Loq’ laa junxaqalil

Laa junxaqalil yoʼobʼtesinbʼil joʼ chanru xjalam-uuch li Dios—a’an li ani q’axal loq’ ut nim xwankil sa’ chixjunil li choxa ch’och’. Li loq’laj hu naxjuntaq’eeta li qajunxaqalil rik’in li santil ochoch, jun na’ajej nawan wi’ li Musiq’ej. Yaal naq moko tz’aqal ta re ru laa junxaqalil anajwan. A’b’an li yookat chixk’ulb’al rik’in laa junxaqalil naru tatxkawresi re naq sa’ junaq kutan taak’ul laa xaqalil li tz’aqalaq re ru, waklijenaq chi yo’yo, ut k’eeb’ilaq xloq’al.

Laa waam a’an lix laq’ab’ankil laa xaqalil ut laa musiq’. Jo’kan ut naq laq’lookeb’ ajwi’ li kawilal sa’ tib’elej ut sa’ musiq’ej. Li Kolonel kixk’utb’esi li Aatin re Chaab’il Na’leb’ re xk’utb’al li na’leb’ chirix rilb’al li junxaqalil ut re xyeechi’inkil li osob’tesink sa’ tib’elej ut sa’ musiq’ej.

Li qatz’ejwalejil eek’ahom nim xwankil sa’ li na’leb’ kixk’uub’ li Dios re xkawresinkil li sahil wank chi sumsu ut li junelikil junkab’al. Moko maak ta li eek’ahom a’an—loq’ b’an. Jwal loq’ ut nim xwankil li naqeek’a chirix li tz’ejwalej jo’kan naq li Dios kixk’e li chaq’rab’ re saq ru ch’oolej re aakawresinkil chiroksinkil li nakaweek’a jo’ kixk’uub’ a’an. Li chaq’rab’ re saq ru ch’oolej naxye naq li Dios naraj naq ka’ajwi’ jun li winq ut jun li ixq li sumsuukeb’ te’xnaw rib’ chi jo’kan. Naab’aleb’ ink’a’ neke’xpaab’ ut wan naq neke’reetz’u lix chaq’rab’ li Dios, a’b’an li Qaawa’ nokoxb’oq chixtaaqenkil ut chixyu’aminkil jun na’leb’ jwal taqenaq.

K’e xloq’al laa junxaqalil—ut xjunxaqalileb’ laa was aawiitz’in. Naq nakasik’ ru laa waq’, laa wismal, ut chan ru nakat-ilok, patz’ aawib’, “Ma yookin chixk’eeb’al xloq’al lin xaqalil jo’ jun loq’laj maatan k’eeb’il xb’aan li Dios?” Li qaChoxahil Yuwa’ naraj naq taqil qib’ chiqib’il qib’ jo’ tz’aqal aniho: moko yal ta tib’elejo, laa’o b’an ralal xk’ajol raab’il xb’aan ut wan qachoxahilal. Maawoksi li aq’ej li naxk’eheb’ li kristiaan chirilb’al laa junxaqalil xb’een wa chiru aawilb’al jo’ ralal malaj xrab’in li Dios. Kanab’ naq li saq ru ch’oolej ut laa rahom choq’ re li Dios tatxb’eresi. Sik’ aana’leb’ rik’in laa junkab’al.

B’aanu li k’a’ru tixkawob’resi laa junxaqalil; maab’aanu li k’a’ru tixrahob’tesi malaj tixtiq’. Oksi ut b’antioxi re li Dios li k’iila usilal naxk’e. Chijultiko’q aawe naq li uk’a nakaltesin, li may, li kape, li te, ut eb’ li droga ut wan xkomon chik, moko us ta choq’ re laa junxaqalil chi moko laa musiq’. Wan ajwi’ li chaab’il b’an, jo’ li k’eeb’il xb’aan laj b’anonel, li naru tooxsach wi ink’a’ oksinb’il chi tiik.

K’e xloq’al li wank sa’ sumalej ut eb’ laa tz’ejwalejil eek’ahom. Ink’a’ us li ch’uch’ink aatin chirix a’an. Naq moko sumsuukeb’ ta jun winq ut jun ixq, moko us ta xtoch’b’al junjunq xcha’al li tib’elej li loq’eb’, us ta toj wan xt’ikr li kristiaan. Sa’ li nakab’aanu, nakawil, nakawab’i, nakak’oxla, nakaye, malaj nakataqla, maab’aanu yalaq k’a’ru naxyoob’ li tz’ejwalejil eek’ahom sa’ xch’ool jalan malaj sa’ aach’ool laa’at. A’in na’aatinak ajwi’ chirix yalaq paay chi pornografia. Wi wankat sa’ jun na’ajej b’ar wi’ naniman li aaleek, elen aran. Ak nakanaw k’a’ruheb’ li na’ajej a’an. Ut wi ink’a’ nakanaw, li Musiq’ej, laa junkab’al, ut eb’ laj jolominel naru tate’xtenq’a chixnawb’al. K’ut chiru laa Yuwa’ sa’ Choxa naq nakawoxloq’i li loq’laj wankilal re yo’ob’tesink.

Li oxloq’ nakaweek’a choq’ aawe ut choq’ reheb’ laa was aawiitz’in taanimanq naq nakawoxloq’i laa junxaqalil rik’in laa b’aanuhom, laa wilb’al, ut laa tiqib’aal.

Li Qaawa’ naxyeechi’i xninqal ru b’ihomal re nawom reheb’ li neke’paab’ank re li Aatin re Chaab’il Na’leb’. Jun xaqalil kaw rib’, li maak’a’ k’aytesinb’il wi’, naxnimob’resi ajwi’ laa wankilal chixk’ulb’al li k’ub’tesinb’il na’leb’, chi k’oxlak, ut chi k’anjelak chiru li Qaawa’.

Xyu’aminkil li chaq’rab’ re saq ru ch’oolej naxk’e chi saho’k li Dios ut naxk’e laa musiq’ejil metz’ew. Naxkol aawix ut naxkol rix laa junkab’al chalel. Naq sumsuuqat, li chaq’rab’ a’in tixk’e xnimal li rahok ut junajil sa’ laa sumlajik. Xpaab’ankil li chaq’rab’ a’in naxk’e aak’ulub’ chi xik chi uub’ej chi junelik ut chi wulak jo’ chanru laa Choxahil Yuwa’. Taanimanq lix kawil aach’ool naq nakatb’eek jo’ xtzolom li Jesukristo.