1.
Li na’leb’ kixk’uub’ li Dios a’an choq’ aawe
Naq maji’ nakatchal sa’ li ruchich’och’, katwan rik’in laa na’ laa yuwa’ sa’ choxa. Laa’at jun alalb’ej malaj rab’inb’ej raab’ilat xb’aaneb’ a’an. Aran sa’ choxa, kanaw lix na’leb’ li Dios choq’ re lix junkab’al. Kak’ul li na’leb’ a’in chi sa aach’ool xb’aan naq tatxtenq’a chi k’iik ut chi wulak jo’ chanru li Dios rik’in xk’ulb’al laa junxaqalil, wank sa’ junkab’al, ut yu’amink sa’ li ruchich’och’. Ak re naq wan ch’a’ajkilal taanumsi. Li qaYuwa’ ak kixnaw a’an, jo’kan naq kixk’uub’ xna’leb’ ut kixtaqla jun aj Kolonel, li Jesukristo, re aatenq’ankil. A’an a’in li k’uub’anb’il na’leb’ re li kolb’a-ib’ malaj re li sahil ch’oolejil naqaye re.
Li junelikil yaal
Li qaChoxahil Yuwa’ kixk’uub’ li na’leb’. A’an lix Yuwa’ laa musiq’, ut nakatxra. A’an naraj xk’eeb’al aawe li rosob’tesihom jwal nim—li junelik yu’am rik’in a’an. Sa’ jalan chik aatin, li Dios naraj naq tatwulaq jo’ chanru a’an ut naq taayu’ami li sahil ut xnimal ru yu’am naxyu’ami a’an. Li Dios chixjunil naxtaqla ut chixjunil naxnaw. Naru nakapaab’ a’an, us ta ch’a’aj laa yu’am.
Li Jesukristo naxk’e chi ruhank li k’uub’anb’il na’leb’. Rub’elaj lix k’ojlajik li ruchich’och’, li qaChoxahil Yuwa’ kixsik’ ru li Jesukristo re naq taawanq choq’ aj Kolol aawe. Ka’ajwi’ li Jesukristo naru chak’amb’al wi’chik rik’in laa Yuwa’ sa’ Choxa. Jo’kan naq naqataaqe a’an. Aajel ru xtaaqenkil!
Aajel ru li sumlaak ut li junkab’al sa’ xna’leb’ li Dios. Komonat laa’at sa’ lix junkab’al li Dios, ut chixjunileb’ li ralal xk’ajol neke’chal sa’ ruchich’och’ rik’in jun na’b’ej ut jun yuwa’b’ej. Li Dios naraj naq li ralal xk’ajol te’tz’aqloq re ru chi junelik q’e kutan. Xkab’ichal li winq ut li ixq neke’oken sa’ li sumlaak, chi junajinb’ileb’ rib’ sa’ rahok. Li wank sa’ junkab’al arin sa’ ruchich’och’—us ta moko tz’aqal ta re ru—naru naxk’e nimla sahil ch’oolej. Li wank sa’ junkab’al nakatxkawresi choq’ re li junelik yu’am rik’in li Dios.
Li b’oqok
Rajlal chiwanq sa’ aach’ool li junelik q’e kutan. Naq tat-aaleeq, taayale’q aawix, taaraho’q aach’ool, ut taasachq aana’leb’, jultikaq aawe li na’leb’ kixk’uub’ li Dios. K’e reetal chan ru naq li junelikil na’leb’ nakanaw chirix lix k’uub’anb’il na’leb’ naru tatxtenq’a chixjalb’al aana’leb’ chirixeb’ laa ch’a’ajkilal.
Sik’ li ruq’ li Dios sa’ laa yu’am. K’e reetal laa wosob’tesinkil xb’aan li Dios. K’e reetal chan ru naq li Dios nakatrosob’tesi.
