’xrahob’tesi? Li Qaawa’ naraj naq taaraheb’ li xik’ neke’ilok aawe ut naq tattijoq chirixeb’ li neke’rahob’tesink aawe. A’b’anan, moko tento ta naq tatkanaaq b’ar wi’ taak’ul rahilal sa’ k’a’uxlej, tib’elej, malaj musiq’ej. Najtob’resi aawib’ rik’in li taarahob’tesinq aawe ut k’e reetal naq sa wanqat. Wi wankeb’ li neke’rahob’tesink aawe, malaj wi nakanaw naq wan ani chik yoo chi rahob’tesiik, aatinan rik’in jun kristiaan ak nim.

Jo’q’e ut chan ru tin’ok chixnawb’aleb’ ru li saaj ixq (wi saaj winqin) malaj saaj winq (wi saaj ixqin). Us naq taanaweb’ ru rik’in li ok choq’ amiiw. Sa’ laa saajilal, taweb’ naab’aleb’ aawamiiw. Sa’ junjunqeb’ li na’ajej, eb’ li saaj neke’ok chixnawb’al rib’ sa’eb’ li chaab’il kok’ k’anjel jo’ ch’uut. Re naq sa sa tatk’iiq sa’ k’a’uxlej ut musiq’ej, us naq ink’a’ tat-elq aajunes rik’in junaq chik li saaj ixq malaj saaj winq toj reetal naq nimaqat chik—maare naq 16 chihab’ wanq aawe. Aatinan rik’ineb’ laa na’ aayuwa’ ut eb’ laj jolominel. Oyb’eni li elk rik’in jun li mukuy toj reetal naq nimaqat chik. Wanqat aawochb’eeneb’ li te’tenq’anq aawe chixpaab’ankileb’ laa teneb’ankil rik’in li Jesukristo.

K’a’ru tinb’aanu wi maak’a’ li rahok sa’ li wochoch? Laa Kolonel naxnaw li wankat wi’, ut a’an nakatxra. Wanq aakuyum, paab’eb’ lix taqlahom li Dios, ut b’aanu li us chiru laa junkab’al. Li rahok nakak’ut, us ta ka’ch’in, naru nak’anjelak chi nim. Naru ajwi’ nakataw aakomonil sa’ laa teep sa’ li iglees. Kawresi aawib’ anajwan re naq laa junkab’al xaqab’anb’ilaq sa’ xb’eeneb’ li raatin li Jesukristo. Chijultiko’q aawe: Li Jesukristo a’an laa kawilal!

Chi’ilmanq Isaias 58:3–11 (k’a’ru aj-e li kuyuk sa’); 58:13–14 (li osob’tesiik re roxloq’inkil li hilob’aal kutan); Malakias 3:8–10 (li osob’tesiik re xtojb’al li lajteqil); Lukas 6:27–28 (charaheb’ li xik’ neke’ilok aawe); 10:25–37 (ani li was wiitz’in?); Jwan 3:16–17 (li Dios kooxra, jo’kan naq kixtaqla li Ralal); 14:15 (naqapaab’eb’ li taqlahom xb’aan naq naqara li Dios); 1 Jwan 4:19 (naqara li Dios xb’aan naq a’an nokoxra); Mosiah 2:17 (naq nokok’anjelak chiru li qas qiitz’in, nokok’anjelak ajwi’ chiru li Dios).

Eb’ li patz’om re li recomendacion re li santil ochoch

Ma nakataaqe li k’a’ru k’utb’il sa’ lix Iglees li Jesukristo sa’ laa b’aanuhom sa’ k’utk’u ut sa’ muqmu rik’ineb’ li komon sa’ laa junkab’al ut rik’in anihaq chik?
Ma nakatoj li lajetqil chi tzʼaqal?