K’e aach’ool chixtaaqenkil li na’leb’ kixk’uub’ li Dios. Yal xnawb’al k’a’ru naraj laa Choxahil Yuwa’ naq taab’aanu. Sik’ lix b’eresihom naq yookat chirilb’al li loq’laj hu, li raatineb’ li yo’yookil profeet, li jek’inb’il aatin chirix li junkab’al, ut laa wosob’tesinkil rik’in li patriarca. Xb’aanunkil a’in tatxkawresi re k’anjelak chiru li Qaawa’, jo’ misioneer ut chiru chixjunil laa yu’am. K’e aach’ool naq xb’een xb’een tatk’anjelaq chiru li Qaawa’, tatsumlaaq chi junelik q’e kutan, ut taak’iiresiheb’ aakok’al. Yal aaq’e re naq sahaq xch’ool laa junkab’al anajwan rik’in xtaaqenkil li raatin li Jesukristo.
Li osob’tesink yeechi’inb’ileb’
Naru nakanumsi li yale’k-ix sa’ laa yu’am chi wan xkawilal aach’ool ut aayo’onihom rik’in li Kristo. Laa’at nakanaw li junelikil na’leb’ kixk’uub’ li Dios, jo’kan naq wan li naru tat-iloq wi’ naq ch’a’aj wankat. Nakanaw naq li yu’am ink’a’ natikla rik’in li yo’laak ut ink’a’ naraqe’ rik’in li kamk. Nakanaw anihat laa’at chi yaal, li rajom laa yu’am, ut li naru nakatwulak wi’ rik’in lix tenq’ li Kolonel. Li Jesukristo a’an laa kawilal!
Laa’at naru nakak’ul li junelik yu’am naq nakataaqe li Jesukristo. A’an tixk’e wankilal aawe re wulak jo’ chanru a’an, re sutq’iik rik’in laa choxahil na’ aayuwa’, ut re wank rik’ineb’ laa raarookil komon chi sa aach’ool chi junelik. Chapaab’ li Jesukristo.
Li patz’ok ut li sumenk
K’a’ut naq wan naq jwal ch’a’aj li yu’am? Chan ru tintaw inmetz’ew? Li nakanumsi sa’ li yu’am a’in—us ta jwal ch’a’aj—naru tatxtenq’a chi chaab’ilo’k. Naru tatxtenq’a chi k’iik ut chi xik chi uub’ej naq taasik’ li Kolonel. Maak’a’ naru nakanumsi li ink’a’ ta naxtaw ru li Jesukristo, xb’aan naq kixmayeja rib’ re xtojb’al qix. A’an naxnaw chi tz’aqal chan ru aatenq’ankil. Jayali li Kristo sa’ laa yu’am, ut a’an tatxwaklesi sa’ xb’een chixjunil li tawasink ut li xuwak.
Wan naq, maare ch’a’aj xyo’oninkil li sahil ch’oolejil sa’ li junkab’al ut li sumlaak. Chan ru tintaw xkawilal inch’ool? Maak’a’ naxye b’ar wankat, maakanab’ xpaab’ankil lix k’uub’anb’il na’leb’ laa Choxahil Yuwa’. Laa Choxahil Yuwa’ maajo’q’e tatxkanab’. Wi taapaab’ li Kolonel ut laa sumwank, taataw xsumenkileb’ laa patz’om sa’ li raatin li Jesukristo. A’an naxtaw ru chixjunil li nakanumsi. Rik’in li Jesukristo, taataw aametz’ew re xpaab’ankil lix taqlahom li Dios ut taak’uleb’ li osob’tesink naxyeechi’i. Chapaab’ a’an ut lix evangelio.
Chi’ilmanq 2 Nefi 9:13 (kʼaʼjoʼ xnimal ru lix na’leb’ li qaDios!); Mosiah 2:41 (eb’ li neke’xpaab’ li taqlahom teʼruuq chi wank rikʼin li Dios saʼ sahil chʼoolejil li maajoʼqʼe naʼosoʼ); Alma 12:28–34 (li Dios kixk’utb’esi li kʼuubʼanbʼil naʼlebʼ re li tojbʼal-ix chiruheb’ li ralal xk’ajol); Abraham 3:22–26 (li Dios kixk’uub’ naq tooxtaqla arin sa’ ruchich’och’, b’ar wi’ taqasik’ qajunes xpaab’ankil lix taqlahom).
Li patz’om re li recomendacion re li santil ochoch
-
Ma wan aapaab’aal ut xnawom aach’ool chirix li Dios, li Junelik Yuwa’b’ej, li Jesukristo li Ralal, ut li Santil Musiq’ej?